20
Pag-iyan sadto Macedonia sagkud Grecia
1 Ko matapos na so kariribokan, ipinabaoy ni Pablo so manga disipolo sagkud pinakusug so manga buut nira. Pagkatapos nagpatuud na iya kanda sagkud inniyan na sadto Macedonia. 2 Nagbyayi iya sa kada banwaan, pinakusug niya so buut ko manga disipolo, anggan sa makaabot iya sadto Grecia. 3 Innistar iya sadto sa luug sa tolong bolan. Migsakuy kintana iya paiyan sadto Siria, kindi nabaretaan niyang pig-uumaan iya ko manga Judio, kaya nagdisisyon iya na bomalik sadto Macedonia. 4 Inibanan iya ni Sopater, igin ni Pirro, na taga Berea sagkud Segondo na taga Tesalonica, si Gayo na taga Derbe, si Timoteo, Tiquico sagkud si Trofimo na manga taga Asya. 5 A manga kalalakiyan na adi innona na sagkud nag-uulat kanamu sadto Troas. 6 Alagad nagsakuy kami galin sadto Filipos pagkatapos ko Piyesta sa Tinapay na Uda Lebadora. Pagkaagi sa limang alduw, naabotan namu sira sadto Troas. Nag-usad na simana kami sadto.
Binoway si Eutico sadto Troas
7 So onang alduw ko simana, nagtipontipon kami para sa pagbangabanga ko tinapay. Nangadal si Pablo sadto manga tawo anggan lawud ta pagkainudmai gomagalin na iya. 8 Kadakul ko manga solo sadto kwartong pinagtitiponan namu. 9 Nakaula sadto bintana so usad na lalaki na a ngaran Eutico. Nakatorog iya mantang nag-oosip si Pablo. Ko malana niya katorog, naolog iya galin sa ikatolong iskalon, ko poroton iya guraan na. 10 Binnaba si Pablo sagkud ginakus so soltero, ?Diri kamo maandal,? sabi niya. ?Boway iya!? 11 Tinnaas otro si Pablo, binangabanga so tinapay saka kinaun. Nagramrag iyang nangadal, pangala naggalin na iya. 12 Dinara ko manga tawo so soltero paoli na boway sagkud napono sira sa kaogmaan.
Nagpatuud si Pablo sadto Namomoon ko manga Kangoran sadto Efeso
13 Linnonad kami sa barko paiyan sa Ason, sadto namu raramgoton si Pablo. Amo adto sinabi niya kanamu ta balak niyang maninampo paiyan sadto. 14 Ko magkabayad kami sa Ason, pinalonad namu iya pagkatapos dinneretso na kami sadto Mitilene. 15 Paggalin sadto, nagsakuy kami paiyan sa Quio sagkud pagkainudmai rinnamgot kami sa Samos. Somonod na alduw innabot kami sa Mileto. 16 Nagdisisyon si Pablo na diri na mag-iyan sa Efeso tanganing diri na iya maabala sadto Asya ta nagmamadali iyang paiyan sa Jerusalem, ta buut niyang makaabot bago so alduw ka Pentecostes.
17 Galin sa Mileto, ipinabaoy ni Pablo so manga kagogorangan sadto Efeso na makipagbayadan kanya. 18 Ko omabot na sira, sinnabi iya, ?Isi ninyo kin paono ako naboway sa bilog na panawon na kaiba ninyo, poon ko alduw na omabot ako sadto Asya. 19 Nagsirbi ako sa Kagorangnan sa bilog na kapakombabaan, paglowa, dawa dakul na pagsakit so tinius ko holi ko manga pag-uma ko manga Judio. 20 Isi ninyong diri ako nag-alangan na iosip a ngamin na makatatabang kaninyo, tinottoroan ko kamo sa atobangan ka pobliko sagkud sa kaninyong manga baluy. 21 Sinabi ko magin sa manga Judio o bukung Judio na kaipowan sirang manombalik sa Diyos sagkud magsulsul ka kandang manga kasalan sagkud tomobod sa kanatung Kagorangnan na si Jesus.
22 Kaya ngowan, bilang pagkoyog ka Espirito Santo, paiyan ako sa Jerusalem, diri ko isi kin ono mingyari kanaku sadto. 23 A isi ko sana sa kada syodad na iniiyanan ko, pinapataniran ako ka Espirito Santo na a pagkapriso sagkud kadipisilan nag-uulat kanaku. 24 Alagad uda alaga kanaku a boway ko. Magibo ko sana a kanakung obligasyon sagkud matapos a misyon na itinao kanaku ka Kagorangnan na si Jesus, na amo a ipangadal ko a Maraay na Bareta manungud ka biyaya ka Diyos. 25 ?Isi kong uda ni isay man kaninyong manga pinag-osipan ko manungud ka kahadian ka Diyos a makababayad kanaku otro. 26 Kaya sinasabi ko kaninyo ngowan, na kin agko mapaamak kaninyo, buku na ako a agko kasalan. 27 Ta diri ako nagdorodarwa na ipag-osip a bilog na katoyowan ka Diyos. 28 Ingatan ninyo a kaninyong manga sadiri sagkud a bilog na kapagtiriponan na ipinapaataman kaninyo ka Espirito Santo. Atamanun ninyo a simbaan ka Diyos na binalokat niya sa paagi ko kagranan ko kanyang Igin. 29 Isi ko sa paggalin ko, luluugun kamo sa manga botigun na paratottoro, sagkud diri nira palilibriyun a manga paratobod. 30 Galin man sana kaninyo, lomolowas a manga tawong migngabil sa kabotigan tanganing mapasonod nira a manga paratobod. 31 Kaya magmaan kamo! Rumrumun ninyo, sa luug sa tolong taon diri ako pinnondo sa pagtottoro sa kada usad kaninyo, alduw gab-i na kaiba a paglowa.
32 ?Ngowan, itinotogon ko kamo sa Diyos sagkud sa oosipun niya na nagpapabayad ka kanyang biyaya, na migpakusug kaninyo sagkud migtao sa pamana na itinagama niya sa manga banal. 33 Diri ko pinag-intresan a kiisay man na plata, bolawan o bado. 34 Isi ninyo na nagtrabawo ako tanganing magkaagko kami ka ngamin namung kaipowan. 35 Sa ngamin kong ginibo, ipinabayad ko kaninyo sa arug kading maigut na pagtatrabawo kaipowan tang tabangan a manga maloloya, sagkud rumrumun ta a oosipun ka Kagorangnan na si Jesus kin paono niya sinabing, ?Paladan a nagtatao ki sa nag-aako.?? 36 Pagkasabi niya kadi, tinniklod iya sagkud nangadying kaiba nira. 37 Ngamin sira nagboborang ginakus sagkud inarukan si Pablo. 38 Namundu sira saigo sadto sinabi niyang, diri na iya nira mababayad otro. Pagkatapos inatud nira iya paiyan sadto barko.