16
Ipinag-iba si Timoteo ni Pablo sagkud Silas
1 Inniyan man si Pablo sa Derbe sagkud Listra. Agko sadto usad na paratobod na a ngaran Timoteo, sagkud so kanyang kag-igin na babayi usad man na paratobod na Judia, alagad so kanyang ama Griego. 2 Malangraay ka sinasabi ka manga kangoran sadto Listra sagkud Iconio manungud ki Timoteo. 3 Gosto ni Pablo na ipag-iba si Timoteo, kaya ipinatori niya adi. Ginibo niya adi ta a manga Judiong nakaistar sadto nakaiisi na Griego so ama ni Timoteo. 4 Paglabos nira sadto manlainlain na banwaan, ipinaisi nira sa manga paratobod so manga patakaran na pinagkaoyonan ko manga apostol sagkud ko manga kangoran sa Jerusalem tanganing amo nira sonodon. 5 Kaya lalong kinnusug so pagtobod ko manga paratobod ni Jesus sagkud dinnakul sira oroalduw.
A Ipinabayad ki Pablo sadto Troas
6 Inniyan sira sa rehiyon ko Frigia sagkud Galacia, ta diri sira tinogotan ko Espirito Santo na mangadal ko mensayi ka Diyos sadto Asya. 7 Pag-abot nira sadto karoronan ko Misia, naisip nira na omiyan sa Betania, alagad diri sira tinogotan ko Espirito ni Jesus. 8 Kaya inagyan nira so Misia sagkud nagderetso sadto Troas. 9 Ko gab-ing adto si Pablo nakabayad sa kapaayagan galin sa Diyos. Ipinabayad kanya so usad na tawong taga Macedonia na nagtitindug sagkud nakikimaerak kanya sagkud sinnabi, ?Omiyan ika tabi sadi Macedonia sagkud tabangan mo kami.? 10 Pagkabayad ni Pablo ko kapaayagan ko Diyos nag-anda kami sa pag-iyan sadto Macedonia, ta naisip namu na binabaoy kami ka Diyos tanganing ipangadal a Maraay na Bareta sa manga tawo sadto.
Nagtobod si Lydia sadto Filipos
11 Galin sadto Troas, deretso kaming nagsakuy paiyan sadto Samotracia, sagkud somonod na alduw sadto Neapolis. 12 Galin sa Neapolis dinnagos kami sadto Filipos, usad na kolonya sa Roma saka nangongonang syodad sa distrito ka Macedonia. Nagtiner kami sa nagkapirang alduw sa syodad na adto. 13 Ko Alduw sa Pagpapaingalo, linnowas kami sadto syodad. Inniyan kami sadto arani ko salog sa pag-unang agko sadto logar na pangadyian so manga Judio. Nangag-ula kami sagkud nakipag-osip sadto manga babayi na nagtitipon sadto. 14 So usad na nag-iirungug kanamu sadto amo si Lydia na taga Tiatira, usad iya sa manga negosyante sa tela na a kolor lila. Usad iyang parasamba sa Diyos, sagkud binoksan ka Kagorangnan so kanyang poso tanganing maako so manga sinabi ni Pablo. 15 Nagpabunyag iya sagkud so kanyang pamilya. Pagkatapos, inalok niya kami, ?Kin ako ibinibilang ninyong paratobod sa Kagorangnan, sadto na kamo baluy domagos.? Diri namu iya masayomaan.
Ipinapriso si Pablo sagkud si Silas sadto Filipos
16 Usad na alduw, ko kami paiyan sadto logar na pangangadyian, sinabat kami ko usad na raragang mamandaan. Agko iya maraut na espirito na nagtatao kanya sa kapangyariyan na tomukud. Dakul na sintabo a nakokoko niya bilang paratukud para sa kanyang manga among. 17 Pinagparasonodsonod niya kami sagkud nagparakagrat, ?A manga tawong adi a manga parasonod ka Kaoroalangkawing Diyos! Ibinabareta nira kaninyo kin paono kamo makaliligtas!? 18 Oroalduw na ginigibo niya adi, kaya naoyam si Pablo, pinaglilili iya sagkud sinabiyan so espirito, ?Sa ngaran ni Jesu Cristo, pinagbubutan ko ikang lomayas sa babaying an!? Kaya linnayas tolos so espirito. 19 Ko maisiyan ko manga among niya na uda na sira pigkasintabowan, rinakup nira si Pablo sagkud si Silas saka pinaggoyod paiyan sadto atobangan ko manga otoridad sadto plasa. 20 Isinombong sira sadto manga opisyal na Romano sagkud sinnabi, ?A manga Judiong adi nagpaparibok sadi kanatung syodad. 21 Nagtotottoro sira sa manga kaogalian na sala sa layi tang manga Romano sagkud diri ta kayang akoon o koyogon.?
22 Kaya pinagsorogsorogan ko manga tawo si Pablo sagkud si Silas.
Inokas ko manga opisyal so manga bado nira saka pinag-aampak sira. 23 Pagkaampak kanda ipriniso sira sagkud pinabantayan saigo. 24 Kaya sigon ko pagbuut, ilinuug sira ko parabantay sadto pinakatuduk na prisowan, saka ilinuug so manga tiil nira sadto lobot ko malanggubat na kawoy.
25 Ko lawud na, nangangadyi sagkud nagkakanta sa himno si Pablo sagkud si Silas, sagkud so ibang manga priso nag-iirungug kanda. 26 Biglang naglinog sa malangkusug, sagkud nayugyug so manga pondasyon ko prisowan. Naboksan so manga pwertaan sagkud nagkaoobad so manga kadena ko ngamin na priso. 27 Napagmata so bantay sagkud ko mabayad niyang bokas so ngamin na pwertaan ko prisowan, nag-una iya na nangagdulag na so ngamin na priso, kaya inolbot niya so espada ta gosto na niyang mag-ugut. 28 Alagad kinagratan iya ni Pablo, ?Diri mo paggibowon an! Sadi kami ngamin!?
29 Pinnakoko sa soloan so bantay, dinnalagan paiyan sadto luug saka nangungubugkubug na dinnapla sadto paniilan ni Pablo sagkud ni Silas. 30 Pagkatapos, ilinowas niya sira saka innonga, ?Ono a kaipowan kong gibowon tanganing maligtas??
31 Sinnimbag sira, ?Magtobod ika sa Kagorangnan na si Jesus, sagkud ika maliligtas, ika sagkud a kanimong pamilya.? 32 Pangala ipinaayag nira so oosipun ka Kagorangnan kanya sagkud so ngamin na kaiba niya sadto baluy. 33 Ko gab'i man sanang adto, inogasan ko bantay so kandang manga maaprus, sagkud nagpabunyag iya sagkud so ngamin na pamilya niya. 34 Pangala inimbitaran sira ko bantay sadto baluy nira sagkud pinakaun, sagkud napono so poso niya sa kaogmaan ta pinnoon na sirang makabisto sa Diyos, iya sagkud a kanyang bilog na pamilya. 35 Pagkaramrag, isinobol ko manga opisyal so manga soldados sagkud minandaan na palowasun na so manga prisong adto.
36 Kaya sinabiyan si Pablo ko bantay, ?Nagmanda a manga opisyal na palowasun na kamo ni Silas. Kaya pwede na kamong maglowas, uda mingyari kaninyo.?
37 Alagad sinabiyan ni Pablo so manga soldados, ?Ayag kaming ipinaampak sagkud ipinapriso na diri basang pinaimbistegaran, kami na manga namamanwaan na manga Romano. Ngowan ilum sana nira kaming palolowasun? Diri pwede! Sira mismo a omiyan sadi tanganing palowasun kami!?
38 Sagkud sinabi adto ko manga soldados sadto manga opisyal sagkud ko maisiyan nira na manga namamanwaan na Romano si Pablo sagkud si Silas, nakatakot sira. 39 Kaya inniyan sira sadto sagkud innayat sa tawad ki Pablo sagkud ki Silas. Pinalowas nira so darwa sagkud pinakiosipan na gomalin na sadto syodad. 40 Pagkalowas sadto prisowan, inniyan si Pablo sagkud si Silas sadto baluy ni Lydia, naabotan nira sadto so manga kangoran sagkud pinakusug so manga buut. Pangala ginnalin na sira.