10
Binaoy ni Cornelio si Pedro
1 Sadto Cesarea agko usad na lalaki na a ngaran Cornelio, kapitan iya sa manga soldados na tagaRoma na binabaoy na Italiana. 2 Iya sagkud a kanyang pamilya debotado sagkud agko pagkatakot sa Diyos, pirmi iyang naglilimos sa manga pobreng Judio sagkud nangangadyi oroalduw. 3 Usad na alduw, manga alas tres sa apon agko kapaayagan na ipinabayad kanya a Diyos. Nakabayad iya sa anghel ka Diyos, na inniyan kanya sagkud sinnabi, ?Cornelio!?
4 Tiniurungan iya ni Cornelio na agko pagkatakot, ?Ono tabi an, Among?? onga niya.
Sinnimbag so anghel, ?So manga pangadyi mo narungug ka Diyos sagkud naisiyan niya so manga tabang mo sa manga pobre. 5 Ngowan magmanda ika sa manga taowan mo sadto Jope sagkud sabiyan na darawun kanimo a lalaking a ngaran Simon na binabaoy man na Pedro. 6 Iya nakikidagos ki Simon na parabulad sa anit, na so baluy nasa gilid sa dagat.? 7 Pagkagalin ko anghel, binaoy ni Cornelio so darwa niyang mamandaan sagkud usad na maimbod na soldados na nagsisirbi kanya sagkud agko pagkatakot sa Diyos. 8 Sinabiyan niya sira ko manga nangyari, pagkatapos minandaan sira na paiyan sadto Jope.
Agko Ipinabayad a Diyos ki Pedro
9 Ko somonod na alduw, ko nag-iiratung na sira sadto syodad, tinnaas si Pedro sadto atup sagkud nangadyi. 10 Nag-alup iya sagkud gosto niyang magkaun, mantang so pagkaun inaanda na, agko kapaayagan na ipinabayad kanya a Diyos. 11 Nabayad niyang binnokas so langit sagkud nakabayad iya sa dakulung isapuy na itinotonton na naguguran so upat na kanto. 12 Nakabutang sadto so ngamin na klase sa ayup na nag-aagi, nagkakamang, sagkud manga bayong. 13 Pangala agko boses na sinnabi kanya, ?Bowat, Pedro, magbono ika sagkud magkaun.?
14 ?Abu ako, Kagorangnan!? simbag ni Pedro, ?Ta diri pa basang ako nagkaun sa ono man na maating pagkaun.?
15 So boses narungug niya otro sa ikarwang beses, ?Diri mo pagsabiyun na maati a onoman na lininig na ka Diyos.?
16 Nangyari adi tolong beses sagkud so isapuy binaton tolos palangit.
17 Mantang nag-uurup-urup si Pedro kin ono buut sabiyun ko ipinabayad kanya ka Diyos, so lalaking iminanda ni Cornelio natorakan naman so baluy ni Simon sagkud pinnondo sira sadto trangkaan. 18 Binnaoy sira, sagkud innonga kin si Simon na binabaoy na Pedro sadto nakaistar. 19 Mantang padagos na nag-uurup-urup si Pedro manungud ko nabayad niya, a Espirito ka Diyos sinnabi kanya, ?Simon, tolong lalaki a nag-aanap kanimo. 20 Diri ika magdorodarwang omiba kanda, ta ipinadara ko sira.? 21 Kaya binnowat sagkud binnaba si Pedro sagkud sinnabi sadto manga lalaki, ?Ako a inaanap ninyo. Ono tabi a toyo ninyo?? 22 Sinnabi so manga lalaki, ?Pinaiyan kami sadi ni Kapitan Cornelio. Iya matanos sagkud agko pagkatakot sa Diyos sagkud irinirispeto ka ngamin na Judio. A anghel ka Diyos sinabiyan iya na paiyanun ika sadto baluy nira tanganing marungug niya a sasabiyun mo.? 23 Pangala pinadagos ni Pedro so manga lalaki sagkud sadto na man pinaidya ko gab-ing adto.
Si Pedro sadto Baluy ni Cornelio
Sonod na alduw si Pedro inniba na kanda sagkud inniba man so nagkapirang paratobod na tagaJope. 24 Kinaramragan innabot iya sadto Cesarea. Nag-uulat na si Cornelio sadto baluy niya sagkud so manga erensiya sagkud manga amigo na inimbitaran niya. 25 Ko lomuug na si Pedro sadto baluy, sinabat iya ni Cornelio sagkud dinnapla sadto paniilan niya sa pagsamba kanya. 26 Alagad sinabiyan iya ni Pedro, ?Tomindug ika, ta tawo man ako na arug mo.?
27 Mantang paluug na sira sadto baluy padagos sirang nag-iistorya ni Cornelio. Malakadakul ko tawo sadto, 28 sagkud sinnabi iya kanda, ?Isi ninyong bukung oyon sa layi namu, na a manga Judio makiiba sa manga bukung Judio o bisitawun sira. Alagad ipinabayad kana Diyos na diri kaipowan na pagbaoyon a siisay man na maati o bukung angay na pakiibanan. 29 Kaya ko ipinakoko ninyo ako, inniyan ako na uda ono man na reklamo. Pwede tabing maisiyan kin ngata ta ipinakoko ninyo ako??
30 Sinnimbag si Cornelio, ?Upat na alduw na a nakaagi sadto ako baluy nangangadyi sa arug kading oras, alas tres sa apon. Pagkangumunngumun biglang tinnindug sa atobangan ko so lalaki na nakasopong sa makintab na bado, 31 sagkud sinnabi, ?Cornelio, narungug ka Diyos a kanimong manga pangadyi, narumruman niya so manga tabang mo sa manga pobre sagkud namuy-an niya adto. 32 Ngowan, ipakoko mo sadto Jope si Simon na binabaoy man na Pedro. Iya bisita sa baluy ni Simon na parabulad sa anit, na nakaistar sadto gilid ko dagat.? 33 Kaya pinaiyanan ta ika tolos, sagkud maraay man ta inniyan ika. Ngowan, sadi kami ngamin sa presensiya ka Diyos tanganing mag-irungug ka ngamin na ipinapasabi ka Kagorangnan.?
34 Pangala, si Pedro pinnoon ng mag-osip, ?Ngowan ko napatonayan na matood palan na a Diyos diri nagpipili, 35 alagad inaako niya a siisay man na galin sa manlainlain na nasyon na agko pagkatakot kanya sagkud ginnigibo sa maraay. 36 Isi ninyo a mensayi na ipinadara ka Diyos sa manga Israelita, nagsasabi manungud ka Maraay na Bareta ka katoninungan sa paagi ni Jesu Cristo, na amo a Kagorangnan ka ngamin. 37 Isi ninyo kin ono a nangyari sa bilog na Judea, poon sa Galilea ko magtottoro si Juan manungud sa pagbunyag, 38 kin paonong itinao ka Diyos ki Jesus na tagaNazaret a Espirito Santo sagkud kapangyariyan, sagkud kin paonong linnibot iya sa ngamin na logar, ginnigibo sa maraay sagkud nagpaparaay ka ngamin na nasa irarum ka kapangyariyan ka demonyo, ta a Diyos isan kanya.
39 Kita a manga testigo ko ngamin niyang ginibo sa bilog na Judea sagkud sadto Jerusalem. Ginuraan nira si Jesus ko ipako iya sa kros, 40 alagad binoway iya otro ka Diyos sa ikatolong alduw sagkud ipinabayad iya, 41 buku sa ngamin na tawo, kindi kanatu sana na kadto pa pinili na ka Diyos na magin testigo niya. Kami nagkaun sagkud nag-inom na kaiba niya pagkatapos iyang maboway otro. 42 Minandaan niya kami na mangadal ka Maraay na Bareta sadto manga tawo sagkud magpatonay, na iya a pinili ka Diyos na magin owis ka manga boway sagkud manga guraan. 43 So ngamin na propeta nagpatonay manungud kanya na a siisay man na tomobod sa ngaran niya makaaako sa kapatawaran ka kandang manga kasalan.?
44 Mantang nag-oosip pa si Pedro, a Espirito Santo binnaba sadto ngamin na manga nag-iirungug ko mensayi. 45 Nagngalas so manga paratobod na kaiba ni Pedro, ta so regalo ko Espirito Santo itinao man magin sadto manga bukung Judio. 46 Ta narungug nira sira na nagngangabil sa manlainlain na oosipun sagkud nag-oomaw sa Diyos.