26
1 Pangala, si Agripa sinnabi ki Pablo, ?Tinotogotan ko ikang mag-osip para sa sadiri mo.? Nagtao sa galang si Pablo sagkud nag-osip tanganing idepensa so kanyang sadiri. 2 ?Hading Agripa, ibinilang ko po na usad na dakulung pribileheyo a pag-atobang ko kanimo tanganing depensaan ko a ngamin na sombong ka manga Judio, 3 ta isi mo a ngamin na nakaogalian sagkud pinagdidiskotiran ka manga Judio. Kaya nakikimaerak ako kanimo na diri ika mapawut sa pag-irungug kanaku.
4 ?So manga Judio naiisiyan a ngamin na paagi ka pamomoway ko poon ko igin pa ako, sa kapinonan ka boway ko sa sadiri kong banwaan, sagkud magin sadto Jerusalem. 5 Bistado na nira ako sa mauban na panawon sagkud makapagpatonay sira kan kin gosto nira, na ako kaiba sa pinakadipisil na gropo sa kanamung relihiyon, naboway ako bilang usad na Pariseo. 6 Ngowan pinag-iimbistegaran ako sa paglaom ko sa panoga ka Diyos na ginibo niya sa manga ginikanan namu. 7 Amo adi so panoga na linalaoman ko doseng tribo kaya maigut sira na nagsisirbi sa Diyos alduw gab-i. Ta sa pagtobod na adi o Hading Agripa, ako isinombong ka manga Judio. 8 Ngata kaya ta kamong manga isadi diri nagtotobod na bobowayun otro ka Diyos a manga guraan?
9 ?Ako man kadto nag-una na kaipowan kong gibowon a ngamin na makakaya ko kontra sa manga parasonod ni Jesus na taga Nazaret. 10 Sagkud amo yan a ginibo ko sa Jerusalem. Sa kapangyariyan ko manga namomoon ko manga padi, ipinapriso ko so dakul na manga banal, sagkud ko masintinsyaan sira sa kagranan, usad ako sa manga binnoto kontra kanda. 11 Dakul na beses na inniyan ako sa manga sinagoga tanganing padipisilan sira, sagkud tanganing piritun na mag-osip sira kontra ki Jesus. Sa grabing kaungtan ko kanda, inniyan pa ako sa manga syodad sa ibang nasyon tanganing padipisilan sira.
12 ?Amo adi toyo ko, ko omiyan ako sadto Damasco, dara so kapangyariyan sagkud pagbuut galin sa manga namomoon ko manga padi. 13 Modto kadto, o Hading Agripa, mantang nasa aagyan ako, nakabayad ako sa liwanag galin sa langit, mas maliwanag sa alduw, na nagsisilyab sa palibot ko sagkud manga kaiba ko. 14 Naolog kami ngamin sadto raga, sagkud nakarungug ako sa boses na nagngangabil sa Hebreo, ?Saulo, Saulo, ngata ta pinadidipisilan mo ako? Dipisil para kanimo a somipa sa usad na matarum!?
15 Pangala, innonga ako kanya, ?Siisay po ika, Kagorangnan??
? ?Ako si Jesus, na kanimong pinadidipisilan,? simbag niya. 16 ?Tomindug ika! Nagpabayad ako kanimo tanganing gibowon ko ikang mamandaan sagkud testigo kin ono so manga nabayad mo kanaku sagkud kin ono a manga ipababayad ko kanimo. 17 Ililigtas ko ika sa manga Judio sagkud bukung manga Judio. Ipadadara ko ika kanda 18 tanganing maboklat a kandang manga mata sagkud tomalikod sira sa kangitngitan paiyan sa kaliwanggan, sagkud sa kapangyariyan ni Satanas paiyan sa Diyos, tanganing makarisibi sira sa kapatawaran ka kandang manga kasalan sagkud makaiba sadto manga binanal, ta nagtobod sira kanaku.? ?
19 ?Kaya, o Hading Agripa, sinonod ko tabi so kapaayagan na ipinabayad kanaku ka Diyos galin sa langit. 20 Ona sa Damasco, pangala sa Jerusalem sagkud sa bilog na Judea, sagkud sa bukung Judio man, ipinangadal ko na kaipowan sirang magsulsul sagkud bomalik sa Diyos sagkud ipabayad sa gibo na sira nagsulsul na. 21 Amo yan a rason kin ngata a manga Judio rinakup ako ko sadto ako templo sagkud pinorbaran na guranun. 22 Alagad sagkud sa alduw na adi tinabangan ako ka Diyos, kaya sadi ako ngowan nagpapatonay sa ngamin na tawo sadit man o dakulu. Uda ako ibang sinasabi kindi so manga sinabi ko propeta sagkud ni Moises na mingyari 23 na si Cristo migtius sagkud amo onang maboboway otro, tanganing magtao sa liwanag sa manga Judio sagkud sa manga bukung Judio.?
24 Mantang nag-oosip pa si Pablo ko kanyang depensa, sinilyakan iya ni Festo, ?Uda ika sa tamang pag-iisip, Pablo! A sobra mong kadonongan amo a nagpapakapay kanimo.?
25 ?Buku po akong kapay, kagalang-galang na Festo,? sabi ni Pablo. ?A sinasabi ko matood sagkud rasonable. 26 So hadi pamilyar ka manga bagay na adi, kaya makusug a buut kong nakipag-osip kanya. Nagtotobod ako na uda natatago kanya, ta diri adi nangyari sa usad na kanto. 27 Hading Agripa, nagtotobod ika sa manga propeta? Isi ko na amo.?
28 Pangala, si Agripa sinnabi ki Pablo, ?Pag-una mo sa arug kadi kaatlukut na panawon mabibinsir mo ako na magin Cristiyano??
29 Sinnimbag si Pablo, ?Magin sa atlukut o maabang oras, nangangadyi ako sa Diyos na buku sanang ika kindi a ngamin na nag-iirungug kanaku ngowan magin arug ko, pwera ka kadenang adi.?
30 So hadi tinnindug, kaiba so gobernador sagkud si Berenice sagkud so ngamin na nakaula sadto. 31 Paglowas nira, nangag-osip-osip sira sagkud sinnabi, ?A lalaking adi uda man nagibong maraut tanganing guranun iya o ipriso.?
32 Sinnabi si Agripa ki Festo, ?A lalaking adi pwede nang palowasun kin diri sana iya nag-apelar sa Emperador.