8
So Babaying Narakup na Nagpapasambay
1 Alagad si Jesus inniyan sadto Bokid ko manga Olibo.
2 Kinaramragan, mantang amay pa binnalik otro si Jesus sadto Templo. Dakul na tawo so rinnapo kanya, kaya innula iya sagkud nagpoon ng magtottoro. 3 So manga paratottoro sa Layi sagkud manga Pariseo innabot na agko kaibang usad na babaying narakup na nagpapasambay. Pinatindug adi sadto atobangan ko manga tawo, 4 sagkud sinnabi sira ki Jesus, ?Maestro, a babaying adi narakup na nagpapasambay. 5 Sigon sa Layi ni Moises, a manga babaying arug niya kaipowan na batowon anggan sa magraan. Ono masasabi mo manungud kadi?? 6 Inonga nira si Jesus, tanganing porbaran iya sagkud agko sira ikasawut kontra kanya.
Alagad innokrong sana si Jesus sagkud nagsorat sadto raga sa paagi ko moro niya. 7 Alagad padagos sira sa pag-onga kaya tinnindug si Jesus sagkud sinnabi, ?A siisay man kaninyo na uda kasalan amo onang bomato kanya.? 8 Pangala tinnungkaw iya sagkud nagsorat sadto raga.
9 Ko marungug nira adto, usad-usad sirang ginnalin, poon sa pinakagorang, anggan na si Jesus na sana so natuda, kaiba so babaying nakatindug pananggayud na sadto. 10 Tinnindug si Jesus sagkud inonga iya, ?Sari na sira? Uda kanimo nag-osgar??
11 Sinnimbag so babayi, ?Uda po, Maestro.?
Sinabi ni Jesus kanya, ?Dawa ako, diri ta man ika oosgaran. Omagi na ika, alagad diri na ika magkasala otro.?
Si Jesus a Solo ka Kinaban
12 Nag-osip otro si Jesus kanda sagkud sinnabi, ?Ako a solo ka kinaban. A siisay man na magsonod kanaku diri na mimoway sa kangitngitan, kindi migkaagko ka solo na nagtatao sa boway.?
13 Ko marungug adi ko manga Pariseo sinnabi sira, ?Ika man sana a nagsasabi kan manungud ka sadiri mo, kaya bukung kapanipaniwala a manga patonay mo.?
14 Sinnimbag si Jesus, ?Dawa nagpapatonay ako manungud ka sadiri ko, matood man a sinasabi ko, ta isi ko kin sari ako galin sagkud kin sari man ako paiiyan. Alagad diri ninyo isi kin sari ako galin sagkud sari ako paiiyan. 15 Nag-oosgar kamo oyon ka pag-osgar sa tawo, alagad diri ako nag-oosgar sa kiisay man. 16 Kin mig-osgar man ako, a pag-osgar ko tama, ta buku sana ako a mig-osgar. Kaiba ko a Amang nagmanda kanaku. 17 Bukung nasosorat sa Layi ninyo na kin a darwang testigo nagkaoyon, kaipowan ading akoon? 18 Nagpapatonay ako manungud ka sadiri ko, sagkud a Amang nagmanda kanaku a nagpapatonay man manungud kanaku.?
19 Pangala nag-onga sira, ?Isari a kanimong Ama??
Sinnimbag si Jesus, ?Diri ninyo ako bisto magin a kanakung Ama. Ta kin bisto ninyo ako mabibisto man kintana ninyo a kanakung Ama.? 20 A manga adi sinabi ni Jesus ko nagtotottoro iya sadto templo, arani sadto butangan sa atang. Alagad uda nagkusug buut na romakup kanya holi ta diri pa innaabot a oras niya.
21 Nagngabil otro si Jesus kanda, ?Gomagalin ako, sagkud aanapun ninyo ako, alagad diri kamo makaiiyan sa pig-iyanan ko. Migraan kamo na diri pa napapatawad a manga kasalan ninyo.?
22 Kaya sinnabi so manga Judio, ?Sinabi niya na diri kita makaiiyan sa paiiyanan niya. Buut sabiyun niya kadi guguranun niya a sadiri niya??
23 Sinnimbag si Jesus kanda, ? sadi kamo ibaba, alagad ako taga itaas. Taga sadi kamo kinaban na adi, alagad ako bukung taga kinaban. 24 Kaya sinasabi kong migraan kamo na diri pa napapatawad a manga kasalan ninyo, kin diri kamo magtobod na talagang, ?Ako amo Ako.? ?
25 Nag-onga sira, ?Siisay talaga ika??
Sinnimbag si Jesus, ?Mauban ko ng sinabi kaninyo kin siisay ako. 26 Kadakul kong masasabi sagkud ioosgar manungud kaninyo. Alagad matood a sinasabi ka nagmanda kanaku, sagkud a narurungug ko kanya amo a ipinapaayag ko sa kinaban.?
27 Diri nira naintindiyan na a Ama a sinasabi niya. 28 Kaya sinnabi si Jesus, ?Kin itinaas na ninyo akong Igin sa Tawo, maiisiyan ninyo na ?Ako amo ako.? Sagkud maiisiyan man ninyo na uda ako ginigibo sa sadiri kong kapangyariyan, alagad sinasabi ko sana kin ono a sinabi kanaku ka Ama. 29 Pirmi kong kaiba a nagmanda kanaku, sagkud diri niya ako pinababayaan, holi ta padagos kong ginigibo a manga bagay na ikaoogma niya.? 30 Dakul na manga nakarungug ki Jesus ko sabiyun niya a manga bagay na adi so tinnobod.
A Kamatoranan a Migpalibre Kaninyo
31 Sinabi ni Jesus sadto manga Judiong nagtobod kanya, ?Kin padagos kamong komoyog ka manga katottoroan ko, matood na manga disipolo ko kamo. 32 Sagkud maiisiyan ninyo kin ono a kamatoranan galin sa Diyos. Sagkud a kamatoranan na adi a migpalibre sa nag-ooripun kaninyo.?
33 Sinnimbag sira kanya, ?Erensiya kami ni Abraham, sagkud dawa kono diri kami nagin oripun sa kiisay man. Paono mo masasabing palilibriyun kami??
34 Sinnimbag si Jesus, ?Sa matood sana, a siisay man na nagkakasala oripun ka kasalan. 35 A oripun diri nagpapadagos na kaiba sa usad na pamilya anggan pa man, alagad a igin nagpapadagos anggan pa man. 36 Kaya kin palibriyun kamo ka Igin, matood na magigin libre na kamo. 37 Isi kong galin kamo sa erensiya ni Abraham, alagad minawut ninyong guranun ako holi ta uda logar sa poso ninyo a manga oosipun ko. 38 Sinasabi ko kaninyo a manga bagay na nabayad ko sa kanakung Ama, alagad ginigibo man ninyo a naturan ninyo sa kaninyong ama.?
39 Sinnimbag sira kanya, ?Si Abraham a kanamung ama.?
Sinnimbag si Jesus, ?Kin matood na kamo manga igin ni Abraham, inaarug kintana ninyo so manga maraay niyang gibo. 40 Alagad gosto ninyong guranun ako, ta sinasabi ko a manga kamatoranan na narungug ko galin sa Diyos. Diri ginnibo si Abraham ka arug ka ginigibo ninyo. 41 A manga ginigibo ninyo pareyo ka ginibo ka kaninyong ama.?
Sinnimbag sira ki Jesus, ?A Diyos sana a kanamung Ama. Sagkud kami a manga matood niyang igin.? 42 Sinnabi si Jesus kanda, ?Kin a Diyos a kaninyong Ama, mabubutan ninyo ako, ta galin ako sa Diyos. Diri ako inniyan sadi sa sadiri kong kabutan, iminanda niya ako. 43 Ngata ta diri ninyo maintindiyan a manga sinasabi ko? Holi ta abu ninyong akoon a manga itinotottoro ko. 44 Manga igin kamo ka kaninyong amang si Satanas. Sagkud kin ono a gosto niya, amo a ginigibo ninyo. Paraguraan iya poon pa sa kapinonan, sagkud abu niya sa kamatoranan holi ta uda kamatoranan san kanya. Ogali na niya pagbobotig ta botigun iya, sagkud iya a pinaggagalinan ka kabotigan. 45 Alagad a manga sinasabi ko kaninyo kamatoranan, sagkud holi kadi abu ninyong mamatood. 46 Siisay kaninyo a makapagsabi na nakagibo ako sa kasalan? Matood a manga sinasabi ko kaninyo. Ngata ta abu ninyo akong paniwalaan? 47 A manga igin sa Diyos, nag-iirungug ka manga oosipun ka Diyos. Alagad buku kamong manga igin sa Diyos kaya diri kamo nag-iirungug.?
Si Jesus sagkud si Abraham
48 Inonga nira si Jesus, ?Bukung tama a sinabi namung usad ikang Samaritano sagkud sinasaniban sa demonyo??
49 Sinnimbag si Jesus, ?Diri ako sinasaniban sa demonyo. Inoomaw ko sana a kanakung Ama, alagad pinagbabasangbasang ninyo ako. 50 Diri ako nagmamawut ka sadiri kong kaomawan. A Ama a nagmamawut na omawun ako ka manga tawo, sagkud iya a makapag-osgar na tama a sinasabi ko. 51 Sinasabi ko kaninyo a kamatoranan, a siisay man na nagkokoyog ka kanakung itinotottoro diri migraan.?
52 Sinnimbag so manga Judio, ?Ngowan, isi na namung sinasaniban talaga ika sa demonyo! Si Abraham nagraan, amo man so manga propeta, alagad sinasabi mo na diri migraan a siisay man na magsonod ka itinotottoro mo. 53 Mas orog pa palan ika kisa ka kanamung amang si Abraham? Nagraan iya, amo man so manga propeta. Ono pag-una mo ka sadiri mo??
54 Sinnimbag si Jesus, ?Kin ako sana a mig-omaw ka sadiri ko, uda adi pakinabang. Alagad a Ama, na sinasabi ninyong Diyos ninyo amo a mig-omaw kanaku. 55 Diri ninyo iya bisto, alagad bistado ko iya. Kin sasabiyun kong diri ko iya bisto, magigin botigun man ako arug ninyo. Alagad bistado ko talaga iya sagkud kinokoyog ko a manga oosipun niya. 56 Naogma a kaninyong amang si Abraham ko maisiyan niyang mababayad niya a alduw ka pag-abot ko. Nabayad ngani niya adi, sagkud namuya iya.?
57 Holi kadi sinabiyan iya ko manga Judio, ?Uda pa ngani singkwenta a edad mo, pangala sinasabi mong nabayad mo na si Abraham??
58 ?Sinasabi ko kaninyo a kamatoranan, bago pa ipangigin si Abraham, ?Ako, amo na.? ?
59 Holi kadi pinnorot sa manga bato so manga tawo tanganing batowon iya, alagad nagtago si Jesus sagkud naggalin na sadto Templo.