Juan 12

Binoboan sa Paamot si Jesus sadto Betania

(Mt. 26:6-13; Mk. 14:3-9)

¹ Unum na alduw bago omabot a Paskowa, nag-iyan si Jesus sadto Betania, sa baluy ni Lazaro na binoway niya otro. ² Nag-anda sira sadto sa panggab'iyan para ki Jesus, sagkud kaiba niyang nagkaun si Lazaro. Si Marta so nagsirbi kanda. ³ Pangala kinoko ni Maria so usad na bote sa mamalun na paamot na porong nardo sagkud ibinobo sadto tiil ni Jesus. Pangala pinayran niya adi ko bowok niya. Napono sa amot so interong kabaluyan. ⁴ Usad sa manga disipolo ni Jesus, si Judas Iscariote na amo a migtraydor kanya, sinnabi, ⁵ ?Ngata ta diri na sana ipinabakal a paamot na an sa kantidad sa tresentos na kwartang plata, sagkud itinao sa manga pobre so kabaklan?? ⁶ Sinabi niya adi bukung sa agko iya pagmakulug sadto manga pobre kindi holi ta usad iyang mataban. Iya nagkakaput ka pondo nira, kaya pirmi niya ading iniikitan.

⁷ Alagad sinnabi si Jesus, ?Pabayaan mo iya! Ibinobo niya adi sa awak ko bilang pag-aandam sa paglubung kanaku. ⁸ A pobre pirmi ninyong nakaiiba, alagad ako diri ninyo makaiiba sa ngamin na panawon.?

So Planong Pagguraan ki Lazaro

⁹ Nabaretaan ko dakul na manga Judio na si Jesus sadto Betania kaya inniyan sira, buku sanang holi ki Jesus, kindi tanganing mabayad si Lazaro na binoway niya otro. ¹⁰ Kaya plinano man ko namomoon ko manga padi na ipaguraan si Lazaro, ¹¹ ta holi kanya dakul na manga Judio a sinnosoway kanda sagkud nagtobod ki Jesus.

So Mapangganang Pagluug ni Jesus sa Jerusalem

(Mt. 21:1-11; Mk. 11:1-11; Lk. 19:28-40)

¹² Kinaudmaan, nabaretaan ko manga tawong inniyan sadto piyesta na omiiyan si Jesus sadto Jerusalem. ¹³ Kaya kinnoko sira sa manga sanga sa palma sagkud linnowas tanganing sabatun si Jesus. Sa makusug na boses sinnabi sira, ?Omawun a Diyos! Paladan a innaabot sa ngaran ka Kagorangnan! Omawun a Hadi ka Israel!? ¹⁴ Nabayad ni Jesus so ogbon na asno sagkud linonadan niya adi, arug sa nasosorat,

¹⁵ ?Diri kamo makatakot, manga tagaZion!

Nag-iiratung na a kaninyong Hadi,

na nakalonad sa usad na ogbon na asno.?

¹⁶ A manga bagay na adi diri naintindiyan ko manga disipolo niya kadto. Alagad ko matapos na maboway otro si Jesus sagkud binnalik sadto langit, narumruman nira na so ngamin na adto nasa Kasoratan manungud kanya, kaya arug kadto so nangyari.

¹⁷ Ipinamareta man ko manga tawong kaiba ni Jesus so ginibo niyang pagboway otro ki Lazaro. ¹⁸ Kaya dakul so sinnabat ki Jesus holi ta nabaretaan nira so milagrong ginibo niya. ¹⁹ Pangala sinnabi so manga Pariseo sa kada usad, ?Silngan ninyo, sinnosonod na kanya a ngamin na tawo sagkud uda na kita magiginibo!?

Inanap si Jesus ko Nagkapirang Griego

²⁰ Agko man nagkapirang Griegong inniyan sadto Jerusalem tanganing magsamba ko piyesta. ²¹ Rinnapo sira ki Felipe na tagaBetsaida sa Galilea, pangala nakiosip kanya, ?Manoy, gosto tabi namung mabayad si Jesus.? ²² Iniyanan ni Felipe si Andres sagkud magkaiba sirang nagrapo ki Jesus sagkud ipinaisi a kamawutan nira.

²³ Sinabi ni Jesus kanda, ?Innabot na a oras tanganing pamorawayan akong Igin sa Tawo. ²⁴ Sinasabi ko kaninyo a kamatoranan, kin a usad na binni sa trigo diri maolog sa raga sagkud malupa, migpadagos ading usad. Alagad kin an malupa, migbonga yan sa dakul. ²⁵ A tawong nagpapaalaga ka kanyang boway, mauudaan kadi, alagad a diri nagpapaalaga ka kanyang boway sa kinaban na adi alang-alang kanaku, migkaagko ka boway na uda kasagkuran. ²⁶ A siisay man na gostong magsirbi kanaku kaipowan na somonod kanaku, tanganing a mamandaan ko makaiiba ko dawa ako sari. Sagkud a kanakung Ama tatawan sa onra a siisay man na nagsisirbi kanaku.?

Sinabi ni Jesus a Pagkagraan Niya

²⁷ Pangala, sinnabi pa si Jesus, ?Napoporisaw a poso ko ngowan. Masabi ko raw, ?Ama, diri mo po itogot na omabot kanaku a oras na adi? ? Diri! Ta amo adi a rason kin ngata ako napaiyan sadi. ²⁸ Ama, ipabayad mo a kanimong kamorawayan!?

Pangala agko boses na galin sa langit na sinnabi, ?Pinamorawayan ko na adi, sagkud pamomorawayan ko otro.?

²⁹ Narungug adto ko manga tawong isadto kaya sinabi nira, ?Nagdaguldul!? Alagad sinabi man ko iba, ?Kinaosip iya sa usad na anghel.?

³⁰ Sinabi ni Jesus kanda, ?A boses na adi ipinarungug bukung para kanaku kindi para sa kapakanan ninyo. ³¹ Ngowan na a panawon na oosgaran a kinaban na adi, ngowan man a panawon na dadaugun sagkud palalayasun si Satanas na namomoon ka kinaban na adi. ³² Sagkud kin ako maitaas na, irarapo ko a ngamin na tawo kanaku.?

³³ Sinabi niya adi tanganing ipaayag kin paono iya migraan.

³⁴ Sinnimbag so manga tawo kanya, ?A kanatung Layi nagsasabi kanatu na a Paraligtas maboboway anggan pa man. Ngata ta sinasabi mo na kaipowan itaas a Igin sa Tawo? Siisay a Igin sa Tawo??

³⁵ Sinnimbag si Jesus, ?Gatikot na panawon na sanang makaiiba ninyo a solo. Kaya mamoway kamo sa liwanag mantang kaiba pa ninyo a solo, tanganing diri kamo aboton sa ngitngit. Ta diri isi ka nagaagi sa mangitngit kin sari iya paiyan. ³⁶ Magtobod kamo sa solo, mantang kaiba pa ninyo iya, tanganing magin igin kamo ka solo.?

Diri Nagtobod so manga Judio ki Jesus

Pagkatapos na sabiyun adi ni Jesus, ginnalin na iya sagkud diri na nagpabayad otro kanda. ³⁷ Dawa ngani naggibo na iya sa dakul na ngangalasan, diri pa nanggayud na sira nagtobod kanya. ³⁸ Nangyari adi tanganing maotob so sinabi ni Propeta Isaias,

?Kagorangnan, siisay so nagtobod ko ibinareta namu?

Kiisay ipinabayad ka Kagorangnan a kanyang kapangyariyan??

³⁹ Diri sira makatobod ta arug ko sinabi ni Propeta Isaias,

⁴⁰ ?Binota sira ka Diyos

sagkud sinarado a kandang manga isip,

tanganing diri makabayad a kandang manga mata,

sagkud diri makaintindi a kandang manga isip,

sagkud diri sira bomabalik kanaku, sabi ka Diyos,

tanganing parayun ko sira.?

⁴¹ Sinabi adi ni Isaias holi ta nabayad niya a kamorawayan ni Jesus, sagkud nagpaayag iya manungud kanya.

⁴² Dawa ngani dakul na manga namomoon kanda so nagtobod ki Jesus diri nira adi ipinaisi ta nakatatakot sira ko manga Pariseo, sagkud abu nirang mapagalin sadto sinagoga. ⁴³ Ta mas gosto pa nira a pag-omaw ka tawo kisa ka Diyos.

A Oosipun ni Jesus amo Mig-osgar

⁴⁴ Sinnabi si Jesus sa makusug na boses, ?A siisay man na nagtotobod kanaku, nagtotobod buku sana kanaku kindi pati sadto nagmanda kanaku. ⁴⁵ Sagkud a nakabayad kanaku, nakabayad naman ka nagmanda kanaku. ⁴⁶ Inniyan ako bilang solo ka kinaban, tanganing a siisay man na magtobod kanaku diri magpadagos sa kangitngitan. ⁴⁷ A siisay man na nakarungug ka manga itinottoro ko alagad abung somonod kadi, diri ko oosgaran. Ta diri ako napaiyan sadi tanganing osgaran a kinaban kindi tanganing iligtas adi. ⁴⁸ Agko ibang mig-osgar ka abung omako kanaku sagkud ka itinotottoro ko. A manga oosipun na itinotottoro ko a mig-osgar kanda sa oring alduw. ⁴⁹ Holi ta a manga itinotottoro ko bukung galin sa sadiri ko sana kindi galin sa Ama na nagmanda kanaku. Iya a nagmamanda kin ono a kanakung sasabiyun. ⁵⁰ Isi ko na a kanyang manga kamandaan nagtatao sa boway na uda kasagkuran. Kaya kin ono a ipinasasabi ka Ama, amo man a sinasabi ko kanda.?