28
Naboway Otro si Jesus
(Mk. 16:1-10; Lk. 24:1-12; Jn. 20:1-10)
1 Ko matapos na so Alduw ka Pagpapaingalo sagkud mararamragun sa Domingo, inniyan sadto lulubngan si Maria Magdalena kaiba so usad pang Maria. 2 Pagkangumunngumun biglang nagkaagko makusug na linog, innabot so usad na anghel ka Kagorangnan na galin sa langit. Pinaligid niya so bato na nakagukup sadto lulubngan, saka innula sadto ibabuw. 3 So lalawgun niya malangliwanag na bagana kitkilat, sagkud so bado niya malangpoti, arug sa yelo. 4 Nangubugkubug so manga bantay ta nakatakot sira saigo, pangala nagkatotomba sira na bagana guraan.
5 Alagad, sinabi ko anghel sadto manga babayi, “Diri kamo makatakot. Isi ko na inaanap ninyo si Jesus na ipinako sa kros. 6 Uda na iya sadi, naboway na iya otro, arug ko sinabi niya. Mayang kamo, baydun ninyo so binatangan niya. 7 Pangala, pomaoli kamo tolos sagkud sabiyun ninyo sadto manga disipolo na naboway iya otro sagkud maoona iya kaninyong mig-iyan sadto Galilea. Sadto ninyo iya mababayad! Tandaan ninyo so sinabi ko kaninyo.” 8 Kaya dalidali sirang ginnalin sadto lulubngan, na nakatatakot sagkud pono sa kaogmaan na nagpandalagan tanganing baretaan so manga disipolo.
9 Pagkangumunngumun nasabat sira ni Jesus sagkud sinnabi, “A katoninungan mapakaninyo.” Rinapo nira si Jesus, kinaptan so manga tiil niya sagkud sinamba. 10 Pangala sinabiyan sira ni Jesus, “Diri kamo makatakot. Omagi kamo sagkud sabiyan ninyo so manga ngod ko na omiyan sira sadto Galilea, ta sadto nira ako mababayad.”
So Bareta ko manga Gwardiya
11 Mantang so manga babayi nag-aagi paoli, binnalik sadto syodad so nagkapira ko manga gwardiya na nagbabantay ko lulubngan sagkud sinabiyan so manga namomoon ko manga padi ko ngamin na nangyari. 12 Sagkud nakipagbayadan man adtong manga padi sadto manga namomoon ko manga Judio, sagkud nagkaoyon sira. Tinawan nira sa dakulung kwarta so manga gwardiya 13 sagkud sinnabi, “Sabiyun ninyo sa manga tawo na mantang natotorog kamo, innabot so manga disipolo ni Jesus pangala tinaban so bangkay niya. 14 Kin makaabot adi sa Gobernador kami na a mag-isplikar kanya. Uda kamo kaipowan na ikatakot.” 15 Kinoko ko manga bantay so kwarta sagkud ginibo nira so sinabi kanda. Kaya anggan ngowan amo adi a istoryang sinasabi ka manga Judio.
Isinobol ni Jesus so manga Disipolo Niya
(Mk. 16:14-18; Lk. 24:36-49; Jn. 20:19-23; Gibo 1:6-8)
16 Kaya, inniyan so onseng disipolo ni Jesus sa Galilea, sadto bokid na pinaiiyanan kanda ni Jesus. 17 Ko mabayad nira si Jesus, nagsamba sira ngamin kanya, dawa so iba nagdorodarwa. 18 Rinnapo si Jesus kanda sagkud sinnabi, “Itinao kanaku a ngamin na kapangyariyan sa langit sagkud sa raga. 19 Kaya iyanan ninyo a ngamin na tawo sa ngamin na nasyon sagkud gibowon ninyo sirang manga disipolo ko. Bunyagan ninyo sira sa ngaran ka Ama, Igin sagkud ka Espirito Santo. 20 Tottoroan ninyo sirang komoyog ka ngamin na iminamanda ko kaninyo. Rumrumun ninyo na pirmi ninyo akong kaiba anggan sa kataposan ka kinaban.”