23
1 Tiniurungan ni Pablo so manga kagogorangan sadto Konseho sagkud sinnabi, ?Manga ngod ko, naboboway akong malinig a konsensya sa atobangan ka Diyos anggan sa alduw na adi.? 2 Pagkarungug kadi, so pinakanamomoon ko manga padi na si Ananias minandaan so nagtitindug na arani ki Pablo na takboon iya. 3 Pangala, sinnabi si Pablo kanya, ?A Diyos a migpadosa kanimo, parasaginsagin! Nakaula ika san tanganing osgaran ako oyon sa Layi, alagad diri mo kinokoyog a Layi sa pagmanda mo kanda na takboon ako!?
4 So manga nagtitindug sadto arani ni Pablo sinnabi, ?Iniinsolto mo a pinakanamomoon ka manga padi ka Diyos??
5 Sinnimbag si Pablo, ?Manga ngod, diri ko isi na iya a pinakanamomoon ka manga padi. Ta nasosorat, ?Diri kamo magngabil kontra sa namomoon ka kaninyong banwaan.??
6 Ko mabayad ni Pablo na so nagkapira sadto Konseho, manga Saduceo sagkud ibang manga Pariseo, kinnagrat iya, ?Manga ngod! Usad man ako na Pariseo, igin sa Pariseo. Iniimbestigaran ako sadi ngowan holi sa kanakung paglaom na a manga guraan bobowayun otro.? 7 Pagkatapos niyang sabiyun adi, nagdiskotir so manga Pariseo sagkud so manga Saduceo, sagkud nabanga so Konseho. 8 (A manga Saduceo nagsasabi na uda pagkaboway otro, sagkud uda manga anghel o espirito, alagad a manga Pariseo nagtotobod sa ngamin na adi.)
9 Sagkud kinnusug so kandang manga kagratan, sagkud so nagkapirang paratottoro ko Layi na manga Pariseo tinnindug sagkud nakipagdiskotir, ?Diri kami nakabayad sa ono man na sala sa tawong adi,? sabi nira, ?Paono kin a anghel o a espirito nakipag-osip kanya?? 10 Ko nagin mainit so pagdidiskotir nira, nakatakot so manga namomoon na baka guranun nira si Pablo, kaya pinababa niya so manga gwardiya sagkud ipinakoko si Pablo sagkud ipinaluug sadto kampo.
11 Sonod na gab-i, a Kagorangnan tinnindug sadto kaabay ni Pablo sagkud sinnabi, ?Kusgan mo a buut mo! Pareyo ko pinag-oosip mo manungud kanaku sadto Jerusalem, amo man a kinakaipowan mong gibowon sadto Roma.?
So Komplotan tanganing Guranun si Pablo
12 Sonod na alduw, nagkomplotan so manga Judio sagkud nanoga sira na diri migkaun sagkud mig-inom anggan na diri naguguraan si Pablo. 13 Agko sobra sa kwarentang katawo so kaiba sa komplotan na adi. 14 Inniyan sira sadto namomoon ko manga padi sagkud manga kagogorangan sagkud sinnabi, ?Nanoga kami ngamin na diri kami migkaun sagkud mig-inom sa ono man anggan na diri namu naguguraan si Pablo. 15 Kaya ngowan, kamo sagkud a Konseho a magsabi sadto namomoon ko manga soldados na Romano na darawun kaninyo si Pablo. Magrason kamo na gosto pa ninyong makakoko sa dakul na impormasyon manungud sa kaso niya. Anda na kami na guranun iya bago pa makaabot sadi.?
16 Alagad narungug adi ko makoama ki Pablo, kaya dinnalagan iya paiyan sadto kampo sagkud sinabiyan si Pablo. 17 Pangala binaoy ni Pablo so usad sa manga opisyal sagkud sinabi, ?Ibanan mo a solterong adi sadto namomoon ta agko kono sasabiyun kanya.? 18 Kaya dinara iya ko opisyal sadto namomoon, sagkud sinnabi, ?Si Pablo, usad na priso, pinaiyan ako sadi sagkud nakiosip kanaku na darawun a solterong adi kanimo ta agko iya sasabiyun.? 19 Kinabit ko namomoon so soltero, irinayo sagkud inonga, ?Ono a sasabiyun mo kanaku??
20 Sinnimbag iya, ?A manga Judio nagkomplotan na ayatun kanimo na darawun si Pablo sa atobangan ka Konseho udma sagkud saginsagin na oongaun sa manga impormasyon manungud kanya. 21 Diri kamo magtobod, ta agko sobra sa kwarentang katawo a nag-uulat kanya tanganing guranun iya. Nanoga sira na diri migkaun sagkud mig-inom anggan na diri iya naguguraan. Anda na sira ngowan sagkud nag-uulat ka kanimong permiso sa pakiosip nira.?
22 So namomoon pinaoli so soltero sagkud pinataniran, ?Diri mo pagsabiyun sa kiisay man a isinombong mong adi kanaku.?
Si Pablo Naglipat sadto Cesarea
23 Pangala, binaoy niya so darwa sa manga opisyal sagkud minandaan, ?Ianda ninyo a dosentos na soldados, kaiba a sitenta na nakakabayo sagkud dosentos na parapana pagkatapos omiyan kamo sa Cesarea ngowan na alas nowebe sa gab-i. 24 Mag-anda man kamo sa kabayo na kakabayowan ni Pablo sagkud iatud ninyo iya ki Gobernador Felix. Ingatan ninyo iya saigo.?
25 Nagsorat iya sa arug kadi:
26 Kagalanggalang na Gobernador Felix:
Ako si Claudio Lisias.
27 A lalaking adi rinakup ka manga Judio sagkud gatikot pa nirang guranun, alagad ipinag-iba ko so manga soldados sagkud ilinigtas iya, ta naisiyan ko na iya usad na syodadanong Romano. 28 Sa kagostowan ko na maisiyan kin ono a reklamo kontra kanya, ipinadara ko iya sadto Konseho nira. 29 Naisiyan ko na so sombong kanya manungud ko Layi, alagad uda sombong kanya na magigin rason tanganing guranun o ipriso iya. 30 Ko maisiyan kong pinag-uumaan iyang guranun, minaraay kong ipadara iya kanimo. Sinabi ko man sadto manga innaakosar kanya na sadi sira magpresentar kanimo ka kandang manga sombong.
31 Kinoyog ko manga soldados so iminamanda kanda, kaya kinagab-iyan kinoko nira si Pablo sagkud dinara sa Antipatris. 32 Sonod na alduw, so manga nakakabayo natagak tanganing ibanan si Pablo pagkatapos so manga soldados innoli na sadto kampo. 33 Pag-abot sadto Cesarea, itinao nira so sorat sadto gobernador sagkud inintrega si Pablo kanya. 34 Binasa ko gobernador so sorat sagkud inonga kin saring banwaan iya galin. Ko maisiyan na ko gobernador na si Pablo taga Cilicia, 35 sinabi niya, ?Iirunggun ko a sombong kontra kanimo kin so manga innaakosar kanimo omiyan na sadi.? Sagkud pinabantayan niya si Pablo sa palasyo ni Herodes.