14
Sa Iconio
1 Sa Iconio, si Pablo at si Bernabe pumasok sa sinagoga ko manga Judio arug ko dati nirang ginigibo. Maraay so pagtottoro nira kaya dakul na manga Judio sagkud manga bukung Judio so nagtobod. 2 Alagad so manga Judiong diri nagtobod sinolsolan so bukung manga Judio sagkud rinibok so kandang manga isip kontra sadto manga kangoran. 3 Nauban-uban man na innistar sadto si Pablo sagkud si Bernabe, nangadal sirang makusug so buut manungud sa Kagorangnan. Sagkud pinatonayan man niya na matood so ipinag-osip nira manungud sa biyaya ka Diyos, ta tinawan sira sa kapangyariyan na gomibo sa manga milagro sagkud manga ngangalasan. 4 Kaya so manga tawo sadto syodad nabanga, so iba innoyon ko manga Judio, so iba man innoyon sadto manga apostol. 5 Nagkausad so manga Judio sagkud so manga bukung Judio, kaiba ko manga namomoon kanda, na pasakitan sagkud batowon sira. 6 Alagad ko maisiyan nira adi, dinnulag sira paiyan sadto Listra sagkud Derbe sagkud sadto manga syodad sa Licaonia sagkud sa palibot na manga logar, 7 sagkud sadto nagpadagos sira sa pag-osip ka Maraay na Bareta.
Sadto Listra sagkud Derbe
8 Sadto Listra agko lalaking lopog, pilay na iya poon pa ko ipangigin. 9 Nakaula iyang nag-iirungug ki Pablo mantang nag-oosip. Sinilngan iya ni Pablo sa deretso sagkud nabayad niya na agko iya pagtobod na maoomayan. 10 Saka makusug niyang sinabi, ?Tomindug ika sa tolid!? sagkud so lalaki linnokso sagkud pinnoon ng mag-agi.
11 Ko mabayad ko manga tawo kin ono so ginibo ni Pablo, kinnagrat sira sa oosipun nirang Licaonia, ?A manga diyos inniyan sadi kanatu sa pormang tawo!? 12 Si Bernabe binaoy na Zeus sagkud si Pablo binaoy na Hermes ta iya so nagparaosip. 13 So padi ni Zeus, na so templo nasa atobangan ka syodad, nagdara sa manga baka sagkud manga borak sadto trangkaan ko syodad ta gosto niya sagkud so manga tawong mag-atang para kanda.
14 Alagad ko marungug adto ni Bernabe sagkud ni Pablo, rinapak nira so manga bado nira sagkud dalidaling dinnalagan sadto bitnga ko manga tawo na nagkakagrat. 15 ?Manga ngod, ngata ta ginigibo ninyo adi? Manga tawo man sana kami na arug ninyo. Dinadara namu kaninyo a Maraay na Bareta, pinagsasabiyan kamo na bayaan ninyo a manga bagay na adi na uda kamutangan sagkud bomalik kamo sa boway na Diyos na kaggibo ka langit sagkud raga, dagat sagkud ka ngamin na nakaistar san. 16 Ko manga nakaaging panawon, pinabayaan ka Diyos so ngamin na nasyon na gomibo ka ngamin nirang kagostowan. 17 Alagad padagos iyang nagpapabayad sa ebidensiya tanganing mabisto ninyo iya sa paagi ka manga karayan na ginigibo niya, pinadaraan niya kamo sa oran galin sa langit sagkud maraay na ani sa tamang panawon, sagkud tinawan niya kamo sa pagkaun sagkud pinono niya a kaninyong poso sa kaogmaan.?
18 Dawa arug na kadto so sinabi nira, nadipisilan pa nanggayud sira sa pagpugul ko manga tawo sa pagtao sa atang kanda.
19 Pangala agko nagkapirang Judio na innabot galin sadto Antiokia sagkud Iconio. Sinolsolan nira so manga tawo na omiba kanda. Kaya binato nira si Pablo sagkud binutung palowas sadto syodad sa pag-unang iya guraan na. 20 Alagad ko magtipon sagkud palibotan iya ko manga disipolo, tinnindug iya sagkud binnalik sadto syodad. Sonod na alduw, iya sagkud si Bernabe inniyan sadto Derbe.
So Pagbalik sadto Antiokia
21 Ipinangadal nira a Maraay na Bareta sadto Derbe sagkud dakul sirang nadara na magin parasonod. Pagkatapos binnalik na sira sadto Listra, Iconio sagkud Antiokia. 22 Pinapakusug nira so manga parasonod sagkud pinagsabiyan na kinakaipowan na magpadagos na magmaimbod sa kandang pagtobod. ?Makamamati kita sa dakul na kadipisilan para makaluug sa Kahadian ka Diyos,? sabi nira. 23 Binnutang si Pablo sagkud si Bernabe sa manga kagogorangan na mimmaala sa kada simbaan. Pagkapangadyi sagkud pagkaayono itinao nira sira sa Kagorangnan na kandang pinagkakatiwalaan. 24 Pagkatapos ko pag-agi nira sa Pisidia, nakaabot sira sa Panfilia. 25 Ko matapos na nirang ipangadal a oosipun ka Diyos sa Perga, inniyan na sira sadto Atalia.
26 Galin sadto Atalia nagsakuy sira pabalik sadto Antiokia, sadi sira pinnoon ko trabawong tinapos na nira matapos sirang itogon sa pangangataman ka Diyos. 27 Pag-abot sadto, tinipon nira so manga kaiba sa simbaan sagkud iinistorya so ngamin na ginibo ka Diyos sa paagi nira sagkud kin paono niya tinawan sa pabor na makatobod so manga bukung Judio. 28 Sagkud innistar sira sadto sa uban na panawon kaiba so manga disipolo.