20
A Parabola ka manga Trabador sa Obasan
1 “A paghahadi ka Diyos arug sa usad na kagsadiri sa usad na obasan na malapakaamay linnowas tanganing omanap sa manga migtrabawo sadto obasan niya.
2 Ko magkaoyon na so kagsadiri sagkud manga migtrabawo ko tangran nira sa usad na alduw, pinaiyan na niya sira sadto obasan.
3 Ko mig-alas nowebe na sa ramrag linnowas iya otro sagkud nakabayad iya sa nagparatorotindug sana sadto sasaran. 4 Kaya sinnabi iya kanda, ‘Omiyan man kamo sadto obasan ko sagkud magtrabawo, babayaran ko kamo sa tamang tangran.’ 5 Kaya inniyan man sira sadto obasan.
Linnowas naman iya ko mig-alas dose na sa modto sagkud ko mig-alas tres na sa apon, sagkud arug man kadto so ginibo niya.
6 Ko mig-alas singko na sa apon, linnowas iya otro sagkud nakabayad pa iya sa nagparatorotindug. Inonga niya sira, ‘Ngata ta maggapon kamo sading nagpaparatorotindug sana?’
7 Sinnimbag sira, ‘Uda po kaya kanamu nagtatao sa trabawo.’
Kaya sinnabi iya kanda, ‘Omiyan man kamo sadto obasan ko sagkud magtrabawo.’ 8 Ko nagngingi-ngitngit na, sinabiyan ko kagsadiri ko obasan so katiwala niya, ‘Baoyon mo na so manga trabador sagkud tangranan, onaun mo so manga naoring nagtrabawo anggan sadto manga naona.’ 9 So manga pinnoon na mig-alas singko na, nagresibi sa pangmaggapon na tangran.
10 Ko romapo so manga naona, nag-una sirang makareresibi sira sa sobra ko pangmaggapon na tangran, alagad poropareyo so naresibi nira. 11 Ko maresibi na nira so manga tangran nira, nagreklamo sira sadto kagsadiri. 12 Sinabi nira, ‘Usad na oras sana so trabawo ko manga naoring innabot, alagad tinangranan ninyo sira sa pareyo ko tangran namung manga maggapon na nagsakit sagkud nagtius ko grabing init.’
13 Alagad sinimbag ko kagsadiri so usad kanda, ‘Amigo, diri ko ika dinadaya. Bukung nagkaoyon kita na tatawan ko kamo sa pangmaggapon na tangran? 14 Koon mo na a tangran mo sagkud gomalin na ika. Sa gosto kong tawan sa pareyong tangran so naoring nagtrabawo. 15 Uda raw ako poder na gibowon a gosto ko sa pagsorosadiri ko? O naiibug sana kamo ta mabuut ako kanda?’
16 Kaya sinabi ni Jesus, ‘Arug man kan a mingyari ka manga oring alduw. Agko manga naoona ngowan na maoori sagkud agko manga naoori ngowan na maoona.’ ”
Ikatlong Pagpaayag ni Jesus manungud ka Kagranan Niya
(Mk. 10:32-34; Lk. 18:31-34)
17 Mantang nagtotokad si Jesus paiyan sadto Jerusalem, linain niya so doseng disipolo sadto manga tawo sagkud sinnabi kanda.
18 “Paiiyan na kita sa Jerusalem, sagkud akong Igin sa Tawo itatao sa manga namomoon ka manga padi sagkud manga paratottoro sa Layi. Sisintensyaan nira ako sa kagranan 19 sagkud itatao sa manga bukung Judio tanganing toyatoyaun, ampakun sagkud ipako sa kros, alagad maboboway ako otro sa ikatlong alduw.”
Kaayatan ko Ina ni Santiago sagkud Juan
(Mk. 10:35-45)
20 Pangala, rinnapo ki Jesus so agom ni Zebedeo kaiba so manga igin niya. Tinniklod iya sadto atobangan ni Jesus ta agko iya gostong ayatun. 21 Inonga iya ni Jesus, “Ono gosto mo?”
Sinnimbag iya, “Kin pwede po tabi pag naghahadi na ika paulaun mo a darwa kong igin sa kaabay mo? A usad sa too, sagkud a usad sa wala.” 22 Alagad sinnimbag si Jesus, “Diri ninyo isi kin ono a inaayat ninyo, kaya raw ninyo na tiusun a manga kadipisilan na titiusun ko?”
“Opo, kaya namu.” Simbag nira.
23 Kaya sinabi niya kanda, “Pwedeng makaya ninyong tiusun adi alagad buku ako a nagpipili kin siisay a omuula sa too sagkud wala ko. A manga adi para sana sa manga pinag-andaan ka kanakung Ama.”
24 Ko marungug adi ko sampolong disipolo, naungut sira ki Santiago sagkud Juan. 25 Kaya binaoy sira ngamin ni Jesus sagkud sinabi,
“Isi ninyo na a manga namomoon ka manga bukung Judio amo a naghahadi kanda sagkud a manga nasa alangkaw na posisyon amo a nakokoyog. 26 Diri kamo kinakaipowan na omarug kanda kindi, a siisay man na gostong magin orog, kaipowan na magin tagasirbi ninyo. 27 Sagkud a siisay man kaninyo na gostong mamoon, kaipowan na magin oripun ninyo. 28 Magin akong Igin sa Tawo, inniyan sadi kinaban bukung pagsirbiyan kindi tanganing magsirbi sagkud itao a kanakung boway tanganing maligtas a dakul na tawo.”
Pinaraay ni Jesus so Darwang Bota
(Mk. 10:46-50; Lk. 18:35-43)
29 Ko pagalin na si Jesus sagkud so manga disipolo niya sadto syodad ka Jerico, sinondan sira sa malakadakul na tawo. 30 Sadto gilid ko raran agko darwang botang nakaula. Ko marungug nirang linnalabos si Jesus, nagpararait sira, “Kagorangnan, Erensiya ni David, kaeraki man po kami!”
31 Pinagsabiyan sira na pomondo ko manga tawo, alagad biyo logod sirang rinnait, “Kagorangnan, Erensiya ni David, kaeraki man po kami!”
32 Kaya pinnondo si Jesus sa pag-agi, ipinabaoy sira sagkud inonga, “Ono a gosto ninyong gibowon ko kaninyo?”
33 Sinnimbag sira, “Kagorangnan, gosto po namung makabayad.”
34 Naerak si Jesus kanda kaya rinutaan niya so manga mata nira. Kadto tolos nakabayad sira sagkud sinnonod ki Jesus.