9
Pinaraay ni Jesus so Botang Lalaki
1 Mantang nag-aagi si Jesus, agko iya nabayad na usad na lalaki na ipinangigin na bota. 2 Inonga si Jesus ko manga disipolo niya, ?Maestro, siisay po a nagkasala ta ipinangigin iyang bota? Iya po o a manga kag-igin niya??
3 Sinnimbag si Jesus, ?Botang ipinangigin a lalaking adi bukung holi sa nagkasala iya o so kag-igin niya, kindi tanganing maayag a kapangyariyan ka Diyos. 4 Mantang alduw pa kaipowan tang gibowon a ipinagigibo ka nagmanda kanaku. Ta kin omabot na gab'i uda na magiginibo. 5 Mantang sadi ako kinaban na adi, ako a solo na nagtatao sa liwanag sa manga tawo.?
6 Pagkasabi niya kadi, linnoda si Jesus sadto raga sagkud ginnibo sa lamod, sagkud ilinayid sadto mata ko bota, 7 sagkud sinnabi, ?Omiyan ika sadto parigosan sa Siloe sagkud maglabar ika sadto.? (A buut sabiyun ka Siloe ?Iminanda?.) Inniyan sadto so bota sagkud naglabar, ko pagbalik niya nakababayad na iya.
8 So manga kaabay niya sa baluy sagkud so manga nakabayad kanya kadto na nakikilimos nag-inongaan, ?Bukung iya so bota na dating nakikilimos??
9 So iba sinnabing, ?Iya talaga.? Alagad so iba sinnabi man, ?Buku, kalalawgun sana niya adto.?
Kaya so lalaki na mismo so sinnimbag, ?Ako talaga adto.?
10 Kaya inonga nira iya, ?Paono ika nakabayad??
11 Sinnimbag iya, ?So lalaking binabaoy na Jesus, ginnibo sa lamod sagkud ilinayid sadi mata ko sagkud sinnabi, ?Omiyan ika sadto parigosan ka Siloe sagkud manramos.? Kaya inniyan man ako sadto sagkud nanramos pangala nakabayad na ako.?
12 Nag-onga so manga tawo, ?Sari na iya??
Sinnimbag so lalaki, ?Diri ko na tabi isi.?
Inimbestigaran ko manga Pariseo so Pagparaay ni Jesus
13 Pangala dinara nira sadto manga Pariseo so dating bota. 14 Alduw sa Pagpapaingalo kadto ko gomibo si Jesus sa lamod sagkud pinaraay so bota. 15 Kaya inonga man iya ko manga Pariseo kin paonong nakababayad na iya, sagkud sinabi ko lalaki, ?Binutangan niya sa lamod a mata ko. Pangala nanramos ako, kaya nakabayad na ako.? 16 Sinnabi so ibang manga Pariseo, ?Bukung galin sa Diyos a naggigibo kadi, holi ta diri niya kinokoyog a kamandaan manungud sa Alduw ka Pagpapaingalo.?
Alagad so iba man sinnabi, ?Paonong makagigibo sa milagrong arug kadi a usad na parakasala?? Sira mismo diri nagkauusad.
17 Kaya inonga otro ko manga Pariseo so dating bota, ?Ono masasabi mo manungud kanya??
Sinnimbag so lalaki, ?Usad po iyang propeta.?
18 Alagad abu pa nanggayud ng magtobod ko manga namomoon ko manga Judio na iya talaga so dating bota na ngowan nakababayad na. Kaya ipinabaoy nira so manga kag-igin ko lalaking bota 19 sagkud inonga, ?Amo adi so igin ninyo na sinasabi ninyong ipinangigin na bota? Ngata ta nakababayad na iya ngowan??
20 Sinnimbag so manga kag-igin niya, ?Isi tabi namu na iya a kanamung igin, sagkud ipinangigin iyang bota. 21 Alagad diri namu isi kin ngata ta nakababayad na iya ngowan, o kin siisay a nagpaboklat ka mata niya. Iya a ongaun ninyo. Nasa tamang edad na iya sagkud tattao na iyang somimbag para sa sadiri niya.? 22 Amo adi so sinabi ko kag-igin niya holi ta nakatakot sira sadto manga Judio. Holi ta pinagkasondoan na ko manga namomoon kanda na a siisay man na magtobod ki Jesus bilang Cristo diri aakoon sa kandang sinagoga. 23 Kaya ngani amo adi isinimbag ko manga kag-igin niya, ?Nasa tamang edad na iya. Iya na sana tabi a ongaun ninyo.?
24 Kaya ipinabaoy nira otro so dating bota sagkud sinabi kanya, ?Somompa ika sa atobangan ka Diyos na sasabiyun mo a matood! Isi namu na a tawong adi na nagparaay kanimo parakasala.?
25 Sinnimbag iya, ?Diri ko tabi isi kin parakasala iya o buku. Usad sanang bagay a isi ko. Dati bota ako, alagad ngowan nakababayad na.?
26 Inonga nira so lalaki, ?Ono ginibo niya kanimo? Paono niya napaboklat a mata mo??
27 Sinnimbag iya, ?Sinabi ko na kaninyo, alagad abu ninyong mag-irungug. Ngata ta gosto ninyong marungug otro a simbag ko? Gosto man tabi ninyong magin parasonod niya??
28 Minoda iya nira sagkud sinabiyan, ?Ika a parasonod niya, alagad kami manga parasonod ni Moises! 29 Isi namu na a Diyos nangosip ki Moises, alagad a tawong an diri namu isi kin sari galin.?
30 Sinnimbag so lalaki, ?Amo po ngani an a makangangalas! Diri ninyo isi kin sari iya galin, alagad napaboklat niya a manga mata ko. 31 Isi ta na diri iniirungug ka Diyos a manga parakasala. Alagad a siisay man na agko pagkatakot sa Diyos sagkud naggigibo ka kabutan niya iniirungug niya. 32 Poon pa kadto uda pa kita narungug na nakapagparaay ka tawong ipinangigin na bota. 33 Kin bukung galin sa Diyos a tawong adi, uda iya magiginibo.?
34 Sinnimbag so manga namomoon, ?Ipinangigin ikang makasalan, ngowan gosto mo kaming tottoroan!? Kaya isinikwal iya nira sadto sinagoga.
A Pagkabotang Espiritwal
35 Narungug ni Jesus na isinikwal so dating bota sadto sinagoga. Kaya inanap niya so lalaki. Sagkud ko matorakan niya adi, inonga niya, ?Nagtotobod ika ka Igin sa Tawo??
36 Sinnimbag so lalaki, ?Siisay po iya, Maestro? Sabiyun mo po kanaku tanganing magtobod ako kanya.?
37 Sinnabi si Jesus kanya, ?Nabayad mo na iya, sagkud iya a kaosip mo ngowan.?
38 Pangala sinnabi so lalaki, ?Kagorangnan, nagtotobod ako kanimo.? Sagkud tinniklod iya sagkud sinamba si Jesus.
39 Kaya sinnabi pa si Jesus, ?Inniyan ako sadi kinaban tanganing osgaran a manga tawo. A manga tawong bagana bota ta uda pagkaisi ka kamatoranan manungud sa Diyos, makababayad. Sagkud a manga tawong nagsasabing nakababayad sira ta nag-uuna sirang tama a pagtobod nira manungud sa Diyos, diri makababayad.?
40 Narungug adi ko nagkapirang Pariseo sadto arani niya, kaya inonga nira iya, ?Buut mong sabiyun manga bota man kami??
41 Sinnimbag si Jesus, ?Kin inaamin ninyong manga bota kamo sa kamatoranan uda kintana kamo kasalan. Alagad holi sa sinasabi ninyong buku kamong bota, agko pa nanggayud na kamo kasalan.?