11
Si Jesus sagkud si Juan na Parabunyag
(Lk. 7:18-35)
1 Pagkatapos togonon ni Jesus so doseng apostol, ginnalin iya sa logar na adto tanganing magtottoro sagkud ipaayag a Maraay na Bareta sadto manga kaabay na banwaan.
2 Mantang si Juan na Parabunyag sadto prisowan narungug niya so manungud ko manga ginibo ni Cristo, kaya minandaan niya so manga disipolo niya ki Jesus. 3 Nag-onga sira kanya, “Ika na po a sinasabing omaaboton, o mig-ulat pa kami sa iba?”
4 Sinnimbag si Jesus, “Bomalik kamo ki Juan sagkud sabiyun ninyo kin ono ninyo narungug sagkud nabayad. 5 So bota nakabayad, so pilay nakaagi, so pudpurun naraay, so bungug nakarungug, so manga guraan naboway, sagkud sa manga pobre itinotottoro a Maraay na Bareta. 6 Paladan a tawong diri nagdodorodarwa manungud kanaku.”
7 Ko pagalin na so manga disipolo ni Juan, nagngabil si Jesus sadto manga tawo manungud kanya, “Ko pomaiyan kamo ki Juan sadto kalangtadan, ono so linalaoman ninyong mabayad? Usad na tawong arug sa talayib na ipinagpapalidpalid sa angin? 8 Kin buku, ono gosto ninyong mabayad? Usad na tawong nakabado sa magayon? Buku, ta a nagsosopong sa magayon na bado, nag-iistar sa palasyo. 9 Ono baya a gosto ninyong mabayad? Propeta? Amo, sinasabi ko kaninyo, orog pa iya sa usad na propeta. 10 Si Juan a sinasabi ka Diyos sa Kasoratan,
‘Irunggun mo! Ipadadara ko kanimo a mamandaan ko,
tanganing ianda a raran na aagyan mo.’
11 Sinasabi ko kaninyo a kamatoranan, ‘Uda tawong ipinangigin, na mas dakulu pa ki Juan na Parabunyag, alagad mas dakulu kanya a pinakasadit sa manga tawong nagpapasakup sa paghahadi ka Diyos. 12 Poon ko mangadal si Juan na Parabunyag anggan ngowan, a kahadian ka Diyos padagos na mapanggana. A kahadian ka langit pwersaan na pinagluluug sagkud a makukusug na tawo inaaguw adia.’ 13 Ta bago pa omabot si Juan ipinaayag na ko ngamin na manga propeta sagkud ka Layi ni Moises a manungud ka paghahadi ka Diyos. 14 Sagkud kin naniniwala kamo ko kandang ipinaayag, si Juan na a Elias na propetang linalaoman ninyong omaabot. 15 Kamong manga nag-iirungug kaipowan ninyong pag-isipan adi!”
16 “Sa onong bagay ko maipapareyo a manga tawo ngowan? Arug sira ka manga igin na nakaula sa sasaran na nagbibinaoyan sa kada usad,
17 ‘Tinogtogan namu kamo sa plawta, alagad diri kamo binnayli, nagrawitdawit kami, alagad diri kamo tinnangis!’
18 Kapareyo talaga nira a manga tawo ngowan, ta ko omiyan sadi si Juan na nabayad nirang nag-aayono sagkud diri nag-iinom sa alak, sinnabi sira, ‘Sinasaniban iya sa demonyo!’ 19 Sagkud ko omabot man akong Igin sa Tawo na nabayad nirang nagkakaun sagkud nag-iinom sinnabi man sira, ‘Silngi ninyo a lalaking adi! Malakaangap sagkud kaparaboborat, amigo ka manga parasingil sa bowis sagkud manga parakasala.’ Alagad a kadonongan ka Diyos, napamamatoranan sa paagi ka manga gibo niya.”
Patanid sa manga Banwaan na Abung Magsulsul
(Lk. 10:13-15)
20 Pagkatapos kadi, pinonan na buyuwun ni Jesus so manga banwaan na mas dakul na ginibowan niya sa ngangalasan ta diri sira nagsulsul ko kandang manga kasalan. 21 “Erak man kaninyo, manga taga Corazin! Erak man kaninyo manga taga Betsaida! Ta kin so manga ngangalasan na ginibo san inyo, ginibo sa Tiro sagkud Sidonb, uban na kintanang sinnopong sa sako sagkud innula sa abo a manga taga sadto bilang pagpabayad na sira nagsusulsul. 22 Kaya tandaan ninyo na sa Alduw ka Pag-osgar, mas magubat a padosang aakoon ninyo kisa manga taga Tiro sagkud taga Sidon. 23 Sagkud kamong manga taga Capernaum, gosto ninyong itaas anggan langit? Diri, ta ioolog kamo sa Hadesc. Ta kin so manga ngangalasan na ginibo siton inyo ginibo sa Sodoma, isan pa kintana adi anggan ngowan. 24 Alagad sinasabi ko kaninyo, sa Alduw ka Pag-osgar mas magubat a padosang aakoon ninyo kisa manga taga Sodoma.”
Agko Kapaingaloan ki Jesus
(Lk. 10:21-22)
25 Ko oras man sanang adto sinnabi si Jesus, “Inoomaw ko ika Ama, Kagorangnan ka langit sagkud ka raga, ta itinago mo a manga bagay na adi sa manga madodonong sagkud agko inadalan, sagkud inaayag mo sa manga agko buut na arug sa manga igin. 26 Opo, Ama, inoomaw ko ika ta amo adi a kagostowan mo.”
27 Pagkatapos sinabi niya sadto manga tawo, “Itinao kanaku ka kanakung Ama a ngamin na bagay. Uda nakabibisto sa Igin kindi a Ama, sagkud uda nakabibisto sa Ama kindi a Igin sagkud a manga pinili ka Igin na paayagan niya.
28 Romapo kamo kanaku, kamo ngamin na napapagal sagkud nagugubatan ka kaninyong manga pas-anun, ta tatawan ko kamo sa kapaingaloan. 29 Somonod kamo ta makatutuud kamo kanaku, ta mabuut ako sagkud mapagpakombaba. Makapaiingalo kamo, 30 ta madaling koyogon a kanakung manga katottoroan sagkud magaan a kanakung ipinagigibo.”