25
A Parabola manungud sa Sampolong Raraga
1 “A paghahadi ka Diyos maiaarug sa sampolong raraga na agko borobitbit na daso sagkud linnowas tanganing sabatun so nobyo. 2 So lima kanda patal, so lima madodonong. 3 So limang patal, nagdara sa daso kindi diri nagdara sa pasigorong lana. 4 Alagad so limang madodonong nagdara pa sa pasigorong lana, pwera ko isadto daso nira. 5 Naabala so pag-abot ko nobyo kaya so manga raraga nakatorog sa pag-ulat.
6 Ko lawud na, agko rinnait, ‘Taiton na so nobyo! Lowas na kamo tanganing sabatun iya!’ 7 Kaya binnangon so sampolong raraga sagkud pinakaraay so daso nira. 8 Sagkud sinabi ko manga patal sadto madodonong, ‘Paayat man kami ka lana ninyo ta maromarum na ading daso namu.’
9 Sinnimbag sira, ‘Diri pwede ta diri man adi osto kanatu ngamin. A maraay kan omiyan kamo sadto tindaan tanganing bomakal sa gagamitun ninyo.’ 10 Alagad mantang nagbabakal sira sa lana, innabot man so nobyo. Kaya so limang nakaanda, kaiba ko nobyong linnuug sadto kinasalan. Saka so pwertaan isinarado. 11 Pagkangumunngumun innabot naman so limang patal sagkud nagkakagrat, ‘Kagorangnan, Kagorangnan, paluugun mo kami!’ 12 Alagad sinnimbag iya, ‘Sinasabi ko kaninyo a kamatoranan, diri ko kamo bisto.’
13 Pangala padagos na sinabi ni Jesus, ‘Mag-andam kamo pirmi ta diri ninyo isi a alduw o oras kin kono ako bomabalik.’ ”
A Parabola manungud ko Tolong Mamandaan
(Lk. 19:11-17)
14 “A paghahadi ka Diyos maiaarug sa usad na lalaking mig-iyan sa arayong logar, kaya ipinabaoy niya so manga mamandaan niya tanganing amo mamaala ko pagsorosadiri niya. 15 Tinawan niya sa kwarta so kada usad sigon sa kakayanan nirang magnigosyo. Tinawan niya so usad sa singko mil, so usad dos mil, so usad sangribo. Pangala ginnalin na iya.
16 Kaya so mamandaan na tinawan sa singko mil ipinagnigosyo adto sagkud nakaganansiya man sa singko mil. 17 So mamandaan na tinawan man sa dos mil nakaganansiya man sa dos mil. 18 Alagad so mamandaan na tinawan sa sangribo, kinnalot sadto raga saka itinalbung so sintabo ko among niya.”
19 “Pagkaagi sa uban na panawon, binnalik so among nira, binaoy so manga mamandaan tanganing isiyun kin ono nangyari ko sintabo niya. 20 Rinnapo so mamandaan na tinawan sa singko mil sagkud sinnabi, ‘Among, so itinao mo tabi kanakung singko mil nakaganansiya man sa singko mil.’
21 Kaya sinnabi so among niya, ‘Usad ikang maraay sagkud maimbod na mamandaan! Nagin maimbod ika sa gatikot na bagay, pipimmalaun ta ika sa mas dakul. Mayang ta makipag-ogma ika kanaku!’
22 Pangala rinnapo man so tinawan sa dos mil sagkud sinnabi, ‘Among, taadi man po so itinao mong dos mil sagkud nakaganansiya man po sa dos mil.’ 23 Sinnimbag so among nira, ‘Usad ikang maraay sagkud maimbod na mamandaan! Nagin maimbod ika sa gatikot na bagay, pipimmalaun ta ika sa mas dakul na bagay. Mayang ta makipag-ogma ika kanaku!’
24 Pangala, rinnapo man so tinawan sa sangribo sagkud sinnabi, ‘Among, isi ko po na mala mong sakitsakitun, ginogosi mo a buku mong tanum, sagkud inaani mo a buku mong asuk. 25 Nakatakot po ako kanimo kaya itinago ko sa kalot so sintabo mo. Taadi na po so sangribo mo.’
26 Sinnimbag so among niya, ‘Maraut sagkud ogakun na mamandaan! Isi mo na palan na ginnogosi ako sa buku kong tanum sagkud innaani ako sa buku kong asuk! 27 Kintana idiniposito mo sa bangko so kwarta ko tanganing pagbalik ko agko ako makokong ganansiya.’
28 Kaya sinnabi iya sadto manga ibang mamandaan, ‘Koon ninyo kanya a sangribo sagkud itao sadto agko dyis mil. 29 Ta a agko tatawan pa sa mas dakul, alagad a uda, onoman na isan kanya kokoon pa. 30 Iapon ninyo sadto lowas a uda sirbing mamandaan na an. Sadto, migtangis iya sagkud migragut a ngipun niya sa sakit.’ ”
A Oltimong Pag-osgar
31 “Akong Igin sa Tawo omaabot bilang Hadi kaiba a manga anghel, sagkud omuula ako sa trono ka kanakung kamorawayan. 32 Titiponon sa atobangan ko a ngamin na tawo sagkud lalainun ko a kada usad, arug ka ginigibo ka paraataman ka manga karnero sagkud manga kanding.
33 Ibubutang ko sa too ko a manga karnero sagkud sa wala so manga kanding. 34 Pangala sasabiyun ko sadto nasa too ko, ‘Mayang kamo sadi, manga benindisyonan ka kanakung Ama, lomuug kamo sagkud omistar sa kahadian na iinanda para kaninyo poon pa ko lalangun a kinaban. 35 Ta ko nag-alup ako pinakaun ako ninyo, ko napaa ako pinainom ako ninyo. Usad akong dayowan alagad pinadagos ninyo. 36 Uda ako maisopong alagad binadoan ninyo, ko nagkailang ako, inataman ninyo ako, sagkud ko mapriso ako binisita ninyo.’
37 Pangala somisimbag so manga matanos kanya, ‘Kagorangnan, kono tabi ika namu nabayad na nag-alup sagkud pinakaun, o napaa sagkud pinainom? 38 Sagkud kono po ika nagin dayowan sagkud pinadagos, o uda maisopong kaya binadoan? 39 Sagkud kono ika namu nabayad na nagkailang o napriso kaya binisita namu ika?’
40 Sagkud somisimbag ako bilang Hadi, ‘Sinasabi ko kaninyo a kamatoranan, ko gibowon ninyo adi sadto usad sa manga parasonod ko, dawa sadto pinakasadit ginibo ninyo adi kanaku.’
41 Pangala sasabiyun ko man sadto manga nasa wala ko, ‘Romayo kamo kanaku, manga isinompa! Omiyan kamo sa impiyerno na iinanda ko para sa diyablo sagkud sa manga kampon niya. 42 Ta nag-alup ako diri ninyo ako pinakaun, napaa alagad diri ninyo pinainom, 43 usad akong dayowan, alagad diri ninyo pinadagos, nangaipo sa isosopong alagad diri binadoan, nag-ilang ako sagkud napriso alagad diri ninyo ako inataman.’
44 Kaya oongaun nira ako, ‘Kagorangnan, kono tabi ika namu nabayad na nag-alup o napaa, nagin dayowan o nangaipo sa isosopong, nag-ilang o napriso, alagad diri namu tinabangan?’ 45 Somisimbag ako bilang Hadi, ‘Sinasabi ko kaninyo a kamatoranan, ono man na diri ninyo pagtabang sa usad sa pinakasadit sa manga tawong adi, ako a diri ninyo tinabangan.’ 46 Pangala, paiiyanun sira sadto kapadosaan na uda kasagkuran, alagad a manga matanos sadto boway na uda kasagkuran.”