25
So Pag-imbistegar sadto Atobangan ni Festo
1 Innabot si Festo sadto banwaan na pinamamaalaan niya. Pagkaagi sa tolong alduw, inniyan iya sadto Jerusalem galin sa Cesarea. 2 So namomoon ko manga padi sagkud manga Judio dinara so sombong nira ki Festo kontra ki Pablo. 3 Nakiosip sira ki Festo na ibalik si Pablo sadto Jerusalem. Agko sira plano na ukpan si Pablo sa aagyan tanganing guranun. 4 Si Festo sinnimbag, ?Si Pablo nakapriso sadto Cesarea, bomabalik ako sadto sa diri mauban na panawon. 5 Paibanun ninyo kanaku a namomoon kaninyo, sagkud iya a magsombong kin a tawong adto agko kasalan.?
6 Nagpalipas pa si Festo sa walo o sampolong alduw sa Jerusalem bago binnalik sa Cesarea. Sonod na alduw, innula iya sadto korte sagkud iminanda na iatobang kanya si Pablo. 7 Ko si Pablo omatobang kanya, pinalibotan iya ko manga Judio na galin sa Jerusalem sagkud isinombong iya nira sa manga magugubat na bagay, alagad diri man nira napamatoran. 8 Pangala sinabi man ni Pablo so depensa niya, ?Uda ako naginibo na maraut kontra sa Layi ka manga Judio o kontra sa templo o kontra sa Emperador.?
9 Gosto ni Festo na gibowan sa pabor so manga Judio, kaya inonga niya si Pablo, ?Gosto mong omiyan sadto Jerusalem tanganing sadto ta ika imbistegaran??
10 Sinnimbag si Pablo, ?Sadi na ako atobangan ka korte ka Emperador, kin sari ako kaipowan na imbistegaran. Naiisiyan mo na uda ako nagiginibong sala kontra sa manga Judio. 11 Kin nakagibo ako sa karatan na kaipowan akong guranun, aakoon ko a kagranan. Alagad kin uda man kamatoranan a manga sombong nira kanaku, uda sira karapatan na itao ako kanda. Mig-apelar ako sa Emperador!?
12 Kinaosip ni Festo so Konseho sagkud pangala sinabi niya, ?Nag-apelar ika sa Emperador, kaya sa Emperador ika omiyan!?
Kinonsolta ni Festo si Hading Agripa
13 Makaagi so nagkapirang alduw, innabot si Hading Agripa sagkud so agom niyang si Berenice sadto Cesarea tanganing mangomosta ki Festo. 14 Ko nagkapirang alduw na sira sadto, iinistorya ni Festo sadto hadi so kaso ni Pablo. Sinabi niya, ?Agko sadi lalaki na binayaan ni Felix sa prisowan. 15 Ko omiyan ako sadto Jerusalem, so namomoon ko manga padi sagkud so manga kagogorangan nagsombong kontra kanya, sagkud inayat na kondenarun iya.
16 ?Sinabiyan ko sira na bukung ogali ka usad na Romano a magkondenar sa kiisay man na diri ngona atobangun ka isinosombong so manga nagsosombong, sagkud makapagdepensa kontra sa manga sombong kanya. 17 Kaya ko omiyan sira kanaku, diri ko na pinauban so sombong, kinaramragan, innula ako sadto korte, sagkud ipinabaoy ko a tawong adi. 18 Ko so manga nagsosombong tomindug sagkud mag-osip, diri sira nagsombong sa magugubat na kaso arug ko pinag-uuna ko. 19 A pinaglalabanan nira amo a manungud ka kandang pagtobod sagkud a manungud sa usad na guraan na lalaki na a ngaran Jesus na sinasabi ni Pablo na naboway otro. 20 Diri ko isi kin ono a gigibowon sa manga bagay na adi, kaya inonga ko iya kin gosto niyang sa Jerusalem imbistegaran. 21 Alagad nag-apelar si Pablo sagkud inayat na pabayaan na so Emperador na amo magdisisyon, kaya pinabantayan ko iya anggan sa ipadara ko sa Emperador.
22 Pangala, sinnabi si Agripa ki Festo, ?Gosto ko man na marungug a lalaking adi.? Sinnimbag iya, ?Udma marurungug mo iya.?
Si Pablo sadto Atobangan ni Agripa
23 Kinaramragan, si Agripa sagkud Berenice innabot kaiba so manga namomoon ko manga soldados sagkud so manga ginagalangan na tawo sa syodad sagkud linnuug sadto korte. Sa pagbuut ni Festo, dinara si Pablo sadto luug. 24 Sinnabi si Festo, ?Hading Agripa, sagkud a ngamin na isadi kaiba namu, nababayad ninyo a lalaking adi! A ngamin na manga Judio nagsombong kanaku manungud kanya sadto Jerusalem sagkud sadi Cesarea na nagkakagrat na diri iya kaipowan na maboway. 25 Naisiyan ko na uda iya naginibong sala tanganing guranun, alagad ta gosto niyang mag-apelar sa Emperador kaya nagdisisyon ako na ipadara iya sa Roma. 26 Alagad uda ako ikasosorat sa Emperador manungud kanya, kaya dinara ko iya sadi atobangan ninyo, orog na sa atobangan mo Hading Agripa, tanganing pagkatapos ka pag-iimbistegar agko man ako maisorat. 27 Ta sa pag-una ko bukung tama na ipadara a usad na priso kin uda malinaw na sombong kontra kanya.