22
1 ?Manga ngod sagkud manga kag-igin, irunggun ninyo a depensa ko!? 2 Ko marungug nira iya na nag-oosip kanda sa Hebreo, lalo sirang nagtoninung.
Pangala sinnabi si Pablo, 3 ?Usad akong Judio ipinangigin sa Tarso ka Cilicia, alagad dinnakulu sadi syodad. Nag-eskwela ako ki Gamaliel sagkud maigut na tinottoroan na komoyog ka Layi ka kanatung manga ginikanan. Arug kaninyo nagsirbi ako sa Diyos sa bilog kong poso. 4 Sinulud ko sagkud ipinaguraan so manga parasonod ka Aagyana na adi, rinakup ko so manga babayi sagkud manga lalaki pagkatapos ipinapriso, 5 na dawa so pinakanamomoon ko manga padi sagkud so Konseho makapagpatonay. Tinawan nira ako sa sorat para sadto manga Judio sa Damasco. Kaya inniyan ako tanganing rakupun so manga parasonod ni Jesus pagkatapos darawun sadi Jerusalem tanganing pasakitan.
6 ?Modto kadto mantang nag-iiratung ako sa Damasco, pagngumunngumun agko biglang liwanag na galin sa langit so nagsilyab sa palibot ko. 7 Naolog ako sadto raga sagkud narungug ko so usad na boses na sinnabi kanaku, ?Saulo! Saulo! Ngata ta pinapadipisilan mo ako? ? 8 ? ?Siisay po ika, Kagorangnan?? onga ko.
? ?Ako si Jesus na taga Nazaret na pinapadipisilan mo? , simbag niya. 9 So manga kaiba ko nabayad so liwanag, alagad diri nira narungug so boses ko nakikiosip kanaku.
10 ? ?Ono a gigibowon ko, Kagorangnan?? onga ko.
? ?Bomowat ika,? sabi ko Kagorangnan, ?sagkud omiyan ika sa Damasco. Sadto sasabiyun kanimo a ngamin na kaipowan mong gibowon.? 11 Kinabit ako ko manga pag-iiba ko paiyan sadto Damasco ta so silaw ko liwanag na adto binota ako.
12 ?Agko usad na lalaki na a ngaran Ananias so innabot tanganing baydun ako. Iya a tawong nagkokoyog ka Layi sagkud iginagalang ka ngamin na Judio na nakaistar sadto. 13 Tinnindug iya sadto kaabay ko sagkud sinnabi, ?Ngod kong Saulo, makababayad na ika!? Kadto tolos binnalik so pagsilung ko sagkud nabayad ko iya.
14 ?Pangala sinnabi iya, ?A Diyos ka kanatung ginikanan pinili ika tanganing maisiyan mo a kanyang kabutan sagkud mabayad a Usad na Matanos sagkud marungug a kanyang oosipun. 15 Ika a magigin testigo niya sa ngamin na tawo kin ono so nabayad sagkud narungug mo. 16 Sagkud ngowan, ono a pig-uulat mo? Bomowat ika, magpabunyag tanganing sa pagbaoy mo ka kanyang ngaran maogas a kasalan mo.? ?
17 ?Ko bomalik ako sa Jerusalem sagkud mantang nangangadyi sadto templo, agko ipinabayad kanaku a Diyos. 18 Nabayad ko a Kagorangnan na nag-oosip, ?Madali!? sabi niya kanaku. ?Bayaan mo a Jerusalem, dali, ta diri nira aakoon a kanimong pagpatonay manungud kanaku.? ?
19 ? ?Kagorangnan,? simbag ko. ?Isi kading manga tawong adi na inniyan ako sa kada sinagoga tanganing ipapriso sagkud padipisilan so manga nagtotobod kanimo. 20 Ko guranun si Esteban na kanimong testigo, sadto po ako sagkud innoyon ko pagguraan kanya sagkud nagbantay ko bado ko manga ginnuraan kanya.? ?
21 Pangala a Kagorangnan sinnabi kanaku, ?Omagi ika, ipadadara ko ika sa arayo sadto bukung Judio.?
Si Pablo na Usad na Romano
22 So manga tawo nag-iirungug ki Pablo anggan sa sabiyun niya adi. Alagad pagkarungug kadtong sinabi niya, so manga tawo nagkagratan, ?Guranun a arug kan na tawo! Diri iya kaipowan na maboway!?
23 Mantang nagkakagratan sira sagkud inaapon so kandang manga alikbuy sagkud nagsasabwag sa talbo, 24 so namomoon, minandaan so manga soldados na darawun na si Pablo sadto kampo, tanganing latigowon sagkud ongaun kin ngata ta nagkakagrat so manga Judio kontra kanya. 25 Alagad ko nakagapos na iya sagkud lalatigowon na, sinnabi si Pablo ko opisyal na isadto, ?Tama raw sa layi ninyo na latigowon a usad na syodadanong Romano na diri pa napapatonayan na nagkasala??
26 Ko marungug adi ko opisyal, inniyan iya sadto namomoon sagkud sinnabi, ?Ono a gigibowon mo?? onga niya, ?A lalaking adi usad na syodadanong Romano.?
27 So namomoon inniyan ki Pablo sagkud innonga, ?Sabiyun mo kanaku, usad ikang syodadanong Romano??
?Amo,? simbag niya.
28 Pangala so namomoon sinnabi, ?Kinakaipowan kong magbayad sa dakulu tanganing magin syodadanong Romano.?
?Alagad ako syodadano na poon pa sa pagkapangigin kanaku,? simbag ni Pablo.
29 Dalidaling rinnayo so manga innoonga kanya. Nakatakot man so namomoon ta ipinagapos niya si Pablo dawa adi usad man sa manga syodadanong Romano.
Sadto Atobangan ko Konseho
30 Ko somonod na alduw, gostong maisiyan ko namomoon kin ono talaga so eksaktong rason kin ngata ta inakosaran si Pablo ko manga Judio. Ipinatangkas niya so kadena ni Pablo saka minandaan so manga namomoon ko manga padi sagkud so bilog na Konseho na magtipon. Pangala ipinakoko niya si Pablo sagkud pinaatobang kanda.