24
Sinabi ni Jesus a Pagkaraut ka Templo
(Mk. 13,1-2; Lk. 21,5-6)
1 Pagkatapos linnowas na si Jesus sadto Templo. Mantang nag-aagi iya rinnapo kanya so manga disipolo sagkud ipinabayad kanya so pagkatogrok ko Templo.
2 Alagad sinabi niya, “Nababayad ninyo yan ngamin? Sinasabi ko kaninyo a kamatoranan, uda matutuda ni usad na bato sa ibabuw ka usad na bato, ta an ngamin marurumpag.”
A Patanid manungud ka manga Kasakitan na Omaabot
(Mk. 13,3-13; Lk. 21,7-19)
3 Mantang nakaula si Jesus sadto Bokid ko manga Olibo, pailum iyang rinapo ko manga disipolo sagkud inonga, “Kono po adi mingyari, sagkud ono a magigin tanda ka pagbalik mo sadi otro sagkud a kataposan ka kinaban?”
4 Sinnimbag si Jesus, “Magbantay kamo tanganing diri kamo madaya sa kiisay man.
5 Ta kadakul ka omiiyan sadi sa ngaran ko sagkud migsabing, ‘Ako a Cristo!’
Sagkud dakul sirang madadaya. 6 Makarurungug kamo sa giyera sagkud sa manga bareta manungud sa manga paglalabanlaban. Alagad diri kamo maporisaw holi ta kaipowan talagang maotob a manga bagay na adi. Alagad buku pa yan a kataposan ka kinaban. 7 A manga nasyon mikipiglaban sa pareyo nasyon, sagkud a kahadian sa pareyo kahadian. Migkaagko tag-alup sagkud manga linog sa manlainlain na logar. 8 A ngamin na adi kapinonan pa sana ka manga kasakitan arug sa usad na babaying mingngigin.
9 Pangala, iaakosar kamo tanganing pasakitan sagkud guranun. Ikauungut kamo ka manga tawo sa ngamin na nasyon holi ka pagsonod ninyo kanaku. 10 Sa panawon na an dakul a migtalikod sa pagtobod. Tatraydoron sagkud ikauungut nira a kada usad. 11 Dakul na manga parasaginsagin na propeta a omaabot sagkud dakul na tawo a madadaya. 12 A karatan migluyap kaya mauudaan sa pagkabuut a kadaklan. 13 Alagad a siisay man na makatagal sa pagtobod anggan sa kataposan, maliligtas. 14 Sagkud a Maraay na Baretang adi manungud ka paghahadi ka Diyos ipingngadal sa bilog na kinaban, bilang patonay sa ngamin na tawo. Pangala a kataposan omaabot na.”
A Makatatakot na Pagkarugma ka Jerusalem
(Mk. 13:14-23; Lk. 21:20-24)
15 Padagos na sinabi ni Jesus, “Sa omaaboton maootob kin ono so propesiya ni Propeta Daniela na agko usad na Maraut. Kamong manga nagbabasa intindiyun ninyo adi sa maraay! 16 Kin maotob na adi, a manga nakaistar sa Judea domulag na sa kabobokidan. 17 A manga nasa atup diri na bomaba tanganing komoko sa ono man na bagay sa luug ka baluy. 18 A manga nasa bokid diri na mag-oli tanganing komoko sana sa pang-alikbuy. 19 Erak man ka manga mabrus sagkud a nagpapasosong manga ina ka manga alduw na an! 20 Ipangadyi ninyo na a pagdulag ninyo diri maupud sa tag-agnuw o ka Alduw ka Pagpapaingalo. 21 Ta ka panawon na an, makamamati a manga tawo sa sobrang kasakitan na diri pa nira namamatian poon pa ko lalangun a kinaban anggan ngowan, sagkud diri na mamamatian otro anggan pa man. 22 Sagkud kin diri paatlukutun ka Diyos a panawon na an, uda ni siisay man na makaliligtas. Alagad, alang-alang ka manga pinili niya, paaatlukutun niya a panawon na an.”
23 “Sagkud kin agko magsabing, ‘Isadi a Cristo,’ O ‘Isadto iya,’ Diri kamo kan magtobod. 24 Ta agko kan omaabot na migsaginsagin na Cristo o manga propeta na gomigibo sa manga milagro sagkud ngangalasan tanganing dayaun pati so manga pinili ka Diyos. 25 Tandaan ninyong isinabi ko na adi kaninyo bago pa maotob.”
26 “Kaya kin agko magsabi kaninyong, ‘Sadto kalangtaran a Cristo,’ diri kamo sadto omiyan, o kaya, ‘San iya kwarto,’ diri kamo magtobod. 27 Ta kin gaomno kaispid a kitkilat na galin sa sirangan paiyan sa sulnuran na mababayad ka ngamin na tawo, arug man kan a pag-abot kong Igin sa Tawo. 28 Sigoradong maootob adi ngamin arug sa sinasabi, ‘Kin sari a manga guraan, isan man migkatitipon a manga bowetre.’ ”
A Pag-abot ka Igin sa Tawo
(Mk. 13,24-27; Lk. 21,25-28)
29 “Pagnatapos tolos a grabing kasakitan sa panawon na an,
migngitngit a alduw,
sagkud diri na migliwanag a bolan.
Migkatitikrag a manga bitoon,
sagkud a kapangyariyan ka kaiwasan
mayuyugyug.b
30 Pangala, a tanda ka Igin sa Tawo mababayad sa langit sagkud migtangis a ngamin na tawo sa bilog na kinaban. Mababayad nira a Igin sa Tawo omaabot na nasa ibabuw ka panganoron na agko kapangyariyan sagkud dakulung kamorawayan. 31 Sagkud sa paagi ka makusug na tonog ka trompeta, imamanda niya a manga anghel sagkud titiponon nira so manga pinili ka Diyos sa interong parte ka kinaban.”
A Leksiyon ka Poon sa Igos
(Mk. 13,28-31; Lk. 21, 29-31)
32 “Intindiyun ninyo a leksiyon ka poon sa igos, kin a manga sanga niya nagsasaringsing sagkud pinagdadawonan na, isi ninyong arani na a tag-init. 33 Kaya kin mabayad ninyong nangyayari na a manga bagay na adi, maiisiyan ninyong madali na akong omabot. 34 Sinasabi ko kaninyo a kamatoranan, mingyari a manga bagay na adi bago magraan a manga tawong naboboway ngowan. 35 Mauuda a langit sagkud a kinaban, alagad a kanakung oosipun migpadagos anggan pa man.”
Magpreparar Kamo
(Mk. 32-37; Lk. 17,26-30, 34-36)
36 “Manungud sa alduw o oras na kanakung pag-abot, uda kadi nakaiisi dawa a manga anghel sa langit o ako mismo, a Ama sana a nakakaisi kadi. 37 A pag-abot ka Igin sa Tawo, makapapareyo sadto pagbaha ko panawon ni Noe. 38 Bago omabot so panawon ko pagbaha, so manga tawo nangagkakaunan, nag-iirinoman, nangag-aaragoman anggan sa alduw na lomuug si Noe sadto arka. 39 Uda sira pagkaisi kin ono so nangyayari anggan sa omabot so baha sagkud nalumus sira ngamin. Arug man kan a mingyari sa pag-abot ko na Igin sa Tawo.
40 Ka panawon na an, kin agko darwang nagtatrabawo sa bokid, kokoon a usad alagad a usad matatagak. 41 Agko man darwang babaying nagbababbayo, a usad kokoon a usad matatagak. 42 Kaya magin anda kamo sa ngamin na oras, ta diri ninyo isi kin kono omaabot a Kagorangnan ninyo. 43 Tandaan ninyo adi, kin isi sana ka kagsadiri ka baluy kin kono omaabot a mataban, babantayan niya adi sagkud diri iya tomotogot na luugun a baluy niya. 44 Kaya magin kamong preparado pirmi, ta omaabot akong Igin sa Tawo sa panawon na diri ninyo linalaoman.”
A Matanos sagkud bukung Matanos na Mamandaan
(Lk. 12, 41-48)
45 “A matanos sagkud madonong na mamandaan amo a napagkakatiwalaan ka kanyang among na mamaala ka ibang mamandaan sagkud magtao sa pagkaun nira sa oroalduw. 46 Paladan a mamandaan na an kin maabotan iya ka among niyang ginigibo a trabawo niya. 47 Sinasabi ko kaninyo a kamatoranan, pipimmalaun iya ka ngamin na pagsorosadiri ka among niya. 48 Alagad erak man ka maraut na mamandaan na an kin inuuna niyang mauban pang bomalik so among niya, 49 sagkud mantang uda adi aaprusan niya so kapareyo niyang mamandaan, sagkud mikikaunan sagkud mikiinoman iya sadto manga parainom. 50 Omaabot so among niya sa alduw sagkud oras na diri niya linalaoman. 51 Kaya padodosaan iya saigo sagkud iaapon sa logar ko manga parasaginsagin. Kin sari migtangis sagkud migragut a manga ngipun niya sa sakit.”