27
Dinara si Jesus ki Pilato
(Mk. 15:1; Lk. 23:1-2; Jn. 18:28-32)
1 Kinaudmai malapakaamay, plinano ko ngamin na namomoon ko manga padi sagkud manga namomoon ko manga Judio kin paono ipaguguraan si Jesus. 2 Ginapos nira si Jesus sagkud dinara sadto ki Gobernador Pilato.
So Pagkagraan ni Judas
3 Ko maisiyan ni Judas na nagtraydor kanya na inosgaran na si Jesus sa kagranan, binasol niya so sadiri niya, sagkud ibinalik niya so trenta pidasong kwartang plata sadto manga namomoon ko manga padi sagkud manga namomoon ko manga Judio. 4 Sinnabi iya kanda, “Nagkasala ako! Holi ta trinaydor ko a usad na tawong uda kasalan.” Alagad sinnimbag sira, “Ono labut namu kan? Problema mo yan!”
5 Inapon ni Judas sadto Templo so kwartang plata pangala ginnalin na iya sagkud nagbitay.
6 Pinorot so manga kwarta ko manga namomoon ko manga padi sagkud sinnabi, “Kontra sa Layi na iiba a kwartang adi ka kwarta san Templo, holi ta ibinayad adi sa boway ka usad na tawo.” 7 Kaya nagkausad sirang ibakal adi sa raga sadto paragibo sa koron tanganing gibowon na lulubngan sa manga dayowan. 8 Kaya amo adi a rason na anggang ngowan a bokid na adto binabaoy na “Bokid na Binayaran sa Rogo.”
9 Sa paaging adi naotob so sinabi ni Propeta Jeremias, “Kinoko nira so trenta pidasong kwartang plata, so kantidad na pinagkaoyonan ko manga tagaIsrael na ibayad para kanya, 10 sagkud ibinakal sa raga sadto paragibo sa koron, oyon ko iminanda kanaku ka Kagorangnan.”
Inimbistigaran si Jesus sa Atobangan ni Pilato
(Mk. 15:2-5; Lk. 23:3-5; Jn. 18:33-38)
11 Iinatobang si Jesus sadto ki Gobernador Pilato, sagkud inonga iya, “Ika a Hadi ka manga Judio?” Sinnimbag si Jesus, “Ika na a sinnabi.” 12 Alagad ko akosaran iya ko manga namomoon ko manga padi sagkud namomoon ko manga Judio, diri na iya sinnimbag. 13 Kaya sinabiyan iya ni Pilato, “Diri mo narurungug a manga isinosombong nira kontra kanimo?” 14 Alagad diri basang sinnimbag si Jesus, dawa usad na oosipun, kaya nagngalas saigo so gobernador.
Inosgaran si Jesus sa Kagranan
(Mk. 15:6-15; Lk. 23:13-25; Jn. 18:39--19:16)
15 Kinaogalian na ka gobernador na kada Piyesta ka Paskowa, nagpapalowas iya sa usad na priso, siisay man a gostowon ka manga tawo. 16 Kadto agko usad na bantog saigo na maraut na priso na a ngaran Barrabas. 17 Kaya ko nagkatitipon so manga tawo, inonga sira ni Pilato, “Siisay a gosto ninyong palowasun ko, si Barrabas o si Jesus na binabaoy na Cristo?” 18 Isi ni Pilato na dinara nira si Jesus kanya holi sa pagkaori.
19 Mantang nakaula iya sadto osgado, pinatogonan iya ko agom niyang, “Diri ika makilabut sa tawong an na uda kasalan, ta ko so gab'i naporisaw ako saigo holi ko pangatorogan ko manungud kanya.”
20 Alagad sinolsolan ko manga namomoon ko manga padi sagkud manga namomoon ko manga Judio so manga tawo na ayatun ki Pilato na ipaguraan si Jesus. 21 Inonga sira otro ko gobernador, “Siisay sa darwang adi a gosto ninyong palowasun ko?” Sinnimbag sira, “Si Barrabas!” 22 Inonga sira ni Pilato, “Pangala, ono na gigibowon ko ki Jesus na binabaoy na Cristo?” Sinnimbag sira ngamin, “Ipako iya sa kros!” 23 “Ngata, onong karatan a naginibo niya?”
Alagad mas orog sirang rinnait, “Ipako iya sa kros!”
24 Ko mabayad ni Pilato na uda na iya magiginibo, sagkud mas orog pang nagkaribok so manga tawo, nagpakoko iya sa tobig pangala nanninuw ko kamut niya sadto atobangan ko manga tawo sagkud sinnabi, “Uda ako sasagoton sa kagranan ka tawong adi. Kagigibowan ninyo adi.”
25 Sinnimbag so ngamin na tawo, “Pananagotan namu sagkud ka manga igin namu a kagranan niya!” 26 Pangala iminanda niya na palowasun si Barrabas. Alagad si Jesus ipinabanug sagkud itinao sadto manga soldados tanganing ipako sa kros.
Pinadipisilan ko manga Soldados si Jesus
(Mk. 15:16-20; Jn. 19:2-3)
27 Dinara si Jesus ko manga soldados sadto palasyo ko gobernador sagkud natipon so usad na batalyon sadto upud niya. 28 Inobaan nira iya sagkud binadoan sa pang-alikbuy na porpora. 29 Ginnibo sira sa koronang todok sagkud ikinorona kanya. Pinagpakaptan nira kanya sadto toong kamut so usad na sogkod bilang setroa niya. Nangagtiklod sira sadto atobangan niya sagkud pinagtoyatoya iya, “Maboway a hadi ka manga Judio!” 30 Pagkatapos pinagparalostaban iya, sagkud kinoko so sogkod sagkud paorootrong pinokpok sadto payo niya. 31 Pagkatapos iyang pagtoyatoyaun, inobaan iya ko pang-alikbuy, sagkud binadoan ko dati niyang bado. Pangala ilinowas tanganing ipako sa kros.
Ipinako si Jesus sa Kros
(Mk. 15:21-32; Lk. 23:26-43; Jn. 19:17-27)
32 Ko palowas na sira sadto syodad, nasabat nira so usad na lalaking tagaCirene na a ngaran Simon. Pinirit nirang ipinapas-an kanya so kros ni Jesus. 33 Pag-abot nira sadto logar na binabaoy na Golgota, na buut sabiyun, “Logar sa Bongo,” 34 tinawan nira si Jesus sa alak na sinalakan sa apro. Alagad ko manamitan adi ni Jesus, diri niya adi ininom.
35 Ko maipako na iya sa kros, pinagbangabanga nira so bado niya sa paagi sa tawo gila. 36 Pagkatapos nangag-ula sira sadto tanganing bantayan si Jesus. 37 Nagbutang sira sa karatola sadto pamaywan ni Jesus na agko nakasorat na sawut kontra kanya, “Amo adi si Jesus, so Hadi ka manga Judio.” 38 Darwang mataban so kasabay niyang ipinako sa kros, so usad sadto too niya sagkud so usad sadto wala.
39 So manga tawong linnalabos nagkukuyungkuyung pa sagkud nagtotoyatoya kanya, 40 na sinnabi, “Bukung sinasabi mo na rurugmaun mo a Templo sagkud sa luug sa tolong alduw ititindug mo otro? Ngata ta diri mo iligtas a sadiri mo! Kin ika a Igin sa Diyos, bomaba ika sa kros na iton!” 41 Pinagtoyatoya man iya ko manga namomoon ko manga padi sagkud manga paratottoro sa Layi pati man so manga namomoon ko manga Judio na sinnabi, 42 “Ilinigtas niya a iba alagad diri niya mailigtas a sadiri niya! Bukung iya a Hadi ka Israel? Kin bomaba iya sa kros migtobod na kami kanya! 43 Nagtotobod iya sa Diyos sagkud sinasabi niyang iya Igin ka Diyos. Ngowan silngan ta kin baga iligtas iya ka Diyos!” 44 Pinagtoyatoya man iya ko manga mataban na ipinakong kaiba niya.
So Pagkagraan ni Jesus
(Mk. 15:33-41; Lk. 23:44-49; Jn. 19:28-30)
45 Ko alas dose na, nginnitngit so bilog na karagaan anggan sa alas tres sa apon. 46 Ko mig-alas tres na, rinnait si Jesus, “Eli, Eli, lema sabachthani!” Na a buut sabiyun, “Diyos ko, Diyos ko, ngata ta pinabayaan mo ako?” 47 Narungug adi ko manga nakatindug sadto, sagkud sinnabi, “Binabaoy niya si Propeta Elias!”
48 Dinnalagan tolos so usad kanda sagkud kinnoko sa espongha, pinasurup adi sa soka sagkud tinosok ko kalap pangala ipinasupsup ki Jesus. 49 Alagad so iba sinnabi, “Ulat ngona, baydun ta kin omabot si Propeta Elias tanganing iligtas iya!” 50 Alagad ko rinnait otro si Jesus, naotsan na iya.
51 Kadtong oras man sanang adto nabanga so kortina ko Templo, poon sadto itaas anggan sa ibaba. Naglinog sa bilog na karagaan sagkud nagkababaak so manga bato. 52 Naboksan so manga lulubngan, sagkud naboway otro so manga banal. 53 Linnowas sira sadto manga lulubngan. Pangala ko naboway otro si Jesus, inniyan sira sadto Jerusalemb kin sari dakul so nakabayad kanda.
54 Nakatakot saigo so kapitan sagkud so manga soldados na nagbabantay ki Jesus ko mamatian nira so linog sagkud ko mabayad nira so ngamin na nangyari. Kaya sinnabi sira, “Tonay mananggayud na, na iya a Igin sa Diyos!”
55 Kadakul man na manga babayi na nagtatan'aw galin sadto arayo. Sinnonod sira ki Jesus galin pa sa Galilea sagkud nagsirbi kanya. 56 Kaiba nira si Maria Magdalena, si Maria na kag-igin nira ni Santiago saka Jose, sagkud so agom ni Zebedeo.
So Paglubung ki Jesus
(Mk. 15:42-47; Lk. 23:50-56; Jn. 19:38-42)
57 Ko miggagab'i na, innabot so usad na mayaman na tagaArimatea, na a ngaran Jose. Usad man iya sa manga disipolo ni Jesus. 58 Rinnapo iya ki Pilato sagkud inayat so bangkay ni Jesus. Iminanda man ni Pilato na itao adi kanya. 59 Kaya kinoko ni Jose so bangkay sagkud pinotos adi sa malinig na telang lino, 60 pangala ilinubung niya adi sa lulubngan na bago pa sanang iokit sa bato na ipinagibo niya para sa sadiri niya. Pagkatapos pinaligid niya so dakulung bato tanganing gukpan so pwertaan ko lulubngan, saka ginnalin. 61 Isadto si Maria Magdalena sagkud so usad pang Maria na nakaula sadto atobangan ko lulubngan.
So manga Bantay sadto Lulubngan
62 Ko somonod na alduw, pagkatapos ko Alduw ka Pagpapaingalo, inniyan sadto ki Pilato so manga namomoon ko manga padi sagkud so manga Pariseo, 63 sagkud sinnabi, “Gobernador, narumruman namu na ko naboboway pa so botigun na adto, sinnabi iya, ‘Pagkaagi sa tolong alduw maboboway ako otro.’ 64 Kaya maraay gayud kan pabantayan mo saigo so lulubngan anggan sa tolong alduw, ta baka omiyan sadto so manga disipolo niya sagkud tabanun so bangkay, pangala sabiyun sa manga tawo na naboway iya otro. A kabotigan na adi mas maraut pa kisa ko naona.” 65 Sinnimbag si Pilato, “Agko kamo manga gwardiya, pabantayan ninyo saigo so lulubngan.” 66 Kaya inniyan sira sadto lulubngan sagkud sinilyowan so bato sagkud pinabantayan tanganing masigorong diri adi pakilalabutan sa kiisay man.