21
Pag-iyan sadto Jerusalem
1 Pagkapatuud namu kanda nagsakuy kami paiyan sadto Cos. Sonod na alduw, inniyan kami sadto Rodas sagkud paggalin sadto dinnagos kami sa Patara. 2 Nakatorak kami sa barkong paiyan sa Fenecia, kaya linnonad kami. 3 Pagkatapos namung matan-aw so Chipre dinnagos kami sa parteng wala anggan sa makaabot kami sa Siria. Rinnoong kami sa Tiro, ta agko sadto ididiskargang kargamento. 4 Inanap namu so manga disipolo sadto sagkud nakidagos kami sadto kanda sa pitong alduw. Sa paagi ka Espirito Santo pinataniran nira si Pablo na diri magdagos sadto Jerusalem. 5 Pagkatapos ko pitong alduw, nagpadagos kami sa pagbyayi. So ngamin na paratobod sagkud so manga agom nira, pati na manga igin, iinatud kami sadto lowas ko banwaan. Pag-abot sadto pangpang tinniklod kami sagkud nangadyi. 6 Pagkatapos magpatuud sa kada usad, linnonad na kami sadto barko, sagkud napaoli naman sira.
7 Nagpadagos kami sa pagbyayi galin sa Tiro paiyan sadto Tolemaida sagkud kinomosta man namu so manga kangoran sa pagtobod sagkud nagpalipas kami sadto kanda sa usad na alduw. 8 Pagkatapos ko usad na alduw ginnalin na kami sagkud nakaabot kami sadto Cesarea. Dinnagos kami sadto baluy ni Felipe, usad na ebanghelista sagkud usad sa napili sadto pitong lalaki. 9 Agko iya upat na igin na raraga na manga propeta.
10 Ko nakapirang alduw na kami sadto, agko usad na propetang a ngaran Agabo so innabot galin sa Judea. 11 Rinnapo iya kanamu, kinoko so paha ni Pablo sagkud iginapos sadto sadiring tiil niya sagkud kamut, pangala, sinnabi, ?A Espirito Santo sinnabi, ?Arug kadi gagaposon ka manga Judio sadto Jerusalem a kagsadiri ka pahang adi sagkud itatao sa manga bukung Judio.??
12 Ko marungug namu adto, kami sagkud so manga tawo nakiosip ki Pablo na diri na iya mag-iyan sadto Jerusalem. 13 Alagad sinnimbag si Pablo, ?Ngata ta nagtatangis kamo sagkud pinaloloya ninyo a buut ko? Nakaanda ako buku sanang ipriso, kindi pati magraan sadto Jerusalem sa ngaran ni Jesus na Kagorangnan.? 14 Ko diri iya mapugulan, diri na kami nagparapipirit kaya sinabi na sana namung, ?Mangyari logod a kabutan ka Kagorangnan.?
15 Pagkatapos kadi, nag-anda na kami sagkud inniyan na sadto Jerusalem. 16 Inniba kanamu so ibang paratobod galin sa Cesarea sagkud dinara kami sadto baluy ni Mnason, na kanamung iistaran. A lalaking adi galin sa Chipre sagkud usad sa manga naonang nagin paratobod.
So Pag-abot ni Pablo sadto Jerusalem
17 Pag-abot namu sadto Jerusalem, maogma kaming sinabat ko manga ngod sa pagtobod. 18 Pagsonod na alduw, si Pablo saka so iba kanamu nakipagbayadan ki Santiago, isadto man so manga kagogorangan sa simbaan. 19 Kinomosta sira ni Pablo sagkud iinistorya so ngamin na ginibo ko Diyos sadto manga bukung Judio sa paagi ko ministeryo niya.
20 Ko marungug nira adto nag-omaw sira sa Diyos. Kaya sinabi nira ki Pablo, ?Nababayad mo, ngod, pirang ribong manga Judio a nagtobod sagkud sira ngamin nagkokoyog ka Layi. 21 Agko nakapagbareta kanda na nagtotottoro ika sa ngamin na Judio na nakaistar sa logar ka manga bukung Judio na bayaan a Layi ni Moises, sinasabi mo kono kanda na diri pagtoriun a manga igin nira o mamoway oyon sa kaogalian ta. 22 Ono a kanakaipowan tang gibowon? Maiisiyan an nira na innabot ika, 23 kaya koyogon mo a sasabiyun namu kanimo. Agko upat na lalaki sadi kanamu na agko panoga. 24 Ipag-iba mo sira, saka somabay ika kanda ka seremonya sa paglilinig sagkud bayadan mo a manga gastos nira, tanganing makapag-aris sira ka kandang manga payo. Pangala, maiisiyan ka ngamin na bukung matood so manga bareta na narungug nira manungud kanimo kindi namomoway ika sa pagsonod ka Layi ni Moises. 25 Manungud man ka manga bukung Judio na manga paratobod, pinadaraan namu sira sa sorat na diri sira magkaun sa iinapag sa manga diyosdiyosan, sa rogo, sa karneng galin sa manga ayup na natigbak na diri nakarogo sagkud diri manambay.?
26 Ko somonod na alduw ipinag-iba ni Pablo so manga lalaki saka naglinig ko kandang sadiri. Pangala inniyan sira sadto templo tanganing ipaisi kin kono so alduw ko pigtapos sa paglinig sagkud kin kono kaipowan na mag-atang so kada usad kanda.
Rinakup si Pablo sadto Luug ko Templo
27 Ko madali ng matapos so pitong alduw, so nagkapirang Judio na galin sa probinsiya ko Asya nabayad si Pablo sadto templo. Kaya bininsir nira so ngamin na tawo sagkud rinakup iya. 28 Nagkagrat sira, ?Manga taga Israel, tabangan ninyo kami! Amo adi so tawong nagtotottoro dawa sari kontra sa nasyon ta, sa Layi sagkud sa logar na adi. Pwera pa kan, inniba iya ngowan sa manga Griego sadi luug kading templo sagkud binasang-basang ading banal na logar.? 29 (Nabayad kaya nira si Trofimo na taga Efeso sadto syodad kaiba si Pablo kaya pag-una nira dinara iya ni Pablo sadto templo.)
30 Naribok so bilog na banwaan, nagpandalagan kanya so manga tawo sagkud kinaptan iya saka ginodgod palowas sadto templo, sagkud ginukpan tolos so trangkaan. 31 Mantang iniingoa nirang guranun iya, so bareta nakaabot sa komander ko manga soldados na taga Roma na so bilog na banwaan ko Israel nagkakaribok. 32 Iiniba tolos ko komander so manga opisyal sagkud soldados sagkud dinnalagan paiyan sadto katatawowan. Ko mabayad ko manga nagpaparibok so komander sagkud so manga soldados niya, pinondowan nira sa pag-ampak si Pablo.
33 Rinnapo so komander sagkud inaresto iya sagkud ipinagapos sa darwang kadena. Pangala, innonga kin siisay iya sagkud ono ginibo niya. 34 Manlainlain so ikinakagrat na simbag ko manga tawo. Ko diri maintindiyan ko komander so kamatoranan sa sobrang ribok, ipinagbuut niyang darawun si Pablo sadto kampo. 35 Pinag-antabayanan nira si Pablo sadto agranan, kinding kaagrisibo ko manga tawo kaya pinas-an iya ko manga soldados. 36 So manga tawong sinnosonod nagkakagrat, ?Guranun iya!?
Nagngabil si Pablo sadto manga Tawo
37 Ko iluug na ko manga soldados si Pablo sadto kampo, innonga iya sadto komander, ?Pwede ko raw ikang makaosip??
?Nakapagngangabil ika sa Griego?? simbag ko komander. 38 ?Bukung ika so Egipciong pinnoon sa kariribokan sagkud namoon sa riboribong rebelde sa disyerto kadto??
39 Sinnimbag si Pablo, ?Usad akong Judio, galin sa Tarso sa Cilicia, namamanwaan ka bantog na banwaan na adi. Togoti tabi akong makapag-osip sa manga tawo.?
40 Ko tinogotan iya ko komander, tinnindug si Pablo sadto agranan saka pinnasabot sadto manga tawo na diri pakaribok. Ko pomunuk na sira, nag-osip iya sa ngangabilun na Hebreo.