22
A Parabola manungud sa Kinasalan
(Lk. 14,15-24)
1 Innistorya otro si Jesus sa usad na parabola,
2 “A paghahadi ka Diyos maipapareyo sa usad na hading nag-anda para sa kasal ko igin niyang lalaki. 3 Nagmanda iya sa mamandaan tanganing paiyanun na so manga inimbitaran sadto kinasalan, alagad abu nirang omiyan. 4 Pangala nagmanda iya otro sa manga ibang mamandaan sagkud sinnabi, ‘Sabiyun ninyo sa manga inimbitaran na naianda ko na a panggab-iyan, naipabono ko na so manga baka sagkud manga pinatabang ogbon na baka sagkud anda na a ngamin. Kaya omiyan na sira sadi kinasalan.’
5 Alagad diri man adi inintindi ko manga inimbitaran. Inniyan sira sa kanyakanyang agi, so usad inniyan sadto bokid, so usad sadto negosyo niya. 6 Rinakup man ko iba so manga mamandaan, pinasupug sagkud ginuraan.
7 Malakaungut ko hadi sadto ginibo nira, kaya minandaan niya so manga soldados na guranun so manga ginnuraan ko manga mamandaan niya sagkud soloon so syodad nira. 8 Pangala sinnabi iya sadto manga mamandaan niya, ‘Nakaanda na a kinasalan, alagad bukung angay na omiyan so manga inimbitaran ko. 9 Kaya ngowan, omiyan kamo sadto manga kanto sagkud imbitaran ninyong omiyan sadi kinasalan dawa siisay na mabayad ninyo.’ 10 Kaya inniyan man so manga mamandaan sadto manga kanto sagkud iiniba so kada tawong masompongan nira, mararaut man o mararaay. Kaya napono sa bisita so kinasalan.
11 Pagluug ko hadi tanganing baydun so manga bisita, nakabayad iya sa usad na lalaki na diri nakasopong sa badong pangkinasalan. 12 Kaya inonga iya ko hadi, ‘Amigo, ngata ta diri ika nakasopong sa badong pangkinasalan?’ Alagad diri nakasimbag so lalaki. 13 Kaya sinabi ko hadi sadto manga mamandaan, ‘Gaposon ninyo a manga kamut sagkud tiil niya saka iapon ninyo sadto lowas, sa kangitngitan kin sari migtangis sagkud migragut a manga ngipun niya sa sakit!’ ” 14 Sagkud sinabi ni Jesus, “Ta dakul a binaoy ka Diyos sa kanyang kahadian alagad gagatikot a napipili.”
Manga Kaongaan manungud sa Pagbabayad sa Bowis
(Mk. 12,13-17; Lk. 20,20-26)
15 Pangala, ginnalin na so manga Pariseo sagkud plinano kin paono nira mararakup si Jesus sa kanyang pagngangabil. 16 Kaya pinaiyan nira ki Jesus so nagkapira nirang tagasonod kaiba so nagkapira man na tagasonod ni Herodes. Sinabi nira, “Maestro, isi namung a sinasabi mo matood sagkud itinotottoro mo a kamatoranan manungud ka kabutan ka Diyos sa manga tawo. Uda ika pinapaorog ta poropareyo a pagsilung mo sa kada tawo. 17 Ngowan sabiyun mo tabi kanamu kin ono sa pag-una mo. Tama raw tabi sa Layi na magbayad sa bowis sa Emperador ka Roma o diri?”
18 Alagad isi ni Jesus so maraut nirang katoyowan kaya sinabi niyang, “Manga parasagin-sagin, ngata ta pinoporbaran ninyo akong rakpun sa oosipun? 19 Pabayad raw sa sintabong pambayad sa bowis.” Kaya tinawan nira iya sa sinsilyo, 20 saka sira inonga ni Jesus, “Kiisay na ritrato sagkud ngaran a nakasorat sadi?”
21 “Ki Cesara,” simbag nira.
Kaya sinabi kanda ni Jesus, “Kin arug kan, itao ninyo ki Cesar a para ki Cesar sagkud sa Diyos a para sa Diyos.” 22 Nangalas sira ko simbag niya, kaya ginnalin na sana sira.
Manga Kaongaan manungud ka Pagkaboway Otro
(Mk. 12,18-27; Lk. 20,27-40)
23 Ko alduw man sanang adto, rinnapo ki Jesus so manga Saduceo na diri nagtotobod na agko pagkaboway otro sagkud innonga,
24 “Maestro, sinabi kanamu ni Moises na kin a usad na lalaki magraan na uda igin, kaipowan pakasalan ka ngod niya so nabalo tanganing magkaigin sira para sadto nagraan.
25 Ngowan, agko sadi kanamu pitong magngongod na lalaki. So gorang nangagom sagkud nagraan na uda igin kaya natagak so agom niya sadto pangarwang ngod. 26 Arug man kadto so nangyari sadto pangarwa, pangtolo anggan sadto ikapito. 27 Sa katapostaposi nagraan man so babayi. 28 Ngowan, sa pagkaboway otro, siisay kanda a magigin agom ko babayi mantang nakasal iya sadto pito?”
29 Sinnimbag si Jesus,
“Malakasala ka iniisip ninyo, holi ta diri ninyo isi a Kasoratan o a kapangyariyan ka Diyos. 30 Sa pagkaboway otro, diri na mingngagom a manga tawo. Magigin arug na sira ka manga anghel sadto langit. 31 Manungud man sa pagkaboway otro ka manga guraan, diri pa ninyo nabasa kin ono a sinasabi ka Diyos kaninyo? Sinabi niyang, 32 ‘Ako a Diyos ni Abraham, Diyos ni Isaac, sagkud Diyos ni Jacob.’ Buku iyang Diyos ka manga guraan kindi ka manga boway.”
33 Ko marungug ko manga tawo so katottoroan niya nangalas sira.
A Pinakaimportanteng Kamandaan
(Mk. 12,28-34; Lk. 10,25-28)
34 Ko marungug ko manga Pariseo na napapunuk ni Jesus so manga Saduceo, nangagtipontipon sira. 35 Usad kanda na nag-adal saigo sa Layi so rinnapo sagkud innonga ki Jesus tanganing porbaran iya, 36 “Maestro, ono po a pinakaimportanteng kamandaan ka Layi?”
37 Sinnimbag si Jesus kanya,
“ ‘Mabutan mo a Kagorangnan mong Diyos sa bilog mong poso, sa bilog mong kalag, sagkud sa bilog mong pag-iisip.’ 38 Amo adi a ona sagkud pinakaimportanteng kamandaan. 39 A pangarwa, ‘Mabutan mo a kapwa mo arug ka pagkabuut mo sa sadiri mo.’ 40 A ngamin na kamandaan ni Moises sagkud a manga sinorat ko manga propeta, nakabase sa darwang kamandaan na adi.”
A Kaongaan manungud ka Paraligtas
(Mk. 12,35-3; Lk. 20,41-44)
41 Mantang nakapalibot pa so manga Pariseo ki Jesus, inonga niya sira, 42 “Ono sa pag-una ninyo a manungud ki Cristo? Kiisay iyang erensiya?”
Sinnimbag sira, “Erensiya iya ni Hading David.”
43 Sinabi si Jesus kanda, “Kin Erensiya iya ni Hading David ngata ta binaoy iya ni David na Kagorangnan sa pangongona ka Espirito Santo? Ta sinabi niya,
44 ‘Sinabi ka Kagorangnan sa Kagorangnan ko,
Omula ika sadi too ko
anggan na madaug kob a manga kasogot mo.’