21
A Mapangganang Pagluug ni Jesus sadto Jerusalem
(Mk. 11:1-11; Lk. 19:28-40; Jn. 12:12-19)
1 Ko arani na sa Jerusalem si Jesus sagkud so manga disipolo niya, arani sa banwaan ka Betfage sa Bokid ka manga Olibo, pinaona niya so darwa niyang disipolo. 2 Sagkud sinnabing, “Omona na kamo sadto somosonod na baryo, sagkud makababayad kamo sadto sa nakaguud na ogbonan na asno kaiba so ogbon niya. Obadan ninyo a manga adi saka darawun sadi kanaku. 3 Kin agko tomuyaw kaninyo, sabiyun ninyong kaipowan an ka Kagorangnan ta ipadadara yan tolos kaninyo.
4 Nangyari adi tanganing maotob so sinabi ko propeta.
5 Sabiyun ninyo sa manga tawo sa syodad ka Ziona,
‘Paabot na a kaninyong hadi!
Mapagpakombaba iya sagkud nakalonad sa asno,
sa usad na ogbon na asno.’ ”
6 Innagi man so manga disipolo sagkud ginibo so iminanda ni Jesus. 7 Dinara nira ki Jesus so ogbonan na asno sagkud so ogbon kadi. Pagkatapos, ikinamadero nira so manga pang-alikbuy nira sadto talodtod ko asno saka pinakabayo si Jesus.
8 Kadakul ko manga tawong innapin ko manga pang-alikbuy nira sadto raran, so iba man namotol ko manga sanga sa kawoy sagkud iinapin man sadto raran. 9 Nagraraitan so manga tawong naoona sagkud sinnosonod kanya,
“Omawun a Erensiya ni David!”
“Paladan a nag-iiratung sa ngaran ka Kagorangnan!”
“Omawun a Diyos sa kaitaasan!”
10 Pagluug ni Jesus sadto Jerusalem, naribok so bilog na syodad sagkud nag-inongaan so manga tawo, “Siisay iya, ngata ta inoomaw nira a tawong adi sa arug kadi?”
11 Sinnimbag so manga tawo, “Iya a propetang si Jesus na tagaNazaret sa Galilea.”
A Pagmakulug ni Jesus sa Templo
(Mk. 11:15-19; Lk. 19:45-48; Jn. 2:13-22)
12 Nag-iyan si Jesus sadto templo sagkud ipinanobol niya so ngamin na namamakal sagkud nagtitinda sadto. Binalintong niya so manga lamesa ko parabalyo sa sintabo sagkud so manga ulaan ko nagpapabakal sa manga kalapati. 13 Sinnabi iya kanda, “Nasosorat, ‘A kanakung baluy babaoyon na baluy pangadyian. Alagad ginibo ninyo ading kampo sa manga mataban.’ ”
14 Pagkatapos kadi so manga bota sagkud pilay sadto templo rinnapo ki Jesus, sagkud pinaraay niya sira ngamin. 15 Alagad ko mabayad ko manga namomoon ko manga padi sagkud manga paratottoro sa Layi so manga ngangalasan na ginibo ni Jesus sadto templo, sagkud so manga igin na nagrarait sadto luug ko templo sa, “Omawun a Erensiya ni David!” naungut sira. 16 Kaya sinnabi sira ki Jesus, “Narurungug mo a sinasabi ka manga igin na an?”
“Amo.” Simbag ni Jesus. “Ngata diri pa ninyo nabasa a sinasabi sa Kasoratan, ‘Tinotottoroan mo, o Diyos, a manga igin sagkud talaginun na mag-omaw kanimo’ ? ”
17 Pangala binayaan na sira ni Jesus sagkud nag-iyan sadto Betania. Sadto na iya natorog.
Isinompa ni Jesus so Poon ko Igos
(Mk. 11:12-14, 20-24)
18 Kinaramragan, ko pabalik na si Jesus sadto syodad ko Jerusalem, nag-alup iya. 19 Nakabayad iya sa poon sa igos sadto gilid ko aagyan kaya rinnapo iya sadto, alagad uda iya nabayad na bonga kindi manga dawon sana. Kaya sinabi niya sadto poon, “Diri na ika nongka migbonga!” Tolostolos na nalaya so kawoy.
20 Ko mabayad ko manga disipolo so nangyari sadto kawoy nangalas sira sagkud innonga, “Paonong nalaya tolos so kawoy sa igos?” 21 Sinnimbag si Jesus, “Sinasabi ko kaninyo a kamatoranan, kin nagtotobod kamo sa Diyos na uda pagdorodarwa, magiginibo man ninyo so ginibo ko sa poon ka igos na adi. Buku sana yan! Pwede ninyong sabiyun sa bokid, ‘Gomalin ika san, sagkud tomalon ika sa dagat,’ sagkud mingyari yan. 22 Kin kamo magtobod, maaako ninyo a onoman na ayatun ninyo sa pangadyi.”
Manga Kaongaan manungud ka Kapangyariyan ni Jesus
(Mk. 11:27-33; Lk. 20:1-8)
23 Binnalik otro si Jesus sadto Templo. Mantang nagtotottoro iya, rinnapo kanya so namomoon ko manga padi sagkud manga namomoon ko manga Judio sagkud innonga, “Kiisay na kapangyariyan mo ginigibo a manga bagay na adi? Siisay a nagtao kanimo sa kapangyariyan na gibowon an?”
24 Sinnimbag si Jesus, “Oongaun ko man kamo. Kin masimbag ninyo ako, sasabiyun ko man kaninyo kin kiisay na kapangyariyan ko ginigibo a manga bagay na adi. 25 Sari paggalin a kapangyariyan ni Juan tanganing magbunyag? Sa Diyos o sa tawo?”
Kaya nag-osip-osip sira, “Kin sasabiyun tang, ‘Galin sa Diyos,’ mig-onga iya, ‘Ngata ta diri kamo nagtobod kanya?’ 26 Alagad kin sasabiyun tang, ‘Sa tawo,’ baka kin ono a gibowon kanatu ka manga tawo, ta binibisto nirang si Juan usad na propetang galin sa Diyos.”
27 Kaya sinnimbag sira ki Jesus, “Diri namu isi.” Pangala sinnabi man iya kanda, “Diri ko man sasabiyun kaninyo kin kiisay na kapangyariyan ko ginigibo a manga bagay na adi.”
A Parabola manungud sa Darwang Igin na Lalaki
28 “Ono raw sa pag-una ninyo? Agko usad na lalaking agko darwang igin na lalaki. Rinapo niya so pinakagorang sagkud sinnabi, ‘Igin ko, omiyan ika ngowan sadto obasan sagkud magtrabawo.’
29 Sinnimbag so igin, ‘Abu ako,’ alagad pagngumunngumun nagbago so isip niya kaya inniyan iya sadto obasan.
30 Pangala iniyanan man ko ama so pangarwang igin sagkud sinabiyan man sa arug kadto saka sinnimbag adi, ‘Amo po,’ alagad diri man iya inniyan.”
31 “Siisay sadto darwa so kinnoyog ko kabutan ko kandang ama?”
“So gorang na igin po,” simbag nira.
Sinabi ni Jesus kanda, “Sinasabi ko kaninyo a kamatoranan, a manga parasingil sa bowis sagkud a manga mararaut na babayi naoona pa kaninyong pomasakup sa paghahadi ka Diyos. 32 Ta inniyan sadi inyo si Juan tanganing ipabayad kaninyo kin paono mamoway sa tama, alagad diri kamo nagtobod kanya. Alagad so manga parasingil sa bowis sagkud so mararaut na babayi nagtobod kanya. Dawa nabayad na ninyo adi, diri pananggayud na kamo nagsulsul sagkud nagtobod kanya.”
A Parabola ka Mararaut na Paratanum
(Mk. 12,1-12; Lk. 20,9-19)
33 Irungga ninyo a usad pang parabola, “Agko usad na tawong nagtanum sa obas sadto obasan niya. Inaladan niya adi sagkud ginnibo sa panggumuk sa obas. Tinnogrok man iya sa alangkaw na bantayan. Pangala, pinaarkilaan niya so obasan sa manga paratanum saka inniyan na iya sa ibang logar. 34 Pag-abot ko panawon sa aniyan, nagpadara iya sa manga mamandaan tanganing koon so kapartiyan niya ko obas.
35 Alagad, rinakup ko manga paratanum so manga mamandaan, so usad binanug, so usad ginuraan, sagkud so usad pinagbabato. 36 Nagpadara otro so kagsadiri sa mas dakul na mamandaan kisa ko naona. Alagad arug pa nanggayud na kadto so ginibo ko manga paratanum kanda.
37 Sa katapostaposi, ipinadara niya so igin niyang lalaki. Sinabi niya, ‘Irerespeto nira a igin ko.’ 38 Alagad ko mabayad ko manga paratanum so igin niya, nag-osip-osip sira, ‘Amo adi so tagapagmana, mayna guranun ta iya tanganing maiyan kanatu a mamanawun niya.’ 39 Kaya rinakup iya nira, ilinowas sadto obasan sagkud ginuraan.”
40 Kaya inonga sira ni Jesus, “Sa pagbalik ko kagsadiri ko obasan, ono gigibowon niya sadto manga paratanum?”
41 Sinnimbag so manga tawo, “Uda pagkaerak na guguranun niya so mararaut na tawong adto sagkud so obasan niya patatanuman sa ibang paratanum na tattaong tomao sa kaerasan sa panawon ka tig-aniyan.”
42 Sinabi pa ni Jesus kanda, “Diri pa ninyo adi nababasa sa Kasoratan?
‘A batong isinikwal ka manga paratogrok sa baluy
amo a pinakaimportanteng
bato sa ngamin.
Ginibo adi ka Diyos,
sagkud makangangalas adi sa pagsilung ta.’
43 Kaya ngani sinasabi ko kaninyo, ‘Buku na kamo a pighadian ka Diyos, kindi so manga tawong naggigibo ka kabutan niya. 44 A siisay man na maolog sa batong adi, migkawarakwarak sagkud a mabagsakan kadi migkagogosang.’ ”