11
Inisplikar ni Pedro so manga Ginibo Niya
1 Nabaretaan ko manga apostol sagkud ko manga ngod nira sadto bilog na Judea na so manga bukung Judio innako man ko oosipun ka Diyos. 2 Diri adto naoyonan ko nagkapirang Judio. Kaya ko omiyan si Pedro sadto Jerusalem, sinnabi sira, 3 ?Inniyan ika sadto baluy ko manga bukung Judio sagkud nagkaun pa na kaiba nira!?
4 Kaya pinnoon na si Pedro na mag-isplikar ko ngamin na nangyari, poon pa sa kapinonan. 5 ?Sadto ako syodad ko Jope nangangadyi, nakabayad ako sa kapaayagan galin sa Diyos. Nakabayad ako sa bagana dakulung isapuy na itinotonton sa upat na kanto galin sa langit, sagkud pinnondo sadto atobangan ko. 6 Sinilngan ko saigo sagkud nabayad ko so ngamin na klase sa ayup na nag-aagi sagkud nagkakamang, sagkud manga bayong. 7 Pangala nakarungug ako sa boses na sinnabi kanaku, ?Bowat, Pedro. Bomono ika sagkud komaun.?
8 Sinnimbag ako, ?Abu ako, Kagorangnan! Uda pa basang maati o bukung angay na pagkaun na linnuug sa nganga ko.?
9 So boses na galin sa langit nagngabil sa ikarwang beses, ?Diri mo pagbaoyon na maati a ono man na lininig na ka Diyos.? 10 Nangyari adi tolong beses, sagkud so manga bagay na adto binutung na paitaas sadto langit.
11 Ko oras man sanang adto tolong lalaki galin sa Cesarea so innabot sadto baluy kin sari ako nakaistar. 12 A Espirito sinabiyan ako na diri magdorodarwa na omiba kanda. Ading unum na kangoran inniba man kanaku, sagkud kami ngamin linnuug sadto baluy ni Cornelio. 13 Sinabi niya kanamu kin paono iyang nakabayad sa anghel na nagtitindug sadto luug ko kanyang baluy, na sinnabi, ?Ipakoko mo sa Jope si Simon na binabaoy na Pedro. 14 Dadaraan ika niya sa mensayi na kin sari ika sagkud a kanimong erensiya maliligtas.?
15 Ko pinnopoon na akong magngabil, a Espirito Santo binnaba kanda arug ko pagbaba niya kanatu sa kapinonan. 16 Sagkud narumruman ko so sinabi ka Kagorangnan, ?Si Juan nagbunyag sa tobig, alagad kamo mabubunyagan sa Espirito Santo.? 17 Kaya kin tinawan ka Diyos so manga bukung Judio ka pareyong regalo na itinao kanatu ko tomobod kita ki Jesu Cristo na Kagorangnan, siisay man ako na komokontra sa Diyos??
18 Ko marungug nira adi, pinnondo na sira sa pagtuyaw sagkud pinnoon ng mag-omaw sa Diyos sagkud sinnabi, ?Kin arug kan, tinawan ka Diyos a manga bukung Judio sa oportonidad na magsulsul tanganing makakoko man sira ka boway na uda kasagkuran.?
So Simbaan sa Antiokia
19 So manga paratobod nagkasowaysoway ta pinadidipisilan sira magpoon pa ko guranun si Esteban. Agko nakaabot sa Fenicia, Chipre, sagkud Antiokia, sadto ipinagtottoro nira a Maraay na Bareta, alagad sa manga Judio sana. 20 Alagad nagkapirang manga paratobod na taga Chipre sagkud Cirene so inniyan sadto Antiokia sagkud nagtottoro sadto manga bukung Judio ka Maraay na Bareta manungud sa Kagorangnan na si Jesus. 21 So kapangyariyan ka Kagorangnan sadto kanda, sagkud kadakul na tawo so nagtobod sagkud binnalik sa Kagorangnan.
22 Nabaretaan adi ko simbaan sadto Jerusalem, sagkud ipinadara nira si Bernabe sadto Antiokia. 23 Ko omabot na iya sagkud nabayad na niya so biyaya ka Diyos kanda, naogma iya sagkud sinabiyan sira ngamin na magpadagos na magpakatanos sa Kagorangnan sa bilog nirang poso. 24 Iya maraay na tawo, pospos sa Espirito Santo sagkud pagtobod, sagkud malakadakul na tawo so nadara niya sa Kagorangnan.
25 Sagkud inniyan si Bernabe sadto Tarso tanganing anapun si Saulo; 26 ko masompongan na niya si Saulo, ipinag-iba niya iya sadto Antiokia. Usad na taon sirang nakiusad sa manga paratobod sadto sagkud usad na dakulung gropo so tinotottoroan nira. Sadto Antiokia onang binaoy na Cristiyano so manga paratobod.
27 Ko panawon na adto, agko innabot na manga propeta sa Antiokia galin sa Jerusalem. 28 Usad kanda, a ngaran Agabo, nagpaayag sa kapangyariyan ko Espirito Santo na agko omaabot na dakulung tag-alup sa bilog na kinaban. (Nangyari adi ko kapanawonan ni Emperador Claudio.) 29 Kaya minaraay ko manga disipolo na magpadara sa tabang sadto manga kangoran nira na nakaistar sadto Judea, oyon sa makakaya ko kada usad. 30 Ginibo nira adi, sagkud ipinadara ki Bernabe sagkud Saulo so tabang sadto kagogorangan ko simbaan.