14
Si Jesus a Aagyan
1 Pangala, sinnabi si Jesus kanda, ?Diri kamo maporisaw, magtobod kamo sa Diyos sagkud magtobod man kamo kanaku. 2 Sa baluy ka kanakung Ama kadakul ka manga kwarto, omiiyan ako sadto tanganing iandam a logar para kaninyo. Diri ko adi sasabiyun kaninyo kin buku ading matood. 3 Pakaiyan ko sagkud pakaandam ka logar para kaninyo, bomabalik ako pangala ipig-iba ko kamo, tanganing kin sari ako sadto man kamo. 4 Sagkud isi ninyo a aagyan paiyan sadto logar na paiiyanan ko.?
5 Sinnabi si Tomas kanya, ?Kagorangnan, diri tabi namu isi kin sari ika paiiyan, paono po namu maiisiyan a aagiyan paiyan san??
6 Sinnimbag si Jesus, ?Ako sana a aagyan, a kamatoranan sagkud a boway. Uda ni usad na makaiiyan sa Ama, kin bukung sa paagi ko. 7 Kin bistado ninyo ako, bistado man ninyo a kanakung Ama, poon ngowan bistado sagkud nabayad na ninyo iya.?
8 Sinnabi si Felipe, ?Kagorangnan, pabaydan man po kanamu a Ama, sagkud mamumuya na kami.?
9 Sinnimbag si Jesus, ?Diri mo pa ako bistado, Felipe, sa loyo ka mauban ta ng pagparaibaiba? A nakabayad kanaku nakabayad naman ka Ama. Ngata ta sinasabi mong, ?Ipabayad mo kanamu a Ama?? 10 Diri ika nagtotobod na ako nasa Ama, sagkud a Ama sadi kanaku? A manga oosipun na sinasabi ko kaninyo bukung galin kanaku kindi sa Amang nasa langit. Iya a naggigibo ka manga bagay na ginigibo ko. 11 Magtobod kamo na ako nasa Ama sagkud a Ama sadi kanaku. Kin abu ninyong maniwala sa sinabi kong adi, maniwala kamo holi ka manga bagay na ginibo ko. 12 Sinasabi ko kaninyo a kamatoranan, a nagtotobod kanaku makagigibo man ka ginigibo ko, sagkud orog pa kadi a magigibo niya ta omiiyan na ako sa Ama. 13 Sagkud onoman na ayatun ninyo sa ngaran ko gigibowon ko, tanganing mapamorawayan a Ama sa paagi ka Igin. 14 Amo, gigibowon ko a onoman na ayatun ninyo sa ngaran ko.?
Ipinanoga ni Jesus a Espirito Santo
15 ?Kin nabubutan ninyo ako, kokoyogon ninyo a kanakung manga kamandaan. 16 Sagkud mingadyi ako sa Ama na tawan kamo sa usad na Paratabang na makaiiba ninyo anggan pa man. 17 Iya a Espirito Santo na migtottoro kaninyo ka kamatoranan. Diri iya maako ka manga taga kinaban ta diri iya nababayad o nabibisto ka manga adi. Alagad bistado ninyo iya, ta iya kaiba ninyo sagkud isan inyo anggan pa man.
18 Diri ko kamo babayaan na uda kaiba, migbalik ako kaninyo. 19 Gatikot na sanang panawon diri na ako mababayad ka manga taga kinaban. Alagad mababayad ninyo ako, ta maboboway ako, sagkud maboboway man kamo.
20 Sa alduw na an maiisiyan ninyo na ako nasa kanakung Ama, kamo sadi kanaku, sagkud ako san inyo. 21 A siisay man na omako sagkud magsonod ka manga kamandaan ko amo a nabubuut kanaku. A nabubuut kanaku mabubutan man ka kanakung Ama. Mabubutan ko man iya, sagkud iaayag ko a sadiri ko kanya.?
22 Inonga iya ni Judas (bukung si Iscariote), ?Kagorangnan, ngata ta kanamu sana ika migpabisto bukung sa kinaban??
23 Sinnimbag si Jesus, ?A siisay man na nabubuut kanaku komokoyog ka kanakung katottoroan, mabubutan iya ka kanakung Ama, kaya Ako sagkud a Ama mig-iyan sagkud omiistar kanya. 24 A siisay man na diri nabubuut kanaku, diri kinnokoyog ka manga itinotottoro ko. A oosipun na narungug ninyo bukung galin kanaku kindi sa Amang nagmanda kanaku.
25 Sinasabi ko kaninyo a manga bagay na adi mantang kaiba pa ninyo ako. 26 Alagad a Paratabang, na uda iba kindi a Espirito Santo amo ipadadara ka Ama na kabalyo ko. Iya a migtottoro kaninyo ka ngamin na bagay sagkud migparumrum ka ngamin na manga sinasabi ko kaninyo.
27 Diri kamo maporisaw sagkud diri kamo makatakot, ta itatagak ko kaninyo a katoninungan. A kanakung katoninungan mismo a itinatao ko kaninyo. Buku ading arug ka katoninungan na itinatao ka kinaban. 28 Narungug ninyo a sinabi ko na gomagalin ako alagad migbalik man kaninyo. Kin nabubutan ninyo ako, mamumuya kamo sa pag-iyan ko sa Ama, ta mas dakulu a Ama kisa kanaku. 29 Sinasabi ko adi kaninyo bago pa mangyari, tanganing magtobod kamo pag nangyari na adi. 30 Diri na ako migngabil kaninyo sa mauban, ta omaabot na si Satanas na amo mighadi sa manga taga kinaban. Uda iya kapangyariyan kanaku. 31 Alagad tanganing maisiyan ka kinaban na nabubutan ko a kanakung Ama, ginigibo ko a iminamanda niya. Mosna kamo, gomalin na kita sadi.?