24
So Pag-imbistegar sadto Atobangan ni Felix
1 Pagkaagi sa limang alduw, so pinakanamomoon ko manga padi na si Ananias kaiba so nagkapirang gorang sagkud usad na abogado na a ngaran Tertolo inniyan sa Cesarea, sagkud sinabi nira ki Gobernador Felix so manga sombong nira kontra ki Pablo. 2 Pagkabaoy ki Pablo, pinonan iyang isombong ni Tertolo sa atobangan ni Felix:
Kagagalang-galang na Felix, ?Namatian namu a mauban na katoninungan sa irarum ka pamamaala mo, sagkud manga importanteng pagbabago na ginibo mo para sa kaginnawaan ka nasyon namu. 3 Binibisto namu adi sagkud tuduk sa posong pinapasalamatan ika dawa sari sagkud dawa kono. 4 Alagad ta abu kong maabala ika, nakikiosip ako na irunggun mo a gatikot na sasabiyun namu kanimo.?
5 ?Naisiyan namu na ading lalaking adi pinagpoponan sa ribok. Pinariribok niya a manga Judio dawa saring logar. Iya amo a namomoon kana gropong Nazareno 6-7 sagkud pinorbaran na rautun a kanamung templo, kaya rinakup namu iya.a 8 Tapos, nagbuut si Lisias na omiyan kono kami sadi na manga nagsosombong kanya. Kin oongaun mo a lalaking adi maiisiyan mo a ngamin na isinosombong namu kontra kanya.?
9 So manga Judio na isadto nakioyon sagkud sinnabi man na so ngamin na sombong matood.
10 Kaya pinasabotan ko gobernador si Pablo na mag-osip, sagkud sinnabi iya, ?Kagalanggalang na Gobernador, isi ko po na mauban na ikang owis ka nasyon namu, kaya maogma ako na magdepensa sa atobangan mo. 11 Madali mo pong maiisiyan na uda pa doseng alduw ko omabot ako sa Jerusalem tanganing somamba. 12 A manga nagsosombong kontra kanaku diri ako nasompongan na nakikipagdiskotir sa kiisay man sadto templo, o naggigibo sa kariribokan sa sinagoga o dawa saring logar sadto syodad. 13 Sagkud diri nira napatonayan kanimo so manga sombong na ginigibo nira kontra kanaku. 14 Inaako ko na nagsamba ako sa Diyos ka kanamung manga ginikanan oyon sa Aagyan na binabaoy nirang sekta. Alagad nagtotobod man ako sa ngamin na nasosorat sa Layi sagkud sa manga libro ko propeta. 15 Arug nira, nagtotobod man ako na bobowayun otro ka Diyos a ngamin na tawo, matanos man o maraut. 16 Kaya nag-iingoa ako na magkaagko malinig na poso sa atobangan ka Diyos sagkud ka tawo.?
17 ?Pagkatapos sa nagkapirang taon na uda ako sa Jerusalem, binnalik ako ta gosto kong daraan sa tabang so manga kabanwaan ko, sagkud mag-atang sa Diyos. 18 Arug po kan so ginigibo ko, ko maabotan nira ako sadto templo, matapos na gibowon so paglilinig oyon sa Layi. Nagkapira sana so tawo sadto sagkud uda man kariribokan. 19 Alagad agko sadto manga Judio na galin sa Asya, na nakabayad kanaku, sira kintana so inniyan sadi tanganing magsombong kin agko sira kaipowan na isombong kontra kanaku. 20 O sabiyun ka manga tawong sadi ngowan kin onong karatan a naginibo ko, ko iatobang nira ako sa Konseho 21 pwera ka usad na bagay na ikinakagrat ko sa pagtindug sa atobangan nira. ?Sinisintinsyaan ninyo ako ngowan ta nagtotobod ako na a manga guraan bobowayun otro.? ?
22 Ta si Felix agko pagkaintindi manungud ka Aagyan na adi, pinapondo ngona niya so pag-iimbistegar sagkud sinnabi, ?Pag-abot ni Lisias saka ako migtao sa desisyon ka sombong ninyo.? 23 Minandaan niya so opisyal na tawan si Pablo sa gwardiya alagad diri pakaigpitan, sagkud tawan sa permiso so manga amigo niya na magdara ko manga kaipowan niya.
24 Makaagi so nagkapirang alduw, innabot si Felix kaiba so kanyang agom na si Drusila na usad na Judia. Ipinabaoy niya si Pablo sagkud nag-irungug ko pig-oosip niya manungud ko pagtobod ki Cristo Jesus. 25 Alagad ko nag-oosip na si Pablo manungud sa matanos na pamomoway, pagpupugul sa sadiri, sagkud a manungud sa mig-abot na pag-ookom, nakatakot si Felix sagkud sinnabi, ?Tama na ngona! Makagagalin na ika. Ipababaoy ko na sana ika otro kin agko na ako panawon.? 26 Naglalaom iya na si Pablo migtao sa lagay tanganing palowasun iya, kaya pirmi niyang ipinapabaoy si Pablo tanganing kaosipun. 27 Pagkaagi sa darwang taon, si Felix nasalidaan ni Porcio Festo bilang gobernador, alagad sa kagostowan ni Felix na matawan sa pabor so manga Judio, binayaan niya si Pablo sadto prisowan.