18
Sadto Corinto
1 Pagkatapos kadi, ginnalin na si Pablo sadto Atenas sagkud inniyan sadto Corinto. 2 Sadto niya nasompongan so usad na Judio na a ngaran Aquila, na taga Ponto, na kaaabot pa sana galin sa Italia. Kaiba so agom niya na si Priscila, ta iminanda ni Claudio na so ngamin na Judio gomalin sa Roma. Kaya nakipagbayadan kanda si Pablo. 3 Sagkud sadto na iya innistar ta pareyo sirang paragibo sa tolda. Sagkud nagtabang na iya kanda. 4 Kada Alduw sa Pagpapaingalo, nakikipagdiskosyon iya sadto sinagoga sagkud iniingoa niyang madara ngamin sa pagtobod Judio man o bukung Judio.
5 Ko si Timoteo sagkud si Silas innabot galin sa Macedonia, si Pablo man itinao so ngamin niyang panawon sa pag-osip sagkud pagpapatonay sa manga Judio na si Jesus amo a Cristo. 6 Alagad ko so manga Judio kinontra si Pablo sagkud nangag-aboso, ipinagpag niya so kanyang bado bilang patanid saka sinabi niya kanda, ?Kamo a babasolon kin kamo mapaamak, bukung ako! Kaya ngowan paiiyan ako sa manga bukung Judio.?
7 Kaya ginnalin sadto si Pablo sagkud inniyan sadto baluy ni Ticio Justo, na arani sadto sinagoga, buku iyang Judio na parasamba sa Diyos. 8 Si Crispo na namomoon sadto sinagoga sagkud so ngamin na kaiba niya sa baluy nakatobod sa Kagorangnan, dakul na manga taga Corinto na nakarungug ki Pablo nagtobod sagkud nabunyagan.
9 Usad na gab-i nakabayad si Pablo sa kapaayagan galin sa Diyos sagkud nangosip, ?Diri ika makatakot, ipagpadagos mo a pangangadal mo, diri ika magpondo. 10 Ta kaiba mo ako sagkud diri ika maoono, ta dakul a tagasonod ko sa syodad na adi.? 11 Kaya innistar sadto si Pablo sa luug sa usad e kabangang taon, tinottoroan so manga tawo ko oosipun ka Diyos.
12 Ko si Galion amo nagin gobernador ko Acaya, so manga Judio nagkausad na rakupun si Pablo sagkud darawun sa korte. 13 ?A lalaking adi, pinipirit a manga tawong somamba sa Diyos sa paaging kontra sa layi,? sabi nira.
14 Migngabil na kintana si Pablo ko sabiyun ni Galion sadto manga Judio, ?Kin adi usad na bagay na maraut o usad na magubat na krimen, agko ako rason na mag-irungug kaninyo. 15 Alagad ta a reklamo ninyo manungud sa manga oosipun, manga ngaran sagkud manga layi ninyong manga Judio, diri ko kamo oosgaran ka manga bagay na an. Bahala na kamo kan.? 16 Kaya pinalowas na sira sadto korte. 17 Pangala pinugul nira si Sostenes na namomoon ko sinagoga sagkud pinokpok sadto atobangan ko korte. Alagad diri adto inintindi ni Galion.
Si Priscila, Aquila sagkud si Apollo
18 Nagtiner pa si Pablo sadto Corinto sa nagkapirang alduw. Pagkatapos nagpatuud na iya sadto manga ngod niya sagkud inniyan na sa Siria, kaiba si Priscila sagkud si Aquila. Bago sira nagsakuy, napatosar iya sadto Cencrea ta gosto niyang gibowon so panoga niya. 19 Pag-abot nira sadto Efeso, binayaan na ni Pablo si Priscila sagkud si Aquila. Napaiyan iya sadto sinagoga sagkud nakipagdiskosyon sadto manga Judio. 20 Ko pakiosipan nira iya na magtiner pa sadto kanda, nagsayoma iya. 21 Alagad ko gomagalin na si Pablo, nanoga iya. ?Bomabalik ako kin gogostowon ka Kagorangnan.? Pangala, nagsakuy na iya galin sa Efeso.
22 Pag-abot niya sadto Cesarea, inniyan iya sadto Jerusalem sagkud kinomosta so manga kangoran, sagkud dinnagos na sadto Antiokia. 23 Pagkaagi sa nagkapirang alduw niya sadto Antiokia, ginnalin na sadto si Pablo sagkud inniyan sa usad na banwaan sa rehiyon ko Galacia sagkud Frigia, tanganing pakusugun so pagtobod ko manga disipolo. 24 Pangala agko innabot na usad na Judio na a ngaran Apollo, na taga Alejandria, sadto Efeso. Iya usad na lalaking madonong, sagkud dakul a naiisiyan manungud sa Kasoratan. 25 Tinottoroan iya ka Aagyan ka Kagorangnan sagkud maigut iyang nag-oosip sagkud nagtotottoro sa matood manungud ki Jesus dawa ngani a isi sana niya amo so bunyag ni Juan. 26 Pinnoon iyang mag-osip na uda pagkatakot sadto sinagoga. Ko si Priscila sagkud si Aquila marungug iya, inimbitaran iya sadto baluy nira sagkud ipinaintindi nira kanya sa maraay so manga bagay na diri niya isi manungud ka Aagyan ka Diyos. 27 Ko magmawut si Apolos na omiyan sadto Acaya, pinakusug so buut niya ko manga kangoran sagkud sinoratan so manga disipolo sadto na akoon iya. Pag-abot niya, dakulu so naitabang niya sadto manga paratobod sa paagi sa karayan na buut ka Diyos. 28 Ta nadaug niya so manga Judio sa maigut niyang pakikipagdiskotir kanda sa atobangan ko manga tawo, sagkud pinamatoran niya galin sa Kasoratan na si Jesus amo a Cristo.