Mateo 26

A Planong Pagguraan ki Jesus

(Mk. 14:1-2; Lk. 22:1-2; Jn. 11:45-53)

¹ Pagkatapos na sabiyun adi ngamin ni Jesus, sinabiyan niya so manga disipolo niya, ² “Isi ninyong darwang alduw na sana, omaabot na a Piyesta ka Paskowa. Sagkud akong Igin sa Tawo itatao sa manga tawong kinnokontra kanaku tanganing ipako sa kros.”

³ Ko manga oras man na adto nangagtipon so namomoon ko manga padi sagkud so manga namomoon ko manga Judio sadto patyo ko palasyo ni Caifas, so pinakanamomoon ko manga padi. ⁴ Plinano nira kin paono rarakupun si Jesus na diri isi ko manga tawo pagkatapos ipaguraan. ⁵ Sinabi nira, “Diri ta adi paggibowon sa alduw ka Paskowa ta baka magkaribok a manga tawo.”

Binoboan sa Paamot si Jesus sadto Betania

(Mk. 14:3-9; Jn. 12:1-8)

⁶ Ko si Jesus sadto Betania, sadto baluy ni Simon na pudpurun, ⁷ rinnapo kanya so usad na babaying agko iya darang lulugan na alabastro na pono sa mamalun na paamot. Mantang nagkakaun si Jesus ibinobo adi sadto payo niya. ⁸ Ko mabayad adi ko manga disipolo niya, naungut sira, “Ngata ta sinayang a paamot na an?” Onga nira. ⁹ “Ikinapabakal kintana yan sa maal tanganing so kabaklan ipinanao sadto manga pobre.” ¹⁰ Alagad isi ni Jesus so sinasabi nira kaya sinnabi iya, “Ngata ta riniribok ninyo a babaying adi? Ginnibo iya sa maraay na bagay kanaku. ¹¹ Ta pirmi ninyong kaiba a manga pobre, alagad ako diri ninyo makaiiba sa ngamin na panawon. ¹² A pagbobo niya sa paamot sa awak ko, usad na pagpriparar ka paglubung kanaku. ¹³ Sinasabi ko kaninyo a kamatoranan, sari man ipangadal a Maraay na Baretang adi sa bilog na kinaban, sasabiyun man a ginibo niyang adi sa pagrumrum kanya.”

Nakipag-oyon si Judas na Traydoron si Jesus

(Mk. 14:10-11; Lk. 22:3-6)

¹⁴ Usad sadto Dose na a ngaran Judas Iscariote, so inniyan sadto manga namomoon ko manga padi. ¹⁵ Sagkud innonga, “Ono a itatao ninyo kanaku kin tabangan ko kamong marakup si Jesus?” Kadto tolos tinawan si Judas sa trentang pidasong kwartang pirak. ¹⁶ Poon kadto innanap na iya sa oportonidad tanganing maiparakup si Jesus.

Sinabi ni Jesus na Tatraydoron Iya

(Mk. 14:12-16; Lk. 22:7-13, 21-23; Jn. 13:21-30)

¹⁷ Ko onang alduw ko Piyesta sa Tinapay na uda Lebadora, rinnapo ki Jesus so manga disipolo niya sagkud innonga, “Sari po ninyo gostong ianda namu a panggab-iyan para sa Paskowa?”

¹⁸ Sinnimbag si Jesus, “Omiyan kamo sadto syodad ka Jerusalem sagkud anapun ninyo a tawong adi. Saka sabiyun ninyo kanya, ‘Ipinapasabi tabi ni Maestro na innabot na a oras na iya guguranun. Sagkud gosto niyang isilibrar a panggab-iyan para sa Paskowa sa baluy mo.’ ”

¹⁹ Kaya sinonod nira so iminanda ni Jesus, sagkud inanda nira so panggab'iyan para sa Paskowa.

²⁰ Ko naggagagab'i na, nagkaun si Jesus sagkud so doseng disipolo. ²¹ Mantang nagkakaun sira, sinabi ni Jesus kanda, “Sinasabi ko kaninyo a kamatoranan, usad kaninyo a migtraydor kanaku.”

²² Namundu so manga disipolo, sagkud usad-usad na innonga, “Buku pong ako yan Kagorangnan, ngani?” ²³ Sinnimbag si Jesus, “A kasabay kong domotdot ka tinapay sa tasa, amo a migtraydor kanaku. ²⁴ Akong Igin sa Tawo guguranun oyon ka sinasabi sa Kasoratan. Alagad erak man ka tawong migtraydor kanaku! Maraay pang diri na sana iya ipinangigin.” ²⁵ Pangala si Judas, na amo a migtraydor kanya nag-onga man, “Ako po, Maestro?” Sinnimbag si Jesus, “Amo, ika na a sinnabi.”

A Oltimong Panggab'iyan ka Kagorangnan

²⁶ Mantang nagkakaun sira, kinoko ni Jesus so tinapay, nagpasalamat sagkud binangabanga, pangala itinao niya sadto manga disipolo, sagkud sinnabi, “Akoa ninyo adi sagkud kaunun, nagrerepresentar adi ka kanakung awak.” ²⁷ Pagkatapos kinoko niya so alak, nagpasalamat sa Diyos pangala itinao kanda, sagkud sinnabi, “Ominom kamo ngamin kading alak. ²⁸ Ta amo adi nagrerepresentar ka kanakung rogo, na paboboloson para sa kapatawaran ka kasalan ka dakul na tawo. Adi nagpapamatood na agko na bagong kasondoan a Diyos sagkud manga tawo. ²⁹ Sinasabi ko kaninyo, diri na ako mig-inom kading alak na galin sa obas anggan sa alduw na inomon ko a bagong alak na kaiba ninyo sa kahadian ka kanakung Ama.” ³⁰ Pagkatapos nirang komanta sa himno, inniyan na sira sadto Bokid ko manga Olibo.

Ipinaayag ni Jesus so Pagnigar ni Pedro

(Mk. 14:27-31; Lk. 22:31-34; Jn. 13:36-38)

³¹ Pangala sinabiyan sira ni Jesus, “Ngowan na gab'i, kamo ngamin babayaan ako ta nasosorat, ‘Guguranun ko a paraataman sa karnero sagkud migkasoway-soway so ngamin na karnero.’ ³² Alagad sa pagkaboway ko otro, maoona ako kaninyo sadto Galilea.” ³³ Sinnimbag si Pedro, “Dawa bayaan ika nira ngamin, diri ta ika babayaan.” ³⁴ Sinimbag iya ni Jesus, “Sinasabi ko kanimo a kamatoranan, sa gab'i man na adi, bago tomottoraok a manok, tolong beses mo akong ninigaran.” ³⁵ Sinnimbag si Pedro kanya, “Dawa ako guranun na kaiba mo, diri ta ika ninigaran.” Arug man kan so sinabi ko iba pang disipolo.

Nangadyi si Jesus sadto Getsemani

(Mk. 14:32-42; Lk. 22:39-46)

³⁶ Pangala inniyan si Jesus sagkud so manga disipolo niya sa usad na logar na binabaoy na Getsemani. Sagkud sinabiyan niya sira, “Sadi ngona kamo, ta mingngadyi ako sadto oroonaan.” ³⁷ Ipinag-iba niya si Pedro sagkud so darwang igin ni Zebedeo. Nakamati iya sa grabing kamunduan sagkud kaporisawan. ³⁸ Pangala sinabiyan niya sira, “Bagana ako migraan sa grabing kamunduan! Sadi ngona kamo sagkud ibanan ninyo akong magpirot.”

³⁹ Pakaoroonaan niya, dinnapla iya sagkud nangadyi, “Ama ko, kin pwede, likayan kanaku a kopang adi, alagad bukung a kabutan ko, kindi a kabutan mo a makoyog.”

⁴⁰ Pangala binalikan niya so tolong disipolo, sagkud naabotan niya sirang torog. Sinabi niya ki Pedro, “Talagang diri kamo makapagpirot dawa usad na oras na kaiba ako? ⁴¹ Magpirot kamo sagkud mangadyi tanganing diri kamo madaug sa sogot. A espirito andang somonod alagad a awak ninyo maloya.”

⁴² Sa pangarwang beses binayaan niya so tolo sagkud nangadyi, “Ama ko, kin kinakaipowan na agyan ko a manga kadipisilan na adi mangyari logod a kabutan mo.” ⁴³ Pagkatapos binalikan niya otro so manga disipolo niya sagkud naabotan na naman niya sirang torog, sagkud diri naboboklat so manga mata sa kapirotan.

⁴⁴ Kaya binayaan na naman niya sira sagkud nangadyi iya sa ikatolong beses sa pareyong pangadyi. ⁴⁵ Pangala binalikan niya so manga disipolo sagkud sinnabi, “Torog pa nanggayud na kamo sagkud nagpapaingalo? Silngi ninyo, innabot na a oras na akong Igin sa Tawo itatao sa manga makasalan. ⁴⁶ Bangon na kamo, mosna. Isadi na a migtraydor kanaku!”

So Pagrakup ki Jesus

(Mk. 14:43-50; Lk. 22:47-53; Jn. 18:3-12)

⁴⁷ Mantang nagngangabil pa si Jesus, innabot si Judas, usad sadto doseng disipolo. Dakul iyang kaiba na agko dorodarang manga sondang sagkud pamokpok. Iminanda sira ko namomoon na manga padi sagkud manga namomoon ko manga Judio. ⁴⁸ Bago pa sira omabot sadto, sinabiyan na sira ni Judas, “A sisinowon ko sa paagi sa aruk, amo yan a tawong toyo ninyo, rakpun ninyo iya.” ⁴⁹ Kaya rinapo ni Judas si Jesus sagkud sinisino, “Maraay na gab'i, Maestro!” Pangala inarukan iya. ⁵⁰ Sinabi ni Jesus kanya, “Amigo, gibowon mo na a toyo mo.”+\fr 26.50 \fq O kaya, \ft ‘Amigo, ono ta napaiyan ika sadi?’ Rinnapo so manga tawo sagkud rinakup iya. ⁵¹ Biglang inolbot ko usad na kaiba ni Jesus so sondang niya, sagkud tinigbas so mamandaan ko pinakanamomoon ko manga padi, sagkud natigbas so saloyong talinga kadi. ⁵² Alagad sinabiyan iya ni Jesus, “Isarong mo a sondang mo, ta a naggagamit sa sondang, migraan sa sondang. ⁵³ Diri mo isi na kin omayat ako sa tabang sa kanakung Ama labi pa sa doseng batalyon na manga anghel a ipadadara niya kanaku tolos? ⁵⁴ Alagad kin gigibowon ko adi paono maootob a sinasabi ka Kasoratan na nagsasabing amo adi kaipowan na mangyari?”

⁵⁵ Pagkatapos sinabiyan ni Jesus so manga tawo, “Ono ako mataban, ngata ta kaipowan pa ninyong magdara sa sondang sagkud pamokpok tanganing rakupun ako? Oroalduw na nagtotottoro ako sadto Templo, alagad diri ninyo ako rinakup. ⁵⁶ Alagad nangyari a ngamin na adi tanganing maotob a sinorat ko manga propeta.”

Kadto tolos binayaan iya ko ngamin na disipolo sagkud nagpandulag.

Dinara si Jesus sadto Konseho ka manga Judio

(Mk. 14:53-65; Lk. 22:54-55, 63-71; Jn. 18:13-14, 19-24)

⁵⁷ Dinara si Jesus ko manga rinnakup kanya sadto baluy ko pinakanamomoon na padi na si Caifas. Nagtitipon sadto so manga paratottoro sa Layi sagkud so manga namomoon ko manga Judio. ⁵⁸ Sinnonod man si Pedro sadto, alagad oroarayo iya ki Jesus. Linnuug iya sadto patyo ni Caifas sagkud nakiula sadto manga bantay tanganing maisiyan kin ono na nangyayari ki Jesus. ⁵⁹ Sadto luug so manga namomoon ko manga padi sagkud bilog na konseho nag-iingoang omanap sa manga tomitestigong migbotig kontra ki Jesus tanganing maosgaran iya sa kagranan. ⁶⁰ Alagad uda sira matorakan, dawa ngani kadakul ko sinnasabi sa maraut manungud kanya. Sa katapostaposi agko darwang innonaan ⁶¹ sagkud nagsabi, “Sinabi ka lalaking adi, na kaya niyang rugmaun a Templo ka Diyos sagkud sa luug sa tolong alduw itotogrok niya otro.”

⁶² Pangala tinnindug so pinakanamomoon ko manga padi sagkud innonga ki Jesus, “Uda ika maisisimbag sa manga sawut na adi kanimo?” ⁶³ Alagad diri sinnimbag si Jesus. Sinabiyan iya ko pinakanamomoon ko manga padi, “Sa ngaran ka boway na Diyos, sabiyun mo kanamu ngowan kin ika a Cristo, na Igin sa Diyos.” ⁶⁴ Sinnimbag si Jesus, “Ika na a sinnabi. Alagad sinasabi ko kaninyo ngamin, poon ngowan, mababayad ninyo akong Igin sa Tawo na nakaula sa too ka Makapangyariyan na Diyos, sagkud mababayad man ninyo akong nasa panganoron na innaabot sadi kinaban.” ⁶⁵ Ko marungug adi ni Caifas, rinapak niya so bado niya sagkud sinnabi, “Iniisip ka lalaking adi na kapareyo niya a Diyos! Diri ta na kaipowan a testigo. Narungug na ninyo ngowan a pagkontra niya sa Diyos! ⁶⁶ Ono ngowan a desisyon ninyo?”

“Kaipowan iyang guranun!” Simbag nira.

⁶⁷ Linostaban nira si Jesus sa lalawgun niya sagkud pinagsosontok. Sinampaling man iya ko iba ⁶⁸ sagkud sinnabi, “Cristo, tukri raw, kin siisay a sinnampaling kanimo!”

Pinagnigaran ni Pedro si Jesus

(Mk. 14:66-72; Lk. 22:56-62; Jn. 18:15-18, 25-27)

⁶⁹ Ko oras na adto mantang nakaula si Pedro sadto patyo, rinnapo kanya so usad na mamandaan na babayi sagkud sinnabi, “Kaiba man ika ni Jesus na tagaGalilea.” ⁷⁰ Alagad pinagnigaran adi ni Pedro sa atobangan nira ngamin sagkud sinnabi, “Diri ko isi kin ono a manga pinagsasabi mo.” ⁷¹ Pangala inniyan iya sadto pwertaan ko patyo, agko usad na babayi so nakabayad kanya sagkud sinnabi sadto manga tawo, “A lalaking adi kaiba man ni Jesus na tagaNazaret.” ⁷² Alagad pinagnigaran adi otro ni Pedro na sinnompang, “Diri ko man bistado a tawong an!” ⁷³ Pagkangumunngumun, rinnapo ki Pedro so manga tawong nakatindug sadto sagkud sinnabi, “Matood talagang usad man ika sa kaiba nira, ta nabibisto ika sa pagngangabil mo.” ⁷⁴ Sinnimbag si Pedro, “Magraan man ako, talagang diri ko bistado a lalaking an.” Pagkangabil niya kadi nagtottoraok na so manok. ⁷⁵ Pangala narumruman niya so sinabi ni Jesus kanya, “Bago tomottoraok a manok, tolong beses mo akong ninigaran.” Linnowas iyang nagtatangis sagkud nalululduk saigo.