Gibo 6

So Pagpili ko Pitong Tagasirbi

¹ Ko manga panawon na adto, nagpapararogang so bilang ko manga parasonod ni Jesus, sagkud so manga Griyegong Judio na kaiba nira, nagreklamo kontra sa manga Hebreo. Ta so kaiba nirang manga balo napababayaan so oroalduw na pagrarasyon sa pagkaun. ² Kaya tinipon ko Dose so manga parasonod ni Jesus sagkud sinnabi, ?Bukung tama para kanatu na mapabayaan a pangangadal ka oosipun ka Diyos, tanganing mamaala ka pagrasyon sa pagkaun. ³ Manga ngod, pomili kamo sa pitong kalalakiyan na kaiba ninyo na bistadong pospos ka Espirito Santo sagkud kadonongan. Itatao namu kanda a responsabilidad na adi ⁴ sagkud itatao namu a bilog na panawon sa pangadyi sagkud pangangadal ka oosipun ka Diyos.?

⁵ Naoyonan ko interong gropo so kaisipan na adto. Kaya pinili nira si Esteban, usad na lalaking pono sa pagtobod sagkud pospos sa Espirito Santo, sagkud si Felipe, Procoro, Nicanor, Timon, Parmenas, sagkud Nicolas na tagaAntiokia, na nakaako sa Judaismo. ⁶ Iinatobang sira sadto manga apostol, ipinangadyi sira sagkud rinutaan ko manga kamut.

⁷ Kaya, padagos na linnuyap so oosipun ka Diyos, lalong dinnakul so paratobod sa Jerusalem sagkud kadakul na padi nagsonod sagkud nagtobod.

⁸ Ngowan si Esteban, a lalaking pospos sa pagkabuut ka Diyos sagkud kapangyariyan, ginnibo sa kadakul na ngangalasan sa atobangan ko manga tawo. ⁹ Alagad nakipagdiskotir kanya so nagkapirang miyembro ko sinagoga na binabaoy na Pinalibre, kabilang sadi so manga Judiong tagaCirene sagkud Alejandria, Cilicia sagkud tagaAsya. ¹⁰ Alagad uda sira maginibo kontra ka kadonongan na itinao ka Espirito ki Esteban.

¹¹ Pangala pailum nirang sinolsolan so nagkapirang lalaki na somabing, ?Narungug namu si Esteban na nag-oosip sa maraut kontra ki Moises sagkud sa Diyos.? ¹² Kaya natintaran nira so manga tawo sagkud manga kagogorangan sagkud manga paratottoro sa Layi. Pangala rinakup nira si Esteban sagkud dinara sadto Konseho. ¹³ Iinatobang nira so manga botigun na testigo, sagkud sinnabing, ?Diri sira pinnopondo sa pag-osip kontra sa banal na Templo sagkud kontra sa Layi ni Moises. ¹⁴ Narungug namung sinasabi niya na a Jesus na adi na tagaNazaret rurugmaun a Templo, sagkud babalyowan a ngamin na kaogalian na ipinamana kanatu ni Moises.?

¹⁵ So ngamin na nakaula sadto Konseho tiniurungan si Esteban, sagkud nabayad nira so kanyang lalawgun na bagana lalawgun sa anghel.