23
Pinataniran ni Jesus so manga Pariseo sagkud manga Paratottoro sa Layi
(Mk. 12,38-39; Lk. 11,37-52; 20,45-47)
1 Pangala sinabi ni Jesus sadto manga tawo sagkud manga disipolo niya,
2 “A manga paratottoro sa Layi sagkud manga Pariseo sana, amo a binibistong mag-isplikar ka Layi ni Moises. 3 Kaya koyogon ninyo sagkud gibowon a itinotottoro nira. Alagad diri ninyo sira pag-arugun ta diri nira ginigibo a kandang itinotottoro.
4 Tinatawan nira sa magugubat na kamandaan a manga tawo alagad ni a gigis nira abung iwagun tanganing tomabang. 5 A manga ginigibo nira poro sana pagsaginsagin. Silngi ninyo a malalakbang na tela na nasosoratan ka manga bersikolo na nakabugkus sa kandang angug sagkud takyag. Silngi man ninyo a maaabang kawingkawing na nakakabit sa gayad ka bado nira. 6 Nabubutan nira a pinakamagayon na logar sa manga andaan sagkud a manga nakatagamang ulaan sadto sinagoga. 7 A gosto nira pirming sinasalodowan sa katatawowan sagkud binabaoy na Maestro.
8 Alagad kamo, diri kinakaipowan na magpabaoy sa maestro ta uusad sana a Maestro ninyo sagkud kamo ngamin magngongod. 9 Sagkud diri ninyo pagbaoyon sa ama a siisay man na tawo sadi kinaban, ta uusad sana Ama ninyo, a Amang nasa langit. 10 Diri kamo magpabaoy sa paratottoro, ta uusad sana Paratottoro ninyo, amo si Cristo. 11 A pinakadakulu kaninyo kaipowan magin tagasirbi ninyo. 12 A siisay man na nagpapakalangkaw ibinababa, sagkud a siisay man na nagpapakababa ilinalangkaw.
Kinondenar ni Jesus so kandang Pagsaginsagin
(Mk. 12:40; Lk. 11:39-42, 44, 52; 20:47)
13-14 Erak man kaninyo, manga paratottoro sa Layi sagkud manga Pariseo! Kamong manga para saginsagin! Inuulang ninyo a manga tawo tanganing diri mapaghadian kana Diyos. Abu na ngani ninyong pasakup sa Diyos, inuulang pa ninyo a gostong pasakup!a
15 Erak man kaninyo, manga paratottoro sa Layi sagkud manga Pariseo! Kamong manga parasaginsagin! Nagsasakuy kamo sa manga kadagatan sagkud nagbabaklay sa manga karagaan makabinsir sana kamo sa dawa usad na bukung Judio na makatobod arug kaninyo. Alagad kin adi mabinsir na, ginigibo ninyong mas maraut pa kisa kaninyo, kaya doble a padosa kanda sa impiyerno kisa kaninyo.
16 Erak man kaninyo, manga botang tagakabit! Itinotottoro ninyo na kin a usad na tawo manompa sa templo, diri na niya kaipowan na topadun adi. Alagad kin manompa iya sa bolawan na isan templo, kaipowan niyang topadun adi. 17 Manga bota! Manga patal! Ari a mas dakulu, a bolawan o a templo na nagpapabanal ka bolawan?
18 Itinotottoro man ninyo na kin manompa a usad na tawo sa altar, diri na niya kaipowan na topadun adi. Alagad kin manompa iya sa atang na isan altar, kaipowan niyang topadun adi. 19 Manga bota! Ari a mas dakulu, a atang o a altar na nagpapabanal ka atang? 20 Kaya ngani, kin nanonompa a usad na tawo sa altar, nanonompa man iya pati ka atang na isan altar. 21 Kin nanompa iya sa templo, nanonompa man iya pati sa Diyos na nag-iistar san. 22 Sagkud kin nanompa iya sa langit, nanonompa man iya pati sa trono ka Diyos sagkud sa nakaula san.
23 Erak man kaninyo, manga paratottoro sa Layi sagkud manga Pariseo! Kamong manga parasaginsagin! Itinatao ninyo sa Diyos a ikasampolong parte ka inaani ninyo sa golayan, alagad linilingawan ninyo a pinakaimportanteng bagay ka Layi. Amo a pagigin patas, a pagigin maeerakun, sagkud a pagigin matood. Tamang gibowon ninyo adi alagad diri man ninyo paglingawan a paggibo ka iba. 24 Manga botang tagakabit! Sinasara ninyo a manga layoglayog sa inomon ninyo alagad tinutulun ninyo a kamelyo!
25 Erak man kaninyo, manga paratottoro sa Layi sagkud manga Pariseo! Kamong manga parasaginsagin! Inoogasan ninyo a sa lowas ka manga tasa sagkud pinggan ninyo, alagad sa luug kan pono sa kaangapan sagkud pagigin makasadiri. 26 Ka manga bota ninyo, manga Pariseo! Linigun ngona ninyo a sa luug kana tasa sagkud pinggan ninyo tanganing lominig man a sa lowas kadi.
27 Erak man kaninyo, manga paratottoro sa Layi sagkud manga Pariseo! Kamong manga parasaginsagin! Arug kamo ka manga lulubngan na pinintaan sa poti, kaya malanggayon na silngan sa lowas. Alagad sa luug pono sa manga tolang sa guraan sagkud sa manga manlainlain na ati. 28 Arug mananggayud na kamo kan! Sa pagsilung ka tawo mala ninyong raraay, alagad sa kamatoranan nagsasaginsagin sana man sagkud pono sa karatan.”
Sinabi ni Jesus a magigin Kapadosaan Nira
(Lk. 11:47-51)
29 “Erak man kaninyo, manga paratottoro sa Layi sagkud manga Pariseo! Kamong manga parasaginsagin! Pinatogrokan ninyo sa lulubngan so manga propeta sagkud dinikorasyonan so manga pantiyong ko manga matatanos na tawo. 30 Pangala sinabi ninyong, ‘Kin kami sana naboway na kadtong panawon ko kanamung manga ginikanan, diri kami makiuusad kandang guranun so manga propeta.’ 31 Alagad sa manga sinabi ninyong an, pinamatoranan ninyong erensiya kamo ko manga ginnuraan ko manga propeta. 32 Kaya sige! Taposa ninyo so pinonan ko manga ginikanan ninyo! 33 Kamong manga madadaya sagkud mararaut arug sa rimoranun! Padodosaan kamo ka Diyos sadto impiyerno sagkud diri kamo san makadudulag!
34 Kaya padadaraan ko kamo sa manga propeta, manga madodonong na tawo sagkud manga paratottoro ka oosipun ka Diyos. A iba kanda guguranun ninyo sagkud a iba ipapako ninyo sa kros, sagkud a iba man, aampakun ninyo sa manga sinagoga sagkud padidipisilan sira sa kada banwaan. 35 Kaya kamo a mapadodosaan, holi ko pagguraan ko ngamin na matanos, poon ko pagguraan ki Abel anggan ko pagguraan ki Zacarias na igin ni Baraquias, na ginuraan ninyo sadto pag-ultanan ko Templo sagkud altar. 36 Sinasabi ko kaninyo a kamatoranan, a manga tawo ngowan a mapadodosaan ka ngamin na nangyaring adi.”
A Pagkabuut ni Jesus sa Jerusalem
(Lk. 13,34-35)
37 “O manga tagaJerusalem! Ginuraan ninyo sagkud pinagbabato so manga iminanda ko paiyan siton inyo. Pirang beses kong iningoang tiponon sagkud atamanun kamo pareyo ka pagkobkob ka usad na isiwan sa manga isiw niya, alagad abu ninyo. 38 Kaya pababayaan ka Diyos a templo ninyo. 39 Ta sinasabi ko kaninyo, diri na ninyo ako mababayad anggan na sabiyun ninyong,
‘Paladan a omaabot
sa ngaran ka Kagorangnan.’ ”