17
Nagbago so Itsora ni Jesus
(Mk. 9,2-13; Lk. 9,28-36)
1 Pagkaagi sa unum na alduw, tinnokad sa alangkaw na bokid si Jesus kaiba si Pedro, sagkud so magngod na Santiago sagkud Juan. 2 Mantang sadto na sira nabayad ko manga disipolo na nagbago so itsora ni Jesus. So lalawgun niya linniwanag na bagana alduw sagkud so bado niya nagkikislap sa kapotian.
3 Pangala biglang nabayad nira si Propeta Moises sagkud Propeta Elias na kaosip ni Jesus. 4 Kaya sinabi ni Pedro ki Jesus, “Kagorangnan, maraay tanganing sadi kami. Kin gosto mo tabi, gomigibo ako sa tolong payag, a usad para kanimo, a usad ki Propeta Moises sagkud a usad ki Propeta Elias.”
5 Mantang nag-oosip pa iya, tinawban sira sa malangliwanag na panganoron. Galin sadto panganoron agko boses na sinnabi, “Amo adi a nabubutan kong Igin, na namumuy-an ko saigo. Irunggun ninyo iya!” 6 Ko marungug adi ko manga disipolo, dinnapla sira sa grabing katakotan. 7 Alagad rinapo sira ni Jesus, sagkud rinutaan saka sinnabi, “Tomindug kamo sagkud diri kamo makatakot.” 8 Ko tomangad sira, uda sira ibang nabayad kindi si Jesus na sana.
9 Ko paros-og na sira sadto bokid, sinabiyan sira ni Jesus, “Diri ninyo pagsabiyun sa kiisay man so nabayad ninyo anggan na akong Igin sa Tawo diri pa naboboway otro.”
10 Inonga iya ko manga disipolo niya, “Ngata po ta sinasabi ka manga paratottoro sa Layi na kaipowan ngonang maonang omiyan sadi ni Propeta Elias bago omabot a Cristo?”
11 Sinnimbag si Jesus, “Matood an na kaipowan ngonang omiyan sadi ni Propeta Elias tanganing ianda a ngamin na bagay. 12 Alagad sinasabi ko kaninyo, innabot na si Propeta Elias, diri iya nabisto ko manga tawo sagkud ginibo nira kanya so gosto nirang gibowon. Amo man an a gigibowon nira kanaku na Igin sa Tawo, padidipisilan man nira ako.” 13 Pangala naintindiyan ko manga disipolo na a sinasabi niya amo si Juan na Parabunyag.
A Pagparaay ko Igin na Sinasaniban
(Mk. 9:14-29; Lk. 9:37-43a)
14 Pagbalik ni Jesus sagkud ko manga disipolo sadto katatawowan, rinnapo kanya so usad na lalaki saka tinniklod sadto atobangan niya sagkud sinnabing, 15 “Kagorangnan, kaerakan mo po a igin kong lalaki. Agko po iya sobisobi sagkud grabi a pagsakit. Pirmi iyang natotomba sa kalayo sagkud naoolog sa tobig. 16 Dinara ko na iya sa manga disipolo mo alagad diri man nira iya naparaay.”
17 Sinnimbag si Jesus, “Manga uda pagtobod sagkud mararaut na henerasyon! Anggan kono ako makiiiba kaninyo? Anggan kono ako migtius kaninyo? Darawun ninyo sadi a igin.” 18 Pinalayas ni Jesus so demonyo sadto igin kaya kadto tolos naraay so igin.
19 Ko sirasira na sana, rinnapo ki Jesus so manga disipolo niya sagkud innonga, “Ngata po ta diri namu napalayas so demonyo?”
20-21 Sinnimbag iya, “Malakasadit kaya ka pagtobod ninyo. Sinasabi ko kaninyo a kamatoranan, kin agko sana kamo pagtobod arug kasadit ka tolang ka mostasa pwede ninyong sabiyun sa bokid na an, ‘Bomalyo ika sadto!’ Saka bomabalyo man an. Ngamin na bagay magiginibo ninyo.”+\fr 17.20 \ft Sa ibang Kasoratan, agko rogang na, ‘alagad a arug kading klasing demonyo mapapalayas sana sa paagi ka pangangadyi sagkud pag-aayono.’
Pangarwang Pagpapaayag ni Jesus manungud ka kanyang Kagranan
(Mk. 9,30-32; Lk. 9,43b-45)
22 Ko magkatitipon na sadto Galilea si Jesus sagkud so manga disipolo, sinnabi iya kanda, “Akong Igin sa Tawo itatao sa kamut ka manga tawong kinnokontra kanaku. 23 Guguranun nira ako alagad maboboway ako otro sa ikatolong alduw.” Kaya so manga disipolo namundu saigo.
A Pagbabayad sa Bowis Para sa Templo
24 Pag-abot nira sa Capernaum, rinnapo ki Pedro so darwang parasingil sa bowis para sadto templo, saka innonga, “Ono, nagbabayad raw a Maestro mo sa bowis para sadto templo?”
25 “Amo.” Simbag niya.
Pag-abot ni Pedro sadto baluy, inonga iya ni Jesus, “Ono raw sa pag-una mo, Pedro. Siisay a sinisingil sa bowis ka manga hadi sa usad na nasyon, a sadiring namamanwaan o a manga dayowan?”
26 “So manga dayowan po,” simbag niya.
“Buut sabiyun, diri pinapabayad a manga namamanwaan,” sabi ni Jesus. 27 Alagad, tanganing uda sira masabi kanatu, omiyan ika sadto ranuw sagkud maminwit. Boksan mo a nganga ka onang isurang marakup mo, sagkud mababayad mo a sintabo na pambayad sa bowis tang darwa. Koonon mo adi sagkud ibayad mo sa bowis para sa templo.