19
Katottoroan ni Jesus manungud sa Pakikipagsoway sa Agom
(Mk. 10,1-12)
1 Pagkatapos na sabiyun ni Jesus a manga bagay na adi, ginnalin na iya sadto Galilea sagkud inniyan sadto banwaan ko Judea, sa loyong parte ko salog Jordan. 2 Sinondan iya ko dakul na manga tawo, sagkud sadto pinaraay niya so agko manga ilang.
3 Agko nagkapirang Pariseo na rinnapo kanya tanganing porbaran iya, “Tama raw sa Layi na sowayan ka lalaki a agom niya, sa dawa onong rason?”
4 Sinnimbag si Jesus, “Diri pa ninyo nababasa sa Kasoratan, na sa kapinonan linalang ka Diyos a lalaki sagkud babayi? 5 Sinabi pa niya, ‘Holi kadi, babayaan ka lalaki a kanyang manga kag-igin, sagkud omiiba sa kanyang agom, ta sirang darwa magiging usad.’ 6 Kaya buku na sirang darwa kindi, usad na. Kaya diri kaipowan na pagsowayun ka tawo a pinag-usad ka Diyos.”
7 Inonga iya otro ko manga Pariseo, “Kin arug kan ngata ta sinabi ni Moises na pwedeng sowayan ka lalaki a agom niya basta tawan niya adi sa kasoratan sa pagsosoway?”
8 Sinnimbag si Jesus kanda, “Tinogotan kamo ni Moises ta mala ninyo ka manga kusung. Alagad bukung amo yan a katoyowan ka Diyos sa kapinonan. 9 Sinasabiyan ko kamo, a siisay man na somoway sa kanyang agom sa ono man na rason, pwera sa pananambay, pangala mangagom otro sa iba, nananambay man. Sagkud a siisay na mangagom ka babaying sinowayan, nananambay man.”
10 Sinabi ko manga disipolo, “Kin arug kan a sitwasyon ka mag-agom, maraay pang diri na mangagom.”
11 Sinnimbag si Jesus, “Diri maaako ka ngamin na tawo a katottoroan na adi, kindi sadto sana manga tawong tinawan kadi. 12 Agko manlainlain na rason kin ngata ta agko manga lalaking diri nangangagom, a iba holi ka kandang kamutangan, a iba man holi sa kagigibowan ka ibang tawo, agko man diri nag-agom holi ka pagsirbi nira sa kahadian ka Diyos. A kayang omako ka katottoroan na adi, kaipowan niyang akoon adi.”
Benindisyonan ni Jesus so manga Igin
(Mk. 10:13-16; Lk. 18:15-17)
13 Agko nagkapira na dinnara ki Jesus sa manga igin, tanganing bendisyonan niya sagkud ipangadyi, alagad inungtan sira ko manga disipolo. 14 Kaya sinabi ni Jesus, “Pabayai ninyong omiyan kanaku a manga igin. Diri ninyo sira pag-ulangun holi ta sa manga arug nira naghahadi a Diyos.” 15 Matapos niyang rutaan sa kamut sagkud bendisyonan so manga igin, ginnalin na iya.
So Solterong Mayaman
(Mk. 10:17-31; Lk. 18:18-30)
16 Agko man usad na soltero na rinnapo ki Jesus sagkud innonga, “Maestro, ono pong karayan a kaipowan kong gibowon tanganing makaako ka boway na uda kasagkuran?”
17 Sinnimbag si Jesus, “Ngata ta inoonga mo ako kin ono a maraay? Uusad sana a maraay. Kin gosto mong magkaagko ka boway na uda kasagkuran, koyogon mo a manga kamandaan.”
18 Pangala inonga ko lalaki si Jesus, “Ari pong manga kamandaan a kaipowan kong koyogon?”
Sinnimbag si Jesus, “Diri ika mangguraan, diri ika manambay, diri ika magtaban, diri ika tomestigo sa botig, 19 igalang mo a manga kag-igin mo, sagkud mabutan mo a kapwa mo arug ka pagkabuut mo sa sadiri mo.”
20 Sinnimbag so soltero, “Ginibo ko na po a ngamin na an. Ono pa a kaipowan kong gibowon?”
21 Sinnimbag si Jesus, “Kin gosto mong magin matanos sa atobangan ka Diyos, omoli ika sagkud ipabakal mo a ngamin mong pagsorosadiri, sagkud a kabaklan ipanao mo sa manga nangangaipo. Kin gigibowon mo yan, migkaagko ika ka kayamanan sadto langit. Pagkatapos bomalik ika sagkud somonod kanaku.”
22 Ko marungug adi ko soltero, ginnalin iyang namumundu saigo, holi ta malangyaman niya.
23 Pangala sinabi ni Jesus sadto manga disipolo niya, “Sinasabi ko kaninyo a kamatoranan, malakadipisil sa usad na mayaman a magpasakup sa paghahadi ka Diyos! 24 Inootro ko, mas madali pa sa usad na kamelyo na makaluug sa lobot ka ragom, kisa magpasakup a usad na mayaman sa Paghahadi ka Diyos.”
25 Napangalas so manga disipolo niya ko marungug nira adi kaya nag-onga sira, “Kin arug kan, siisay po sana a makaliligtas?”
26 Sinilngan sira ni Jesus sagkud sinnabi, “Imposible sa manga tawo na iligtas a sadiri nira, alagad sa Diyos uda imposible.”
27 Sinnimbag si Pedro, “Binayaan namu so ngamin tanganing magsonod kami kanimo! Ono man po a makokoko namu?”
28 Sinnimbag si Jesus, “Sinasabi ko kaninyo a kamatoranan, omaabot a alduw na babagowon ka Diyos a kinaban sagkud akong Igin sa Tawo omuula sa kanakung trono. Sagkud kamong manga sinnosonod kanaku omuula man sadto doseng trono tanganing osgaran a doseng tribo ka Israel. 29 Sagkud a manga nagbaya ka baluy, manga ngod, manga kag-igin, o manga igin o raga holi kanaku, omaako sa mas dakul kisa ko kandang binayaan sagkud omaako man sira sa boway na uda kasagkuran. 30 Alagad dakul na naoona a maoori. Sagkud dakul na naoori, a maoona.”