15
So Pagtitipon sadto Jerusalem
1 Agko nagkapirang tawo na innabot sadto Antiokia galin sa Judea sagkud nagtotottoro sadto manga paratobod, ?Kin diri kamo magpatori oyon sadto kaogalian na itinottoro ni Moises, diri kamo maliligtas.? 2 Alagad nakipagdiskotir kanda sa maraay si Pablo sagkud Bernabe. Kaya, pinagkaoyonan nirang pomaiyan sadto Jerusalem si Pablo sagkud si Bernabe kaiba so ibang manga paratobod, tanganing makipagbayadan sadto manga apostol sagkud manga kagogorangan manungud ka kaongaan na adi. 3 Pinagalin sira ko manga paratobod, sagkud pag-agi nira sadto Fenecia sagkud Samaria iinistorya nira kin paono nagtobod so manga bukung Judio. Malakaogma ko manga paratobod ko baretang adto.
4 Pag-abot nira sadto Jerusalem, inako sira ko manga kangoran, manga apostol sagkud manga kagogorangan sagkud iinistorya nira so ngamin na ginibo ko Diyos sa paagi kanda.
5 Alagad so ibang manga paratobod na pag-iiba ko manga Pariseo tinnindug sagkud sinnabi, ?Kaipowan na toriun a manga bukung Judio sagkud pagbutan na komoyog sa Layi ni Moises.?
6 So manga apostol sagkud kagogorangan nangag-osip-osip manungud ko manga bagay na adto. 7 Pagkatapos ko mauban na pakikipagdiskosyon, tinnindug si Pedro sagkud sinnabi kanda, ?Manga ngod, isi ninyo na kadto pinili ako ka Diyos tanganing a manga bukung Judio makarungug ka Maraay na Bareta sagkud tomobod. 8 A Diyos a nakaiisi ka poso ka manga tawo a nagpapatonay na inako niya sira ko itao niya kanda a Espirito Santo, pareyo ko ginibo niya kanatu. 9 Uda iya pinaorog kanatu o kanda, lininig niya so poso nira holi sa pagtobod nira. 10 Ngowan, ngata ta pinoporbaran ninyo a Diyos sa paagi ka pagpapas'an sa manga disipolo ka magubat na darawun na diri ta napas'an, ni ka kanatung manga ginikanan? 11 Diri! Nagtotobod kita sagkud naligtas holi sa karayan na buut ka kanatung Kagorangnan na si Jesus, pareyo man nira.?
12 So ngamin na tawo uda polawan mantang nag-iirungug ki Bernabe sagkud ki Pablo mantang iiniistorya so manungud ko manga ngangalasan sagkud milagrong ginibo ka Diyos sa manga bukung Judio sa paagi nira. 13 Ko matapos na sira, si Santiago naman so nagngabil, ?Manga ngod, irungga ninyo ako. 14 Iinistorya ni Simon kin paono ipinabayad ka Diyos a kanyang pagmakulug sa manga bukung Judio tanganing sira man makaiba sa banwaan niya. 15 So manga oosipun ko manga propeta oyon sadi, arug ka nasosorat,
16 ?Pagkatapos ka manga bagay na adi bomabalik ako
sagkud patitindugun ko otro so tolda ni David.
So manga natomba sagkud so manga bagay na narugma
so ngamin na manga bukung Judio na migdara ka ngaran ko,
na amo ginnibo ka manga bagay na adi,
18 amo adi a sabi ka Kagorangnan, na nagpaayag ka manga bagay na adi uban ng panawon.?
19 Padagos na sinnabi si Santiago, ?Amo adi desisyon ko, diri ta na kaipowan na padipisilan pa a manga bukung Judio na gostong romapo sa Diyos. 20 Kindi kaipowan ta sirang soratan, sagkud sabiyan na diri na magkaun sa iinatang sa diyosdiyosan, diri manambay, diri magkaun sa ayup na natunguk sagkud ka rogo. 21 Ta poon pa kadtong onang panawon so Layi ni Moises binabasa sadto manga sinagoga kada Alduw sa Pagpapaingalo sagkud so oosipun niya ipinapangadal sa kada banwaan.? ?
So Sorat sa manga Bukung Judio na Paratobod
22 Kaya so manga apostol sagkud kagogorangan, kaiba so bilog na simbaan, nagdesisyon na pomili sa nagkapirang kalalakiyan tanganing ipadara sadto Antiokia kaiba nira ni Pablo sagkud Bernabe. Pinili nira si Judas (na binabaoy na Barsabas) sagkud si Silas, manga lalaking nangona sa manga kangoran. 23 Ipinadara kanda so sorat na arug kadi:
?Kaming manga apostol, manga kagogorangan sagkud manga ngod, nagtataonggalang sa manga bukung Judio na paratobod sa Antiokia, Siria sagkud Cilicia: 24 Nabaretaan namu na agko inniyan san kaninyo na nagkapirang tawo galin sadi na uda permiso kanamu. Sagkud riniribok kono kamo holi ka manga sinasabi nira. 25 Kaya kami nagkauusad na pomili sa nagkapirang lalaki sagkud ipadara siton inyo kaiba a nabubutan tang manga ngod na si Pablo sagkud Bernabe 26 na itinaya so kandang manga boway sa ngaran ka kanatung Kagorangnan na si Jesu Cristo. 27 Kaya ipinadara namu si Judas sagkud si Silas tanganing sabiyun kaninyo so isinorat namu. 28 Sa paagi ka Espirito Santo, minaraay namung diri kamo pagtawan sa magubat na pas'anun pwera ka manga bagay na kinakaipowan saigo. 29 Na diri kamo magkaun ka manga iinapag sa diyosdiyosan, sa agko rogo, sa manga karne na galin sa natunguk na ayup sagkud diri manambay. Rayoan ninyo a manga bagay na adi sagkud mapakakaraay kamo.
Ipinapaabot namu a pangongomosta kaninyo.?
30 Innagi na so manga kalalakiyan sagkud inniyan sadto Antiokia sagkud tinipon so ngamin na paratobod sagkud itinao so sorat. 31 Binasa adto ko manga tawo sagkud naogma sira saigo ko manga nakaiindagar na mensayi. 32 Si Judas sagkud si Silas, na manga propeta man, sinnabi pa sa manga bagay na nakapagpatibay sagkud nakapakusug sa manga kangoran. 33 Pagkatapos ko gatikot na panawon nirang pagtiner sadto, dinispider sira ko manga kangoran sagkud benindisyonan na magkaagko katoninungan pabalik sadto nagmanda kanda, 34 alagad si Silas nagdisisyon na magtiner.
So Diri Pagkasondo ni Pablo sagkud Bernabe
35 Sira man si Pablo sagkud Bernabe nagtiner ngona sadto Antiokia, sagkud dakul na manga kaibang nangagtottoro sa oosipun ka Kagorangnan. 36 Pagkalipas ko nagkapirang alduw sinabi ni Pablo ki Bernabe, ?Mosna, bomalik na kita sagkud bisitawun ta so manga kangoran sa pagtobod sa bilog na banwaan na pinangadalan ta ko oosipun ka Kagorangnan, sagkud baydun ta kin ono na kamutangan nira.? 37 Gosto ni Bernabe na iiba si Juan Marcos, 38 alagad minaraay ni Pablo na diri omiba kanya, ta sinnoway iya kanda sadto Panfilia sagkud diri nagpadagos na nakiiba kanda sa trabawo. 39 Nagkadiskotir sira sa maraay kaya nagsowayan sira. Iiniba ni Bernabe si Marcos sagkud nagsakuy paiyan sadto Chipre, 40 alagad pinili ni Pablo si Silas sagkud innagi sira pagkatapos na ipangadyi ko manga kangoran sa pagtobod na ingatan sira ka Kagorangnan. 41 Innagi iya sadto Siria sagkud Cilicia, sagkud pinakusug so manga kangoran sadto.