17
Sadto Tesalonica
1 Innagi sira sadto Antipolis sagkud Apolonia, anggan sa makaabot sira sadto Tesalonica, na agko sadto sinagoga so manga Judio. 2 Sigon sa nakaogalian na niya, si Pablo inniyan sadto sinagoga, sagkud sa luug sa tolong simana kada Alduw sa Pagpapaingalo nakikipagdiskosyon iya sadto manga tawo manungud ka Kasoratan, 3 iniisplikar sagkud pinapatonayan na si Cristo kaipowan na magtius sagkud maboway otro, ?A Jesus na adi na inoosip ko kaninyo amo a Cristo,? sabi ni Pablo. 4 Nagkapira sa manga Judio so nadara nira ni Pablo sagkud Silas sagkud inniba kanda, pareyo man ko ginibo ko malakadakul na manga bukung Judio na manga maka Diyos saka so ibang manga iginagalang na babayi sadto.
5 Alagad so manga Judio nangimon kaya tinipon nira so manga nagparabaragbarag sadto sasaran sagkud rinibok so syodad. Linosob nira so baluy ni Jason sagkud pirit na inaanap si Pablo sagkud Silas tanganing darawun sadto atobangan ko manga tawo. 6 Alagad ko diri nira maanap so darwa, ginodgod nira si Jason sagkud nagkapirang kangoran sadto atobangan ko manga namomoon ko syodad, na kinnakagrat, ?A manga lalaking adi amo nagpaparibok sa ngamin na nasyon, ngowan nakaabot na sira sadi kanatu, 7 sagkud pinadagos sira ni Jayson sadto baluy niya. Sira ngamin nagbabalgar ka ipinagbubuut ka Emperador, na nagsasabing agko pa ibang hadi, a usad na binabaoy na Jesus.? 8 Ko marungug nira adi, so manga tawo sagkud so manga opisyales nagkaribok. 9 Kaya inayatan nira sa piyansa si Jayson sagkud so iba pa bago sira pinalowas.
Sadto Berea
10 Ko gab-i na, pinaiyan si Pablo sagkud si Silas ko manga kangoran sadto Berea. Pag-abot nira sadto, linnuug sira sadto sinagoga ko manga Judio. 11 A manga taga Berea mas maraay na kaosipun ki sa ka manga taga Tesalonica, maogma nirang inako a manga oosipun na agko dakulung pagmawut sagkud pinag-aadalan nira a Kasoratan oroalduw tanganing mabayad nira kin matood a itinotottoro ni Pablo. 12 Dakul sa manga Judio so nagtobod, dakul man so nagtobod na manga bukung Judiong babayi sagkud lalaking bistado sadto syodad.
13 Ko maisiyan ko manga Judio sa Tesalonica na si Pablo nangangadal ko oosipun ka Diyos sadto Berea, inniyan man sira sadto sagkud sinolsolan na gomibo sa karibokan so manga tawo. 14 Dalidaling pinagalin ko manga kangoran si Pablo paiyan sadto gilid ko dagat, alagad natagak sira si Silas sagkud Timoteo sadto Berea. 15 So manga nag-atud ki Pablo inniba na kanya anggan sadto Atenas. Pagkatapos binnalik na sira sadto Berea, sagkud tinogon sira ni Pablo na sabiyun kanda ki Silas sagkud Timoteo na somonod tolos kanya.
Sadto Atenas
16 Mantang si Pablo nag-uulat kanda sadto Atenas, naporisaw iya sa maraay ko nabayad niya na pono sa manga diyosdiyosan sa syodad. 17 Kaya nakipagdiskosyon iya sadto sinagoga ko manga Judio sagkud manga tawong agko pagkatakot sa Diyos na manga bukung Judio, saka sadto sasaran oroalduw, sa manga tawong nasosompongan niya. 18 Nakipagdiskotir kanya so manga pilosopong Epicureo sagkud sadto manga pilosopong Estoico. So nagkapira innonga, ?Ono nginangabil kading nagdodonongdonongan na an??
So iba man sinnabi, ?Nagtotottoro gayud iya manungud sa ibang diyos.? Arug kan so sinabi nira ta nagtotottoro si Pablo manungud ki Jesus sagkud sa pagkaboway niya otro. 19 Pangala kinoko sagkud dinara iya sa pagtitipon ko Areopago sagkud inonga iya, ?Pwedeng maisiyan namu kin ono ading bagong katottoroan na itinotottoro mo? 20 Nagdara ika kanamu sa bagong katottoroan, kaya gosto namung maisiyan kin ono a buut sabiyun kadi.? 21 (So ngamin na taga Atenas sagkud so manga dayowan na nakaistar sadto, uda ibang ginibo kindi mag-osip-osip sagkud mag-irungug manungud sa manga bagay na bago).
22 Tinnindug si Pablo sadto pagtitipon ko Areopago sagkud sinnabi, ?Manga tagaAtenas! Nababayad kong namumutang a buut ninyo sa relihiyon. 23 Ta mantang nag-aagi ako sagkud maingat na inoobserbaan a manga pinagsasamba ninyo, nakabayad ako sa altar na agko nakasorat na: SA DIYOS NA DIRI NABIBISTO. A kaninyong sinasamba dawa diri ninyo bistado amo a ipinag-oosip ko kaninyo. 24 A Diyos na ginnibo ka kinaban sagkud ka ngamin na isan amo a Kagorangnan ka langit sagkud raga, holi ta iya diri nakaistar sa templo na ginibo ka manga tawo. 25 Sagkud diri iya nangangaipo sa onoman na bagay na ikatatao ka tawo sa pagsirbi kanya, ta iya ngani a nagtao sa boway sagkud inangus sagkud ka ngamin na bagay sa manga tawo. 26 Galin sa usad na tawo linalang niya a ngamin na klase sa tawo sadi kinaban. Kada linalang tinalaanan niya sa panawon na maboway sagkud eksaktong logar kin sari sira omiistar. 27 Ginibo adi ka Diyos tanganing anapun iya ka manga tawo sagkud sa pag-anap nira kanya, matorakan man iya, na a matood diri man iya nararayo sa kada usad kanatu. 28 ?Ta isan kanya kita naboboway, nag-iiwag sagkud nagkakaagko sadiring pagkatawo.? Pareyo ko sinabi ko nagkapirang paratola san inyo, ?Kita a manga igin niya? . ?
29 ?Holi ta kita manga igin sa Diyos, diri kita mag-isip na bagana iya usad na litratong bolawan, plata o bato na ginibo sa tawo na base sa kanyang kadonongan sagkud kakayanan. 30 Diri pinakilabutan ka Diyos so uban na panawon na diri pagbisto kanya ko manga tawo, alagad ngowan iminamanda sa ngamin na tawo sa ngamin na logar na magsulsul. 31 Ta binnutang sa talaan na alduw a Diyos na hohokoman niya sa patas a kinaban, sa paagi ka usad na tawong pinili niya. Pinamatoran adi niya sa ngamin ko bowayun niya otro a tawong adi.?
32 Ko marungug nira so manungud ka pagkaboway otro, so iba kanda pinagtoyatoya si Pablo sagkud so iba man sinabi kanya, ?Gosto namung marungug ika otro manungud kadi.? 33 Pangala binayaan na sira ni Pablo. 34 Agko nagkapirang lalaki so sinnonod ki Pablo sagkud nagtobod. So usad kanda amo si Dionisio na kaiba ko manga Areopagoa sagkud so usad na babayi na a ngaran Damaris sagkud so iba pang tawo.