19
Si Pablo sadto Efeso
1 Mantang si Apollo sadto Corinto, innagi man si Pablo sa kabobokidan ko probinsya anggan sa nakaabot iya sa Efeso. Nasompongan niya sadto so nagkapirang manga paratobod 2 sagkud inonga sira, ?Naako na ninyo a Espirito Santo ko kamo tomobod??
Sinnimbag sira, ?Diri, di pa ngani kami nakarurungug na agko Espirito Santo.?
3 Kaya innonga si Pablo, ?Kin arug kan, sa ono kamo nabunyagan??
?Sa pagbunyag ni Juan,? simbag nira.
4 Sinnabi si Pablo, ?A pagbunyag ni Juan amo tanda ka pagsulsul. Sinabi niya sadto manga Israelita na kaipowan sirang tomobod sa omaabot na kasonod niya, na buut sabiyun si Jesus.? 5 Ko marungug nira adto, nagpabunyag sira sa ngaran ka Kagorangnan na si Jesus. 6 Ko iruta ni Pablo so kamut niya kanda, binnaba kanda so Espirito Santo sagkud nagngabil sira sa manlainlain na oosipun sagkud nagpaayag ko oosipun ka Diyos. 7 Manga dose katawo sira ngamin.
8 Linnuug si Pablo sadto sinagoga sagkud nangadal na uda katakoti sa luug sa tolong bolan, nakikipagdiskosyon sadto manga tawo sa pag-isplikar manungud ka Kahadian ka Diyos. 9 Alagad so iba kanda nagkinusung, nagngabil sira sa maraut sa atobangan ko manga tawo sadto sinagoga. Kaya binayaan sira ni Pablo saka ipinag-iba so manga paratobod. Oroalduw sadto eskwelaan ni Teranno nakikipagdiskosyon iya. 10 Nag-uban adi sa luug sa darwang taon, kaya so ngamin na Judio sagkud bukung Judio saka so ngamin na nakaistar sa banwaan ko Asya nakarungug ko oosipun ka Kagorangnan.
11 Ginnibo a Diyos sa manga daddakulung milagro sa paagi ni Pablo, 12 na dawa so manga panyo sagkud manga epron ginamit niya sa manga agko kamatian, sagkud sira ngamin nagkararaay sagkud nagpanlayas so manga maraut na espirito.
13 Nagkapirang Judio so naglilibot sagkud nagpapalayas sa maraut na espirito, pinnorbar na gamitun so ngaran ka Kagorangnan na si Jesus na palayasun so mararaut na espirito sadto manga sinasaniban kadi. Sinabi nira, ?Sa ngaran ni Jesus, na ipinag-oosip ni Pablo minamandaan ko kamo na lomayas!? 14 Kaiba sa ginnibo kadi so pitong igin ni Esceva, namomoon ko manga padi na Judio.
15 Usad na alduw, so usad na maraut na espirito sinnimbag kanda, ?Bistado ko si Jesus, sagkud bistado ko man si Pablo, alagad kamo, siisay kamo?? 16 Pangala so lalaking sinasaniban sa maraut na espirito linnokso kanda sagkud dinaug sira ngamin. Pinadipisilan niya sira saigo kaya dinnalagan sirang parayo sadto baluy na oba sagkud rogoan.
17 Ko marungug ko manga Judio sagkud manga bukung Judio na nag-iistar sadto Efeso a manga pangyayaring adi, nakatakot sira saigo, sagkud so ngaran ka Kagorangnan na si Jesus lalong inomaw. 18 Dakul sa manga paratobod so inniyan sagkud ipinaayag nira sa pobliko so maraut nirang ginibo. 19 Tinipon ko manga salamangkero so manga libro nira pagkatapos sinolo adto sa atobangan ko manga tawo. Ko kwentawun so kantidad ko manga libro mig-abot sa singkwenta mil na sintabong plata. 20 Sa arug kading paagi so oosipun ka Kagorangnan linnuyap saka nakapadakul sa manga paratobod.
21 Pagkatapos na mangyari a manga bagay na adi, si Pablo nagdisisyon na omiyan sadto Jerusalem, alagad omaagi ngona sa Macedonia sagkud Acaya. Sagkud sinabi niya, ?Pagkatapos kong omiyan sadto, kaipowan ko man na bisitawun a Roma.? 22 Ipinadara niya so darwa niyang katabang, si Timoteo sagkud Erasto sadto Macedonia, mantang iya nagtiner ngona sa gatikot na panawon sadto Asya.
So Kariribokan sadto Efeso
23 Ko panawon na adto nangyari so dakulung kariribokan sadto Efeso manungud sa Aagyan ka Kagorangnan. 24 Agko usad na platero na a ngaran Demetrio, naggigibo iya sa sassadit na templong plata ka diyosang si Diana, sagkud dakul a nagaganansya ko manga trabador sa trabawong adi. 25 Tinipon niya so ngamin na trabador pati so ibang arug man kadto a trabawo, saka sinnabi, ?Manga ngod, isi ninyo na nakakokoko kita sa dakulung ganansya sa trabawong adi. 26 Nababayad sagkud narurungug ninyo kin ono a ginigibo ka Pablong adi. Sinasabi niyang bukung diyos a manga diyos na ginigibo sa kamut sagkud dakul na iyang napatobod, buku sana sadi Efeso kindi magin sadto Asya. 27 Maraut a magigin resolta ka katottoroan na an, nasa peligro na maraut a ngaran ka kanatung trabawo. A templo ka dakulung diyosa na si Diana maaalinan sa importansya sagkud a diyosang si Diana na sinasamba sa bilog na Asya sagkud sa bilog na kinaban diri na igagalang.?
28 Ko marungug nira adi, naungut sira sagkud pinnoon ng magkagrat, ?Maboway si Diana, a diyosa ka manga taga Efeso!? 29 Kaya nagkaribok so bilog na syodad. Ginoyod ko manga tawo si Gayo sagkud Aristarco, kaiba sira ni Pablo sa pagbyayi galin sadto Macedonia sagkud nagpandalagan sira sadto teatro. 30 Gosto kintana ni Pablong omatobang sadto manga tawo, alagad diri iya tinogotan ko manga disipolo. 31 Magin so nagkapirang namomoon sadto banwaan na amigo ni Pablo, pinadaraan iya sa mensayi na nakikimaerak na diri na iya omiyan sadto teatro.
32 So manga tawo nalilibungan: ta so iba nagkakagrat manungud sa usad na bagay, so iba, iba man so ikinakagrat. Kadaklan ko manga tawo diri isi kin ngata ta isadto sira. 33 So pag-una ko manga tawo si Alejandro amo so rason ta iya ngani so dinara sadto onaan ko manga Judio. Kaya nagpasabot iyang pomolaw ta mig-isplikar iya. 34 Alagad ko maisiyan nira na iya Judio, sabaysabay sirang nagkagrat sa luug sa darwang oras. ?Maboway si Diana, diyosa ka manga taga Efeso!?
35 Pinapondo ko sekretaryo ko syodad so manga tawo saka sinnabi, ?Manga taga Efeso, siisay a diri nakaiisi na a syodad ka Efeso amo a tagapangataman ka templo ni Diana sagkud ko batong banal na naolog galin sa langit? 36 Uda siisay man na makaninigar kadi. Kaya diri kamo magpararibok sagkud diri kamo maggibo sa onoman na diri ngona pinag-iisipan. 37 Dinara ninyo sadi a manga lalaking adi, dawa diri sira nagtataban sadto templo ni nagngangabil sa maraut manungud sa kanatung diyosa. 38 Kin agko sombong si Demetrio sagkud a kanyang manga trabador kontra sa kiisay man, bokas a korte saka agko sadto manga otoridad. Sadto sira magsombong. 39 Kin agko pa kamo ibang bagay na isosombong, pwedeng osayun an sa usad na pagtitipon na oyon sa ligal na paagi. 40 Namimiligro kita na masawtan na nagpaparibok sa alduw na adi, ta uda kita karason-rason sa nangyayaring kariribokan na adi.? 41 Pagkatapos niya adtong sabiyun, pinaoli na niya so manga tawo.