12
So Makangangalas na Paglowas ni Pedro sadto Prisowan
1 Ko panawon na adto pinonan ni Hading Herodes na padipisilan so nagkapirang miyembro sadto simbaan. 2 Pinapogotan niya si Santiagong ngod ni Juan. 3 Ko mabayad niyang ikinaogma adto ko manga Judio, ipinarakup man niya si Pedro. Nangyari adto ko Piyesta sa Tinapay na Uda Lebadora. 4 Pagkatapos iyang rakupun, ilinuug iya sadto prisowan sagkud pinabantayan sa upat na gropo na tig-uupat na soldados. Plano ni Herodes na iatobang iya sadto manga tawo pagkatapos ka Piyesta.
5 Kaya nagtiner si Pedro sadto prisowan, mantang so manga kaiba sadto simbaan maigut na nangangadyi sa Diyos para kanya.
6 Ko gab-ing bago iya iatobang ni Herodes sa manga tawo, natorog si Pedro sadto pag-ultanan ko darwang soldados, nagagapos sa darwang kadena, sagkud nababantayan pa sa gwardiyang nakatindug sadto pwertaan. 7 Biglang nagpabayad so anghel ka Kagorangnan sagkud linniwanag sadto luug ko prisowan. Tinalpi ko anghel si Pedro sa iris tanganing magisung sagkud sinnabi, ?Bangon na, dali!? Sagkud so kadena natangkas sadto takyag ni Pedro.
8 Pangala sinnabi so anghel kanya, ?Magbado ika sagkud magsandalyas.? Sagkud ginibo man adto ni Pedro, ?Mag-alikbuy ika sagkud somonod kanaku.? 9 Sinnonod si Pedro ko anghel palowas sadto prisowan, diri basang iya nag-uuna na so ginigibo ko anghel matood na nangyayari, pag-una niya nakababayad sana iya sa kapaayagan galin sa Diyos. 10 Linabosan nira so ona sagkud pangarwang gwardiya sagkud nakaabot sadto utak na trangkaan paiyan sadto banwaan. Nagsadiri adtong binnokas para kanda, sagkud linnowas sira. Ko inaagi na nira so kaabaan ko tinampo, bigla iyang binayaan ko anghel.
11 Ko mamangno na ni Pedro so sadiri niya, saka iya sinnabi, ?Ngowan isi ko na, na uda pagdorodarwa na a Kagorangnan nagpadara sa anghel niya tanganing iligtas ako sa kapangyariyan ni Herodes sagkud sa ngamin na minamawut ka manga Judio!?
12 Ko mapag-urup-urup niya adi, inniyan iya sadto baluy ni Maria na ina ni Juan, na binabaoy man na Marcos, kin sari malakadakul ko tawong nagtitipontipon sagkud nangangadyi. 13 Tinnoktok si Pedro sadto trangkaan, sagkud so mamandaan na babaying a ngaran Roda inniyan tanganing boksan. 14 Ko mabisto niya so boses ni Pedro, mala niya kaogmang dinnalagan pabalik na diri man naboksan so pwertaan sagkud pakagrat na sinnabi, ?Si Pedro isan pwertaan!?
15 ?Ono ika, nakakapay?? sabi nira kanya. Alagad ipinagparapipirit niya na si Pedro adto, kaya sinabi nirang, ?So anghel niya adto!?
16 Alagad si Pedro padagos na nagtotoktok, sagkud ko boksan na nira so pwertaan sagkud mabayad iya, nangalas sira. 17 Nagpasabot si Pedro kanda na diri pakaribok sagkud sinabi kanda kin paono iya pinalowas ka Kagorangnan sadto prisowan. Pangala sinnabi iya, ?Sabiyun ninyo ki Santiago sagkud sadto ibang manga kangoran a manungud kadi,? pagkatapos inniyan na iya sa ibang logar.
18 Kinaramragan, nagkariribok so manga soldados manungud sadto nangyari ki Pedro. 19 Pagkatapos na ipaanap ni Herodes si Pedro sagkud diri man nira natorakan, pinaimbistegaran niya so manga gwardiya sagkud sinintensyaan na guranun.
Pangala si Herodes ginnalin sadto Judea paiyan sadto Cesarea sagkud innistar sadto sa gatikot na panawon.
So Pagkagraan ni Herodes
20 Uban ng panawon na malakaungut ni Herodes sadto manga tawo sa Tiro sagkud Sidon, kaya nagkauusad sirang makipagbayadan kanya. Inayat nira so soporta ni Blasto, usad na katiwala ko hadi, tanganing makipag-osay, ta galin sa nasasakupan ko hadi so pagkaun na kandang ikinaboboway.
21 Ko omabot so alduw na itinao ni Herodes, nagsopong iya sa panghading bado, innula sadto trono saka nagdiskorso sadto manga tawo. 22 Kinnagrat sira, ?Boses adi ka diyos, bukung sa tawo!? 23 Kadto tolos, ta si Herodes diri nagtao sa kaomawan sa Diyos, so anghel ka Kagorangnan tinawan iya sa grabing kamatian sagkud kinaun sa olod sagkud nagraan.
24 Mantang so oosipun ka Diyos padagos na kinnusug sagkud linnuyap.
25 Ko matapos na ni Bernabe sagkud si Saulo so trabawo nira binnalik sira sa Jerusalem kaiba si Juan na binabaoy man na Marcos.