13
Nininuwan ni Jesus so Tiil ko manga Disipolo Niya
1 Ko disperas na ko Piyesta sa Paskowa, isi ni Jesus na innabot na a oras na gomagalin na iya sa kinaban na adi tanganing bomalik sa Ama. Nabubutan niya so manga disipolo niya sadi kinaban, sagkud nabutan niya sira anggan kataposan.
2 Nanggagab'i si Jesus sagkud so manga disipolo niya, ko ibutang ko Diyablo sa poso ni Judas, igin ni Simon Iscariote, na traydoron iya. 3 Isi ni Jesus na tinawan na iya ka Ama sa kompletong kapangyariyan. Sagkud isi man niyang galin iya sa Diyos sagkud bomabalik na iya sa Diyos. 4 Mantang nanggagab'i sira, tinnindug si Jesus, inokas so pang ibabuw na bado saka nag-agkus sa towalya sa popotlan niya. 5 Pangala binutangan niya sa tobig so planggana sagkud usad-usad na nininuwan so tiil ko manga disipolo, sagkud pinayran ko towalyang nakaagkus sadto popotlan niya. 6 Pagrapo niya ki Simon Pedro, sinnabi adi kanya, ?Nininuwan mo po a manga tiil ko, Kagorangnan??
7 Sinnimbag si Jesus, ?Diri mo naiintindiyan a ginigibo ko ngowan, alagad maiintindiyan mo adi pagkatapos.?
8 Sinnimbag si Pedro, ?Nongka! Diri pwedeng ika a magninuw ka manga tiil ko.?
Sinnimbag si Jesus, ?Kin diri mo panininuwan a manga tiil mo kanaku, buku ta na ikang disipolo.?
9 Sinnimbag si Simon Pedro, ?Kin arug po kan, Kagorangnan, buku sana a manga tiil ko, kindi pati na a manga kamut sagkud payo ko!?
10 Sinnabi si Jesus, ?A bagong marigos malinig na, kaya diri na kinakaipowan na ogasan a bilog na awak, pwera ka tiil niya. Malinig na kamo, alagad bukung ngamin.? 11 Holi ta isi niya kin siisay a migtraydor kanya, kaya sinnabi iya na sira malinig na, alagad bukung ngamin.
12 Ko maninuwan na ni Jesus so manga tiil nira, nagbado na iya sagkud binnalik sadto lamesa. Pagkatapos inonga niya sira, ?Naintindiyan ninyo kin ono so ginibo ko kaninyo? 13 Binabaoy ninyo akong Maestro sagkud Kagorangnan, tama kamo, ta amo yan a matood. 14 Kin ako na kaninyong Maestro sagkud Kagorangnan nagninuw ka manga tiil ninyo, kaipowan amo man an a gibowon ninyo sa kada usad. 15 Tinawan ko kamong arugan na kaipowan ninyong arugun. Kaya gibowon man ninyo so ginibo ko kaninyo. 16 Sinasabi ko kaninyo a kamatoranan: uda oripun na mas dakulu kisa kanyang kagorangnan, sagkud uda isinobol na mas dakulu kisa nagsobol kanya. 17 Ngowan, na isi na ninyo a manga bagay na adi, paladan kamo kin gibowon adi ninyo.
18 Bukung kamo ngamin a sinasabi ko, ta bistado ko a pinili ko. Alagad kaipowan na maotob a sinasabi sa Kasoratan na, ?Trinaydor ako ka tawong kabanga ka tinapay ko.? 19 Sinasabi ko adi kaninyo ngowan bago pa mangyari, tanganing kin mangyari na adi, maniwala kamong ?Ako amo Ako.? 20 Sinasabi ko kaninyo a kamatoranan, a siisay man na nag-aako ka manga tawong isinobol ko innaako man kanaku, sagkud a innaako kanaku, innaako man ka nagsobol kanaku.?
Ipinaayag ni Jesus na agko Migtraydor Kanya
(Mt. 26:20-25; Mk. 14:17-21; Lk. 22:21-23)
21 Pagkasabi kadi ni Jesus, naporisaw iya sagkud sinnabi, ?Sinasabi ko kaninyo a kamatoranan, usad kaninyo tatraydoron ako.?
22 Nagsinilngan sa kada usad so manga disipolo, nalilibungan ta diri nira isi kin siisay a sinasabi niya. 23 Usad sa manga disipolo na nabubutan ni Jesus so nakasandig kanya, 24 kaya nagpasabot si Simon Pedro kanya sagkud sinnabi, ?Ionga mo kin siisay a sinasabi niya.?
25 Kaya mantang nakasandig iya ki Jesus, nag-onga iya, ?Siisay po iya, Kagorangnan??
26 Sinnimbag si Jesus, ?A tawan ko ka tinapay matapos kong idinotdot, amo yan.? Kaya kinnoko iya sa tinapay, sagkud matapos na idotdot itinao niya ki Judas na igin ni Simon Iscariote. 27 Ko makoko na ni Judas so tinapay, linnuug kanya si Satanas. Sinnabi kanya si Jesus, ?Dalian mo na, gibowon mo na a gigibowon mo!? 28 Uda ni usad sa kaiba niya so nakaintindi kin ngata ta sinabi adto ni Jesus ki Judas. 29 Holi ta si Judas so nagkakaput ko sopot ko kwarta, nag-una so iba na pinababakal si Judas ko manga kaipowan nira sa piyesta, o maitatao sadto manga pobre.
30 Pagkakaun ni Judas ko tinapay dalidali iyang ginnalin. Gab'i na kadto.
A Bagong Kamandaan
31 Ko makagalin na si Judas, sinnabi si Jesus, ?Ngowan akong Igin sa Tawo pamomorawayan na, sagkud sa paagi ko pamomorawayan man a Diyos. 32 Sagkud kin sa paagi ko mapamomorawayan a Diyos, iaayag man ka Diyos a kanakung kamorawayan, sagkud gigibowon niya adi tolos.
33 Manga igin, gatikot na panawon na sana ako ninyong makaiiba. Aanapun ninyo ako, alagad arug ka sinabi ko sa manga namomoon kanda, diri kamo makaiiyan sa paiiyanan ko.
34 Kaya usad na bagong kamandaan a itinatao ko kaninyo: Magkabinutan kamo. Arug ka pagkabuut ko kaninyo, kaya mabutan ninyo a kada usad kaninyo. 35 Kin migkabinutan kamo, maiisiyan ka ngamin na kamo manga disipolo ko.?
Sinabi ni Jesus na Ninigaran Iya ni Pedro
(Mt. 26:31-35; Mk. 14:27-31; Lk. 22:31-34)
36 Innonga si Simon Pedro ki Jesus, ?Sari po ika paiiyan, Kagorangnan??
Sinnimbag si Jesus, ?Sa ngowan diri ika makasosonod sa paiiyanan ko, alagad migsonod ika pagkatapos.?
37 Innonga si Pedro, ?Ngata ta diri po ako pwedeng makasosonod kanimo ngowan, Kagorangnan? Anda man akong magraan para kanimo.?
38 Sinnimbag si Jesus, ?Talagang anda ikang magraan para kanaku? Sinasabi ko kanimo a kamatoranan, bago tomottoraok a manok, tolong beses mo akong ninigaran.?