6
A Katottoroan manungud ka Pagtatao
1 “Magmaan kamo na bukung pagsaginsagin a paggibo ninyo sa karayan. Ta kin arug kan a gigibowon ninyo, uda kamo makokokong balus galin sa kaninyong Amang nasa langit.
2 Kaya kin kamo migtao sa manga nangangaipo, diri ninyo yan ipamareta, arug ko ginibo ko manga parasaginsagin sadto sinagoga sagkud sa manga aagyan, tanganing omawun ka manga tawo. Ta sinasabi ko kaninyo a kamatoranan, naresibi na nira so balus kanda. 3 Alagad kin ika migtao sa nangangaipo, diri mo na ipagpaisi dawa sadto pinakaamigo mo, 4 tanganing ilum a kanimong pagtao. Sagkud a kanimong Ama na nakababayad ka ginibong ilum, amo a migbalus kanimo.”
A Katottoroan manungud ka Pangangadyi
(Lk. 11:2-4)
5 “Sagkud kin kamo mingngadyi, diri kamo omarug ka manga parasaginsagin, ta mala nira ka gostong mangadying nakatindug sa sinagoga sagkud sa manga kanto ka aagyan tanganing mabayad ka manga tawo. Sinasabi ko kaninyo a kamatoranan, naresibi na nira so balus kanda. 6 Alagad, kin kamo mingngadyi, lomuug kamo sa kwarto ninyo, isarado a pwertaan sagkud mangadyi sa kaninyong Amang diri nababayad. Sagkud a kaninyong Ama na amo a nakababayad ka ginigibo ninyong ilum, a migbalus kaninyo. 7 Saka kin kamo mingngadyi, diri kamo magparangabil sa uda kamutangan arug ka manga bukung Judio, ta nag-uuna sirang iirunggun sira holi ka dakul nirang oosipun. 8 Diri kamo omarug kanda, ta isi na ka kaninyong Ama kin ono a kaipowan ninyo bago pa kamo omayat.
9 Kaya, matuud kamo sa arug kading pangangadyi,
‘Kanamung Amang nasa langit,
sambawun logod ika ka manga tawo,
10 magpoon na logod a paghahadi mo,
koyogon a kabutan mo
sadi raga anggan sa langit.
11 Tawan mo tabi kami ka kanamung kakaunun sa oroalduw.
12 Patawara tabi kami ka kanamung manga kasalan,
arug ka pagpatawad namu ka manga nagkasala kanamu.
13 Sagkud diri mo itogot na madaug kami sa sogot,
alagad irayo mo kami ki Satanasa.’ ”
14 Pangala padagos na sinabi ni Jesus, “Ta kin pinapatawad ninyo a manga nagkakasala kaninyo, patatawarun man kamo ka kaninyong Amang nasa langit. 15 Alagad kin diri ninyo pinapatawad a manga nagkakasala kaninyo, diri man kamo patatawarun ka kaninyong Ama sa manga kasalan ninyo.”
A Katottoroan manungud sa Pag-aayono
16 “Kin kamo nag-aayono, diri kamo magpabayad sa mamundung lalawgun arug ka ginigibo ka manga para saginsagin, diri sira nag-iistira tanganing mamangno ka manga tawo na sira nag-aayono. Sinasabi ko kaninyo a kamatoranan, naresibi na nira a balus kanda. 17 Alagad kin nag-aayono ika, manramos ika sagkud osayun mo a kanimong book, 18 tanganing diri mamangno ka manga tawo na ika nag-aayono, kindi a kanimong Ama na diri mo nababayad amo sana a makaiisi kadi. Sagkud iya na nakababayad ka ginigibo mo sa ilum a migbalus kanimo.”
A Kayamanan sadto Langit
(Lk. 12:33-34)
19 “Diri kamo magtipon sa kayamanan sadi kinaban, ta agko sadi bokbok sagkud takla na nangraraut, saka manga mataban. 20 Kindi gibowon ninyo a manga makapaoogma sa Diyos arug sa pagtipon sa kayamanan sadto langit, ta uda sadto bokbok sagkud taklang minraut saka uda manga mataban. 21 Ta kin ono a maalaga kanimo, sadto man a poso mo.”
A Matinao
(Lk. 11:34-36)
22 “A mata amo a nagsisirbing solo ka awak. Kin a manga mata mo maraay, a buut sabiyun matinao ika sagkud nababayad mo a kabutan ka Diyos. 23 Alagad kin a manga mata mo lubug, buut sabiyun maimut ika ka manga kayamanan sadi kinaban sagkud arug ika ka nasa kangitngitan. Kaya kin a liwanag na kaipowan isan kanimo uda, talagang nasa kangitngitan ika!”
A Diyos o Kayamanan
(Lk. 16:13; 12:22-31)
24 “Uda oripun na makapigsirbi sa darwang among. Ta kaooyaman niya a usad sagkud mabubutan a usad, o magigin maimbod iya sa usad sagkud ikaooyam a usad. Arug man kan diri mo pwedeng mabutan na sabay a Diyos sagkud a kwarta.”
Diri Maporisaw
25 “Kaya sinasabiyan ko kamo, diri kamo maporisaw manungud ka boway ninyo, kin ono kakaunun o iinomon, o manungud ka kaninyong awak, kin ono a sosopongon. Bukung mas importante a boway kisa pagkaun, sagkud a awak kisa bado? 26 Silngan ninyo a manga bayong, diri sira nagtatanum, nag-aani o nagsasaray sa kamalig, alagad pinakakaun sira ka kaninyong Amang nasa langit. Buku raw na mas importante kamo kisa kanda? 27 Siisay kaninyo a makapagparogang sa usad na minoto ka kanyang boway sa paagi ka pagporisaw niya?
28 Sagkud ngata kamo ta napoporisaw manungud ka pambado? Silngan ninyo kin paono tinnotobo a manga borak sa kadlagan, diri sira nagtatrabawo o nag-aabul sa bado nira. 29 Alagad sinasabi ko kaninyo, dawa si Solomon na malangyaman diri nakapagsopong sa badong arug kagayon ka manga borak na adi. 30 Kin binabadoan ka Diyos a manga doot sa kadlagan, na boway ngowan sagkud udma sosobsoban, kamo pa raw a diri niya badoan? Malakasadit ka pagtobod ninyo! 31 Kaya diri kamo maporisaw kin ono ninyo kakaunun, iinomon o babadoon. 32 Ta amo adi a ginigibo ka manga uda pagtobod sa Diyos. Isi ka kaninyong Amang nasa langit na kaipowan ninyo a manga adi. 33 Alagad orog sa ngamin ingowaun ninyong a Diyos a maghadi kaninyo sagkud mamoway oyon sa kabutan niya, saka itatao niya kaninyo a ngamin ninyong kinakaipowan. 34 Kaya ngani diri kamo maporisaw manungud sa kin ono mingyari ka kinaudmaan, ta agko man adi sadiring panawon tanganing kaporisawan. Tama na a manga problema ninyo sa kada alduw.”