18
Siisay a Pinakadakulu sa Paghahadi ka Diyos?
(Mk. 9:33-37; Lk. 9:46-48)
1 Ko oras man sanang adto, rinnapo ki Jesus so manga disipolo saka innonga, “Siisay po a pinakadakulu sa ngamin na nasasakupan ka paghahadi ka Diyos?” 2 Binnaoy si Jesus sa usad na igin sagkud pinatindug sadto atobangan nira. 3 Saka sinnabi, “Sinasabi ko kaninyo a kamatoranan, kin diri kamo magbago sagkud magin arug sa manga igin, diri kamo makaiiba sa pinaghahadian ka Diyos.
4 Kaya a siisay man na nagpapakababa na arug sa usad na igin, amo a pinakadakulu sa ngamin na nasasakupan ka paghahadi ka Diyos. 5 Sagkud a siisay man na omako ka igin na arug kadi holi kanaku, innaako kanaku.”
A Rason ka Pagkakasala
(Mk. 9:32; Lk. 17:1-2)
6 “Alagad a siisay man na nagigin rason ka pagkakasala ka usad na maloya pa sa pagtobod kanaku, maraay pa kanyang guran sa usad na dakulung bato sa liug sagkud iolog sa bitnga ka dagat. 7 Makaeerak a manga tawo sa kinaban na adi holi ka manga bagay na nagigin rason na magkasala sira! Kin sa bagay innaabot man talaga a manga adi, alagad erak man ka mingyari ka tawong nagigin rason na magkasala a kapwa niya!
8 Kaya ngani kin a kamut o tiil mo a nagigin rason ka pagkakasala mo, potolon mo yan sagkud iapon. Mas maraay pang lomuug ika sa langit na potol a kamut o a tiil kisa ka agko ika manga kamut o tiil alagad iaapon man sa impiyerno. 9 Sagkud kin a mata mo a nagigin rason ka pagkakasala mo, ilwatun mo yan sagkud iapon. Mas maraay pang makaiyan ika sa langit na bota a usad na mata kisa ka darwa a mata alagad iaapon man sa impiyerno.”
A Parabola ka Nauudang Karnero
(Lk. 15:3-7)
10-11 “Diri ninyo pag basangbasangun a usad sa manga maloloya sa pagtobod na adi. Ta sinasabi ko kaninyo, ‘A manga anghel nira pirming sa atobangan ka kanakung Amang nasa langit. a’ 12 Ono sa pag-una ninyo a gigibowon ka usad na tawong agko sanggatos na karnero kin so usad kadto mauda? Diri raw niya bayaan so nobenta e nwebe na nananabsab sadto kakolodan tanganing anapun so usad na nauda? 13 Sinasabi ko kaninyo a kamatoranan, kin natorakan na niya adi, mas ikaoogma niya adi kisa nobenta e nwebe na diri nauda. 14 Arug man kan a kabutan ka kaninyong Ama na nasa langit, abu niyang mapaamak dawa usad sa manga maloloya sa pagtobod na adi.”
A Ngod na Nagkasala Kanimo
(Lk. 17:3)
15 “Kin magkasala kanimo a ngod mo, iyanan mo iya sagkud kaosipun mo manungud ko ginibo niya. Kin mag-irungug iya kanimo, mapanonombalik mo a pagigin magngod ninyo. 16 Alagad kin diri iya mag-irungug kanimo, omiba ika sa usad o darwang ngod sa pagtobod tanganing a ngamin na pig-osipan ninyo mapamatoranan sa darwa o tolong testigo. 17 Kin abu niyang mag-irungug kanda, sabiyun mo adi sa simbaan. Sagkud kin pati sa simbaan diri pa iya mag-irungug, itrato mo iyang bukung Judio o parasingil sa bowis.”
A Itinotogot sagkud a Ipinagbabawal
18 “Sinasabi ko kaninyo a kamatoranan, a ono man na itogot ninyo sadi raga, itotogot man sadto langit, sagkud a ono man na ipagbawal ninyo sadi raga, ipigbawal man sadto langit. 19 Sinasabi ko kaninyo otro, kin a darwa kaninyo sadi raga magkaoyon na mangadying omayat sa ono man na bagay, itatao adi kaninyo ka kanakung Amang nasa langit. 20 Ta sari man na agko darwa o tolong nagkatipon holi sa ngaran ko, isan akong kaiba nira.”
Parabola manungud ka Mamandaan na diri Tattaong Magpatawad
21 Pangala rinnapo si Pedro ki Jesus sagkud innonga, “Kagorangnan, pirang beses ko pong patatawarun a ngod na pirming nagkakasala kanaku? Pitong beses po?”
22 Sinnimbag si Jesus, “Diri ko sinasabing pitong beses, kindi sitentang beses na makapito.
23 Ta a paghahadi ka Diyos arug ka usad na hadi na gostong papagbayadun so manga mamandaan niya na agko otang kanya. 24 Ona, dinara kanya so usad na agko otang na milyones. 25 Holi ta uda iya pambayad, iminanda ko hadi na ipabakal iya, so agom niya, so manga igin niya sagkud so ngamin niyang pagsorosadiri tanganing makabayad.
26 Pangala tinniklod na nakikimaerak so mamandaan sadto atobangan ko hadi, ‘Tawan mo pa tabi ako sa panawon, sagkud babayaran ko tabi a ngamin na otang ko.’ 27 Naerak kanya so hadi kaya pinatawad na so manga kaotangan niya sagkud pinaoli na iya.
28 Alagad pagkagalin sadto ko mamandaan nasabat niya so kapareyo niyang mamandaan na agko otang kanya na nagkapirang gatos. Dinagusu niya adi sagkud tinunguk na sinabi, ‘Magbayad ika ko otang mo!’
29 Tinniklod so pareyo niyang mamandaan sadto atobangan niya sagkud nakimaerak, ‘Tawan mo pa ako sa panawon sagkud babayaran ta ika.’ 30 Alagad diri iya nagosto, kindi ipinapriso logod niya adi anggan na diri nakababayad ko otang kanya.
31 Ko mabayad ko ibang mamandaan so nangyari, namundu sira saigo kaya inniyan sira sadto hadi sagkud isinombong so ngamin na nangyari. 32 Ipinabaoy iya ko hadi sagkud sinnabi, ‘Mala mong raut na mamandaan! Pinatawad ta ika ko ngamin mong kaotangan kanaku ta nakimaerak ika. 33 Bukung kaipowan mo man na maerak sa pareyo mong mamandaan arug ko ginibo ko kanimo?’ 34 Sa kaungtan ko hadi, ipinapriso iya anggan sa mabayaran niya so ngamin niyang otang. 35 Arug man kan a gigibowon kaninyo ka kanakung Amang nasa langit kin diri ninyo patatawarun na tuduk sa poso a manga ngod ninyo.”