10
So Doseng Apostol
(Mk. 3:13-19; Lk. 6:12-16)
1 Binaoy ni Jesus so doseng disipolo niya sagkud tinawan sira sa kapangyariyan na magpalayas sa maraut na espirito sagkud magparaay sa manga ka-ilangan sagkud manga kamatian.
2 Amo adi so manga ngaran ko doseng apostol: a ona, amo si Simon na binabaoy na Pedro na amo namomoon kanda, si Andres na ngod niya, si Santiago sagkud si Juan, na manga igin ni Zebedeo. 3 Si Felipe sagkud si Bartolome, si Tomas sagkud si Mateo na parasingil sa bowis, si Santiago na igin ni Alfeo, sagkud si Tadeo, 4 si Simon na Cananeo sagkud si Judas Iscariote na migtraydor ki Jesus.
Isinobol ni Jesus so Doseng Apostol
(Mk. 6:7-13; Lk. 9:1-6)
5 Isinobol ni Jesus so dose pagkatapos na togonon, “Diri kamo mag-iyan sadto logar ka manga bukung Judio o sa ono man na banwaan ka manga Samaritano. 6 Kindi, iyanan ninyo a manga tagaIsrael na bagana manga nauudang karnero. 7 Pag-iyan ninyo sa logar na an, ipaayag ninyo na arani na a paghahadi ka Diyos. 8 Paomayan ninyo a manga nag-iilang, bowayun otro so manga guraan, parayun ninyo a manga pudpurun, sagkud palayasun a manga demonyo. Inako ninyo a kapangyariyan na adi na uda bayad, kaya tomabang kamo na uda bayad. 9 Diri kamo magdara sa kwarta bolawan, pirak o sinsilyo sa kaninyong bolsa, 10 diri man kamo magdara sa bag, sanglian, sandalyas o sogkod. Ta a trabador kaipowan na tawan ka kanyang pangangaipo.
11 Sa ono man na banwaan o baryo na iyanan ninyo, mag-anap kamo sa tawong andang omako kaninyo sa baluy niya, sagkud makidagos kamo sadto anggan sa paggalin ninyo. 12 Pagluug ninyo sa baluy, sabiyun ninyo, ‘Maraay na alduw po kaninyo ngamin, mapakaninyo logod a biyaya ni Amang Diyos.’ 13 Kin padagoson kamo, ipagpadagos ninyo a bendisyon, alagad kin diri bawiun ninyo a bendisyon na an. 14 Sagkud kin abu kamong akoon o irunggun sa usad na baluy o banwaan, gomalin kamo san sagkud ipagpag ninyo a talbo sa manga tiil ninyo bilang patanid kanda. 15 Sinasabi ko kaninyo a kamatoranan, na sa Alduw ka Pag-osgar, mas magubat a padosang itatao ka manga tawo sa banwaan na an kisa manga tagaSodoma sagkud Gomorraa!”
Manga Kadipisilan na Omaabot
(Mk. 13:9-13; Lk. 21:12-17)
16 “Tandaan ninyo, isinosobol ko kamong arug sa manga karnero sa bitnga ka manga rungaw. Kaya magin madonong kamo arug sa sawa sagkud magin mabuut kamo arug sa kalapati. 17 Magmaan kamo sa manga tawo ta rarakpun nira kamo sagkud iaakosar, sagkud popokpokon nira kamo sadto manga sinagoga. 18 Holi kanaku iaatobang kamo sa manga gobernador sagkud manga hadi tanganing sabiyun kanda a Maraay na Bareta saka sadto manga bukung Judio. 19 Alagad kin iatobang na kamo kanda diri kamo maporisaw manungud ka sasabiyun ninyo o kin paono sabiyun an. Ta sa oras na an itatao ka Diyos a manga sasabiyun ninyo, 20 ta bukung kamo a migngabil, kindi a Espirito na galin sa kaninyong Ama. Iya a migngabil sa paagi ninyo.
21 Tatraydoron ka ngod a kanyang ngod tanganing ipaguraan, sagkud a ama sa kanyang igin, a igin totomangun a kanyang kag-igin sagkud ipaguguraan. 22 Ikauungut kamo ka ngamin holi ka pagsonod ninyo kanaku, alagad a siisay man na magpadagos na maimbod anggan sa kataposan, maliligtas. 23 Kin pinadidipisilan kamo sa usad na banwaan, domulag kamo sa sonod na banwaan. Sinasabi ko kaninyo a kamatoranan, diri pa ninyo naiiyanan a ngamin na banwaan sa Israel, ako na Igin sa Tawo bomabalik na.
24 Uda disipolong mas madonong kisa kanyang maestro, ni uda mamandaan na mas madonong kisa kanyang among. 25 Tama na sa manga disipolo a makaarug sa kanyang maestro, sagkud a mamandaan sa kanyang among. Kin ako na namomoon kaninyo binabaoy na Belzebolb, gaomno pa kaya karaut a ibabaoy kaninyong manga nasasakupan ko?”
A Kaipowan na Makatakotan
(Lk. 12:2-7)
26 “Kaya diri kamo makatakot sa manga tawo. Ta uda itinatagong diri nababayad sagkud uda sekretong diri nabobolgar. 27 A manga sinasabi ko kaninyo sa ilum, sabiyun ninyo sa katatawowan. Sagkud a iniing-ing ko kaninyo, iiyak ninyo tanganing marungug ka ngamin. 28 Diri ninyo makatakotan a nangguguraan ka awak, alagad diri man nakaguguraan sa kalag. Kindi, makatakot kamo sa Diyos na amo a agko kakayanan na migpadosa ka kaninyong awak sagkud kalag sa impiyerno. 29 Bukung a darwang rignus ipinapabakal sana sa gatikot na kantidad? Alagad uda ni usad kanda na natitigbak kin bukung kagostowan ka kaninyong Ama. 30 Sagkud dawa a ngamin na book sa payo ninyo, bilang niya. 31 Kaya diri kamo makatakot ta mas importante kamo kisa ka manga rignus.”
A Pagbisto ki Cristo
(Lk. 12:8-9)
32 “A siisay man na bomisto kanaku sa atobangan ka manga tawo bilang Kagorangnan, bibistowon ko man sa atobangan ka kanakung Amang nasa langit. 33 Alagad a siisay man na magnigar kanaku sa atobangan ka manga tawo, ninigaran ko man sa atobangan ka kanakung Amang nasa langit.”
A Pagkabangabanga ka Pamilya Holi ki Cristo
(Lk. 12:51-53; 14:26-27)
34 “Diri ninyo pag-isipun na inniyan ako sadi kinaban tanganing magkaagko katoninungan. Buku, ta inniyan ako sadi tanganing magkasogot a manga tawo.” 35 Ta inniyan ako sadi tanganing,
“ ‘Tomangun ka igin na lalaki a kanyang ama,
ka igin na babayi a kanyang ina.
Amo man a manogang na babayi sa panogangan niyang babayi.
36 A magigin kasogot ka usad na tawo, amo a sadiri niyang pamilya.’
37 A siisay man na nabubuut sa manga kag-igin niya na mas orog kisa kanaku, bukung angay na magin disipolo ko. Sagkud a siisay man na nabubuut sa manga igin niya kisa kanaku, bukung angay kanaku. 38 A siisay man na diri somonod kanaku holi ta buku iyang andang magsakit sagkud magraan para kanaku, bukung angay kanaku. 39 A siisay man na nagpapaorog ka boway niya sadi kinaban mauudaan kadi, sagkud a siisay man na diri nagpapaorog ka boway niya holi kanaku makatotorak kadi.”
Manga Balus
(Mk. 9:41)
40 “A siisay man na omako kaninyo, inaako man ako, sagkud a innaako kanaku, nag-aako man ka nagsobol kanaku. 41 A siisay man na omako sa usad na propeta holi ta iya propeta makareresibi sa balus arug sa propeta, sagkud a siisay man na omako sa matanos na tawo holi ta iya matanos, makareresibi sa balus oyon sa matanos na tawo. 42 A siisay man na magtabang sa kiisay man sa manga pinakababa kong parasonod, holi ta sira parasonod ko, sigoradong makareresibi sa dakulung balus, dawa kin usad na basong maagnuw na tobig a itinao niya.”