13
So Pagkamanda ki Bernabe sagkud Saulo
1 Sadto simbaan ko Antiokia agko manga propeta sagkud manga paratottoro: sira amo si Bernabe, Simeon na binabaoy na Negro, si Lucio na taga Cirene, Manaen (na dinnakulu sa palasyo kasabay ni Gobernador Herodes) sagkud si Saulo. 2 Mantang nagsasamba sira sa Kagorangnan sagkud nag-aayono, a Espirito Santo sinnabi, ?Lainun ninyo para kanaku si Bernabe sagkud si Saulo para sa trabawo na binaoyan ko para kanda.? 3 Pagkatapos nirang mag-ayono sagkud mangadyi, irinuta so manga kamut nira ki Bernabe sagkud Saulo, pagkatapos pinagalin na sira.
So Pangangadal sadto Chipre
4 Si Bernabe sagkud si Saulo minandaan ka Espirito Santo na omiyan sadto Seleucia, sagkud nagsakuy paiyan sadto Chipre. 5 Ko omabot na sira sadto Salamina, ipinangadal nira a oosipun ka Diyos sadto manga sinagoga ko manga Judio. Kaiba nira si Juan Marcos tanganing tabangan sira.
6 Linibot nira so bilog na isla anggan sa makaabot sira sadto Pafos. Nakasompong sira sadto sa usad na salamangkerong Judio sagkud palsong propeta na a ngaran Bar Jesus. 7 Kaiba iya ni Gobernador Sergio Paulo, usad na madonong na tawo. Ipinabaoy ko gobernador si Bernabe sagkud Saulo ta gosto niyang marungug a oosipun ka Diyos. 8 Alagad so salamangkerong si Elimas (adi a ngaran ni Bar Jesus sa Griego) kinontra sira tanganing diri makatobod so gobernador sa Kagorangnan. 9 Kaya si Saulo na binabaoy man na Pablo, sagkud pospos sa Espirito Santo, sinilngan so salamangkero sagkud sinnabi. 10 ?Ikang igin sa demonyo! Kasogot ka ngamin na maraay! Pono ika ka ngamin na klase sa pandadaya sagkud karatan. Ngata ta pirmi mong rinaraut a kamatoranan manungud ka Kagorangnan? 11 Ngowan padodosaan ika niya. Mabobota ika, sagkud diri mo mababayad a liwanag ka alduw sa mauban na panawon!?
Kadto tolos namatian ni Elimas na bagana tinawban sa maitum na panganoron so mata niya, sagkud nag-anap iya sa tawong migkabit kanya. 12 Ko mabayad ko gobernador so nangyari, nagtobod iya, sagkud nangalas sa manga katottoroan ko Kagorangnan.
Sadto Antiokia sa Pisidia
13 Galin sadto Pafos, si Pablo sagkud so manga kaiba niya nagsakuy paiyan sadto Perga, usad na syodad sadto Pamfilia, alagad sinnoway kanda si Juan Marcos na binnalik sadto Jerusalem. 14 Galin sadto Perga inniyan sira sadto Antiokia na sakup ko Pisidia. Ko Alduw sa Pagpapaingalo linnuug sira sadto sinagoga sagkud innula. 15 Pagkatapos na basawun so Layi sagkud so manga Kasoratan ko manga propeta, so manga namomoon sadto sinagoga nagpadara sa oosipun kanda na a sabi, ?Manga ngod, kin agko kamo manga makaiindagar na sasabiyun sa manga tawo, magngabil na kamo.?
16 Tinnindug si Pablo, sagkud nagpasabot ko kamut niya na pomolaw sagkud sinnabi, ?Manga Israelita sagkud kamong manga bukung Judio na nagsasamba sa Diyos, mag-irungug kamo kanaku! 17 A Diyos ka banwaan na Israel amo a pinnili ka kanatung ginikanan. Pinadakul niya so manga tawo ko panawon na sira sadto pa nakaistar Ehipto. Pagkatapos pinalowas sira sadto Ehipto sa paagi ka kanyang dakulung kapangyariyan, 18 sagkud pinagtiusan niya so manga ogali nira sa luug sa kwarentang taon sadto kalangtadan. 19 Pagkatapos niyang rautun so pitong nasyon sa logar ko Canaan, itinao niya so raga kanda bilang pamana. 20 Ngamin adi nangyari sa luug sa kwatrosentos singkwentang taon.
Pagkatapos kadi, tinawan sira ko Diyos sa manga owis anggan sa panawon ni Propeta Samuel. 21 Pangala so manga tawo innayat sa hadi, sagkud itinao niya kanda si Saulo na igin ni Kis, na galin sa tribo ni Benjamin, na naghadi sa kwarentang taon. 22 Pagkatapos na alinun si Saulo, ginibo niya si David na maging hadi. Adi so sinabi ka Diyos manungud kanya, ?Natorakan ko ki David na igin ni Jesse a lalaking nakapaoogma ka kanakung poso, gigibowon niya a ngamin na gosto kong ipagibo kanya? . ?
23 Galin sa erensiya ka lalaking adi itinao ka Diyos sa Israel a Paraligtas na si Jesus, sigon sa ipinanoga niya. 24 Bago omabot si Jesus, nag-osip si Juan manungud sa pagsulsul sagkud pagbunyag sa ngamin na tawo sadto Israel. 25 ?Ko matapos na ni Juan so kanyang trabawo, sinabi niya, ?Siisay ako sa pag-una ninyo? Buku ako a pig-uulat ninyo. Alagad omaabot iya na kasonod ko, na dawa a sintas ka sandalyas niya buku akong angay na tomangkas? . ?
26 Manga ngod kong erensiya ki Abraham, sagkud kamong manga bukung Judio na agko pagkatakot sa Diyos, kanatu ipinadara a mensaying adi ka kaligtasan. 27 So manga tawo sadto Jerusalem sagkud so manga namomoon diri nabisto na si Jesus amo a Paraligtas. Sagkud diri nira maintindiyan so sinabi ko manga propeta na binabasa nira kada Alduw sa Pagpapaingalo. Kaya kinondenar nira si Jesus arug ko sinabi ko propeta. 28 Dawa ngani diri sira nakatorak sa maraay na rason para ipaguraan iya, inayat nira ki Pilato na guranun iya. 29 Ko nagibo na nira so ngamin na nasosorat manungud kanya, ibinaba nira si Jesus sadto kros sagkud ilinubung. 30 Alagad binoway iya otro ka Diyos, 31 sagkud sa dakul na manga alduw nabayad iya ko manga nakaiba niya poon pa sadto Galilea sagkud sadto Jerusalem. Manga testigo na sira ngowan sa manga Israelita.
32 Sinasabi namu kaninyo a Maraay na Bareta, ?Amo adi a ipinanoga ka Diyos sa kanatung manga ginikanan 33 na kanyang ginibo kanatu, na manga igin niya, ko bowayun niya otro si Jesus. Pareyo ko nakasorat sa ikarwang Salmo,
?Ika a kanakung Igin,
ngowan, ako a kanimong Ama? .
34 Manungud ko pagkaboway niya otro, tanganing diri malupa so kanyang awak, arug man kadi so sinabi niya,
?Itatao ko kaninyo a banal sagkud sigoradong biyaya
na ipinanoga ko ki David.? a
35 Sagkud sinasabi man sa iba pang parte,
?Diri ika tomotogot na a awak ka usad na Banal malupa.? b?
36 Kinoyog ni David so kagostowan ka Diyos ko kapanawonan niya pagkatapos, nagraan iya sagkud ilinubung na kaiba ko kanyang manga ginikanan sagkud so kanyang awak nalupa. 37 Alagad a usad na binoway otro ka Diyos galin sa manga guraan diri nalupa.
38 Kaya manga ngod, gosto kong maisiyan ninyo na sa paagi ni Jesus, a kapatawaran ka kasalan naiosip na kaninyo. 39 Sa paagi niya a kada usad na nagtobod pinatawad na ka ono man na kasalan na diri maipatatawad kaninyo sa paagi ka paggibo ko Layi ni Moises. 40 Magmaan kamo tanganing diri mangyari kaninyo so manga sinasabi ko propeta,
41 ? ?Silngan ninyo, kamong manga paratoyatoya,
migngalas kamo sagkud migraan,
ta gigibowon ko sa kapanawonan ninyo
a usad na bagay na diri ninyo totobodon,
dawa agko somabi kaninyo? .c?
42 Ko si Pablo sagkud Bernabe pagalin na sadto sinagoga, inimbitaran sira ko manga tawo na mag-osip otro manungud ka manga bagay na adi sa somosonod na Alduw sa Pagpapaingalo. 43 Ko matapos na so pagtitipon, dakul na manga Judio sagkud manga debotadong innako sa Judaismo so sinnonod ki Pablo sagkud ki Bernabe. Nag-osip sagkud nakimaerak kanda so apostol na magpadagos sa pamomoway na oyon sa karayan na buut ka Diyos.
44 Ko somonod na Alduw sa Pagpapaingalo alos so ngamin na tawo sadto syodad nagtipontipon tanganing mag-irungug ko oosipun ka Kagorangnan. 45 Ko mabayad ko manga Judio so manga tawo, napono sira sa pagkaori kaya nakipagdiskotir sira ko manga sinasabi ni Pablo sagkud tinoyatoya iya.
46 Alagad mas kinnusug so buut ni Pablo sagkud Bernabe na sinnimbag kanda, ?Kaipowan na kaninyo ngona itottoro a oosipun ka Diyos. Mantang inabuan ninyo adi sagkud diri ninyo iniba a sadiri ninyo na angay sa boway na uda kasagkuran, omiiyan kami sadto manga bukung Judio. 47 Ta arug kadi a iminamanda ka Kagorangnan kanamu,
?Ibinutang ta ika na magin liwanag sa manga bukung Judio,
tanganing ipangadal a kaligtasan anggan sa poro ka kinaban.? d?
48 Ko marungug adi ko manga bukung Judio, naogma sagkud nag-omaw sira sa Kagorangnan holi ko manga oosipun niya, sagkud so ngamin na pinili na magkaagko boway na uda kasagkuran nagtobod.
49 Kaya so oosipun ka Diyos linnuyap sadto bilog na rehiyon. 50 Alagad sinolsolan ko manga Judio so manga babaying nagsasamba sa Diyos sagkud bistado sadto sosyodad, amo man so manga lalaking namomoon sadto syodad, sagkud pinadipisilan nira si Pablo sagkud Bernabe, sagkud pinalayas sa logar na adto. 51 Kaya ipinagpag nira so talbo ko manga tiil nira kontra sa manga tawo sadto, pagkatapos inniyan na sira sadto Iconio.e 52 So manga disipolo man sadto Antiokia napono sa kaogmaan sagkud napospos ko Espirito Santo.