7
Si Jesus sagkud so manga Ngod Niya
1 Pagkatapos kadi, linibot ni Jesus so Galilea. Abu niyang omagi sadto Judea, ta gosto iyang guranun ko manga namomoon ko manga Judio sadto. 2 Arani na kadto so Piyesta ka manga Tolda, usad sa manga piyesta ka manga Judio, 3 kaya sinnabi so manga ngod ni Jesus kanya, ?Maggalin na ika sa logar na adi sagkud omiyan sa Judea, tanganing mabayad ka manga parasonod mo a manga ginigibo mo. 4 Ta uda tawong itinatago a ginigibo niya kin gosto niyang mabisto. Naggigibo man sana ika sa milagro, ipabayad mo na sa bilog na kinaban!? 5 Ta magin so manga ngod ni Jesus diri kanya nagtotobod.
6 Kaya sinabi ni Jesus kanda, ?Buku pa adi a panawon ko. Para kaninyo pwede dawa onong oras. 7 Diri kamo ikauungut ka kinaban, alagad ako ikauungut nira, ta ipinapaayag ko a karatan nira. 8 Kamo na sana a mag-iyan sa piyesta. Diri ako mig-iyan ta buku pa adi a panawon ko.? 9 Sinabi niya adi sagkud nagpatagak iya sa Galilea.
Inniyan si Jesus sadto Piyesta ko manga Tolda
10 Pagkagalin ko manga ngod ni Jesus paiyan sadto piyesta, inniyan man iya, alagad ilum sana. 11 Inanap iya sadto ko manga namomoon ko manga Judio, ?Sari raw iya?? onga nira.
12 Iya a pigparaosip-osipan ko manga tawo sadto. So iba sinnabi, ?Maraay man a tawong an.? Alagad so iba man sinnabi, ?Buku, dinadaya sana niya a manga tawo.? 13 Alagad uda kanda nagkusug buut na mag-osip sa ayagan manungud kanya, ta nakatatakot sira ko manga namomoon kanda.
14 Ko kabangaan na ko piyesta, linnuug si Jesus sadto Templo sagkud nagtottoro. 15 Napangalas so manga namomoon kanda sagkud sinnabi, ?Paono niya naisiyan a manga bagay na adi, mantang diri man iya nakapag-eskwela?? 16 Sinnimbag si Jesus, ?A manga itinotottoro ko bukung galin kanaku, kindi sa nagmanda kanaku. 17 Maiisiyan ka siisay man na gostong somonod ka kabutan ka Diyos kin a itinotottoro ko galin sa Diyos, o sa sadiri ko sana. 18 A siisay man na nagtotottoro galin sa sadiri niyang kadonongan nagmamawut sanang omawun iya. Alagad a nagmamawut na omawun a nagmanda kanya, maimbod sagkud bukung botigun. 19 Bukung itinao kaninyo ni Moises a Layi? Alagad uda ni usad kaninyo a kinnokoyog kadi. Ta kin kinokoyog ninyo a Layi, ngata ta gosto ninyo akong guranun??
20 Sinnimbag so manga tawo, ?Sinasaniban na ika sa demonyo! Siisay man a gostong gomuraan kanimo??
21 Sinabi ni Jesus kanda, ?Usad pa sanang bagay a ginibo ko, alagad napangalas na kamo ngamin. 22 Bukung itinao kaninyo ni Moises a kamandaan manungud sa pagtori? (Kin sabagay, diri man talaga adi nagpoon ki Moises kindi sa manga naona pang manga ginikanan.) Holi kadi tinotori ninyo a manga igin dawa Alduw ka Pagpapaingalo. 23 Ngowan, kin a usad na igin na lalaki pwedeng toriun sa Alduw ka Pagpapaingalo tanganing diri mabalgar a kamandaan ni Moises, ngata kamo ta nauungut kanaku, holi ta pinaraay ko a usad na tawo sa Alduw ka Pagpapaingalo? 24 Diri kamo mag-osgar oyon sana sa nababayad ninyo, kindi omosgar kamo oyon sa kin ono a tama.?
Iya na kaya a Cristo?
25 Sinnabi so nagkapirang taga Jerusalem, ?Bukung amo adi so tawong gosto nirang guranun? 26 Alagad silngan ninyo, ayagan na iyang nagtotottoro sagkud uda sinasabi a manga namomoon manungud kadi. Baka binibisto na nira na iya a Cristo. 27 Alagad isi ta kin sari iya galin, mantang a Cristong omaabot uda nakaiisi kin sari iya galin.?
28 Mantang nagtotottoro si Jesus sadto luug ko Templo, sinnabi iya sa makusug na boses, ?Bistado na raw talaga ninyo ako sagkud kin sari ako galin? Sa matood sana, diri ako sadi inniyan sa sadiri kong kagostowan. A matood na Diyos a nagmanda kanaku, alagad diri ninyo iya bistado. 29 Alagad bistado ko iya, ta galin ako kanya, sagkud iya a nagmanda kanaku.?
30 Pinorbaran nirang rakupun iya, alagad uda nagkusug buut na rakupun iya, ta diri pa innaabot so oras niya. 31 Alagad dakul sadto manga tawo so nagtobod kanya sagkud sinnabi, ?Sa pag-abot kaya ni Cristo, makagibo raw iya sa dakul na milagro na mas orog kisa ka ginigibo ka lalaking adi??
Ipinarakup si Jesus ko manga Pariseo
32 Narungug ko manga Pariseo so manga orosipan ko manga tawo manungud ki Jesus. Kaya, sira sagkud so namomoon ko manga padi, nagmanda sa manga bantay sadto templo tanganing rakupun si Jesus. 33 Alagad sinabi ni Jesus kanda, ?Gatikot na panawon na sana ninyo akong makaiiba, sagkud pagkatapos kadi bomabalik na ako sadto nagmanda kanaku. 34 Aanapun ninyo ako, alagad diri ninyo ako matotorakan, ta diri kamo makaiiyan sa paiiyanan ko.? 35 Nangag-osip-osip so manga namomoon ka manga Judio, ?Sari raw omiiyan a tawong adi, sagkud diri ta iya mababayad? Omiiyan kaya iya sa manga Judio sa Grecia tanganing magtottoro sa manga Griego? 36 Ngata ta sinabi niyang, ?Aanapun ninyo ako alagad diri ninyo ako matotorakan, ta diri kamo makaiiyan sa paiiyanan ko? ??
A Bokal na Nagtatao sa Boway
37 Ko omabot na so kataposan sagkud pinakaimportanteng alduw ko piyesta, tinnindug si Jesus sagkud makusug na sinabi, ?A siisay man na napapaa romapo kanaku sagkud ominom. 38 Ta sinasabi sa Kasoratan, ?Migbolos a tobig na nagtatao sa boway galin sa poso ka manga nagtotobod.? ? 39 A tobig na sinasabi ni Jesus amo a Espirito Santo na madali ng akoon ka manga nagtotobod kanya. Diri pa naitatao a Espirito ko panawon na adto ta diri pa nagtataas sa langit si Jesus.
Pagkabangabanga ko manga Tawo
40 Dakul na tawo so nakarungug ko sinabing adto ni Jesus, sagkud sinnabi so nagkapira kanda, ?Iya na talaga a Propetang inuulat ta!? 41 So iba man sinnabi, ?Iya talaga a Cristo!? Alagad agko man sinnabing, ?Bukung iya a Cristo, ta diri pwedeng galin sa Galilea a Cristo. 42 Bukung sinabi sa Kasoratan na a Cristo galin sa erensiya ni Hading David, sagkud mamumundag sa Betlehem na banwaan ni David?? 43 Kaya manlainlain so manga paniniwala ko manga tawo manungud ki Jesus. 44 Gosto iyang rakupun ko iba, alagad uda man nagkusug buut na gibowon adi.
Diri Pagtobod ko manga Namomoon sa manga Judio
45 Binnalik so manga bantay ko templo sadto manga namomoon ko manga padi sagkud manga Pariseo na nagmanda kanda. Inonga nira so manga bantay, ?Ngata ta diri ninyo iya dinara sadi??
46 Sinnimbag sira, ?Uda pa po kami narungug na nag-oosip sa arug kanya!?
47 Sinnabi so manga Pariseo, ?Kin arug kan pati kamo naloko man ka tawong an? 48 Agko na kamo nabayad na manga namomoon o manga Pariseo na nagtobod kanya? 49 Uda! Manga tawo sanang uda pagkaintindi ka Layi a nagtotobod kanya. Kaya sinompa sira ka Diyos!?
50 Usad sa manga Pariseo na isadto si Nicodemo, na minsan na binnisita ki Jesus. Sinnabi iya sa manga kaibaan niya. 51 ?Bukung sala sa kanatung Layi na osgaran a usad na tawo anggan na diri ta pa iniirungug sagkud iniisi kin ono a ginibo niya??
52 Sinnimbag sira, ?Taga Galilea man ika? Pag-adalan mo a manga Kasoratan ta mababayad mo na uda propetang gomagalin sa Galilea.?
53 Pagkatapos kadi napaoli na so kada usad sadto baluy nira.