13
A Parabola manungud ka Parasabwag
(Mk. 4:1-9; Lk. 8:4-8)
1 Ko alduw man sanang adto, linnowas si Jesus sadto baluy sagkud inniyan sadto gilid ko ranuw. 2 Pinalibotan iya sa malakadakul na tawo, kaya linnonad iya sadto bangka sagkud innula, mantang so manga tawo nakatindug sadto pangpang. 3 Pangala nagtottoro iya sa paagi sa manga parabola, “Agko usad na paraoma na nagsabwag sa binni. 4 Mantang isinasabwag niya so binni, so iba naolog sadto aagyan, sagkud innabot so bayong sagkud tinoka sana adto. 5 So iba naolog sa kababatwan, kin sari gagatikot so raga kaya tinnobo tolos adto. 6 Alagad naloyos man adi ko mainitan ko alduw, holi ta diri nakagamot saigo. 7 So ibang binni naolog sa matotodok na doot, dinnakulu so doot sagkud natawban so manga binning tinnobo. 8 Alagad so ibang binni naolog sa balonbon na raga. Tinnobo a manga adi sagkud binnonga sa tigsanggatos, tigsisinta, sagkud tigtrenta. 9 Kamong manga nag-iirungug, kaipowan ninyong pag-isipan adi!”
A Katoyowan ka manga Parabola
(Mk. 4:10-12; Lk. 8:9-10)
10 Rinnapo ki Jesus so manga disipolo sagkud inonga iya, “Ngata tabi ta pinapaagi mo sa parabola a pagtottoro mo sa manga tawo?”
11 Sinnimbag si Jesus kanda, “Kwasang kaninyo itinao a pagkaintindi ka manga ilum na bagay manungud sa paghahadi ka Diyos, alagad diri adi itinao sa iba. 12 Ta a tawong nangangataman ka narungug niyang kamatoranan tatawan pa sa mas orog na pagkaintindi. Alagad a manga tawong diri nangangataman ka kamatoranan dawa a gatikot niyang naiintindiyan kokoon pa kanya.” 13 Kaya ako nagtottoro kanda sa parabola,
“Ta dawa sira somilung, diri sira nakababayad;
sagkud dawa sira mag-irungug, alagad diri man sira nakaiintindi.”
14 Kanda naotob so sinabi ka Diyos ki Propeta Isaias,
“ ‘Mag-irungug man kamo, diri kamo makaiintindi;
somilung man kamo, diri kamo makababayad.
15 Ta pangul a manga tawong adi;
dipisil makarungug a kandang manga talinga,
sagkud pinirung nira so kandang manga mata.
Ta kin diri, makababayad kintana a kandang manga mata,
makarurungug a kandang manga talinga, sagkud makaiintindi pa sira
saka binnalik kanaku, sagkud parayun ko sira.’ a
16 Alagad paladan kamo holi ta nakababayad kamo ka manga gibo ko, sagkud nakarurungug kamo ka manga sinasabi ko. 17 Kaya sinasabi ko kaninyo a kamatoranan, dakul na manga propeta sagkud manga matatanos na tawo a gostong makabayad ka nababayad ninyo sagkud makarungug ka narurungug ninyo, alagad diri adi nangyari sa panawon nira.”
Inisplikar so Parabola manungud ko Parasabwag
(Mk. 4:13-20; Lk. 8:11-15)
18 “Irunggun ninyo kin ono a buut sabiyun ko parabola manungud ka parasabwag. 19 A siisay man na nag-iirungug ka oosipun manungud ka paghahadi ka Diyos alagad diri nakaintindi ko kandang narungug arug ko binning naolog sadto raran, innabot si Satanas, sagkud inaguw so oosipun na natanum sa poso niya. 20 So binning naolog sadto kababatwan arug ko manga tawong nakarungug ka oosipun ka Diyos sagkud mamuyang nag-irungug sagkud nag-ako tolos ka oosipun ka Diyos. 21 Alagad bukung tuduk sa poso so pag-ako nira, kaya diri nag-uban so kandang pagtobod. Pag-abot ko kadipisilan o pagpersiger holi ka oosipun ka Diyos na kandang inako tinnalikokod sira tolos sa kandang pagtobod. 22 So binning naolog sadto katotodokan arug man ka manga tawong nakarungug ka oosipun ka Diyos, alagad holi sa manga kaporisawan sadi kinaban sagkud pagmawut na yomaman nalilingawan nira a oosipun ka Diyos. Kaya diri binnonga so oosipun sa kandang boway. 23 Alagad so binning naolog sa balonbon na raga, arug ko manga tawong nag-irungug ka oosipun ka Diyos sagkud naintindiyan adi. Kaya padagos sirang nagbobonga, so iba tigsanggatos, so iba tigsisinta sagkud so iba tigtrenta.”
A Parabola manungud sa Doot na Tinnobo sa Trigowan
24 Pangala, innistorya pa kanda si Jesus sa usad na parabola, “A paghahadi ka Diyos, maiaarug sa usad na lalaking sinnabwag sa matayong binni sadto patanuman niya. 25 Alagad, kinagab-iyan mantang natotorog sira ngamin, innabot so kasogot niya sagkud sinnabwag sa doot saka ginnalin. 26 Ko so binni tinnobo na sagkud namonga, so doot tinnobo naman.
27 Kaya so mamandaan rinnapo sadto kagsadiri sagkud sinnabi, ‘Maestro, buku tabing sinnabwag ika sa matayong binni sadto patanuman mo? Ngata po ta agko na doot?’
28 Sinnimbag so kagsadiri, ‘Usad na kasogot a kaggibo kadi.’
Inonga iya ko mamandaan, ‘Gosto tabi ninyong awanun namu so doot?’
29 ‘Diri na, ta baka maawan pa ninyo pati a trigo,’ simbag niya. 30 Pabayai na ninyong pareyo sirang tomobo anggan sa tig-aniyan. Kin omabot na a panawon na an, saka ko na sana sasabiyun sa paraani, ‘Onaun ngona ninyong gaboton a doot saka bugkusun tanganing sobsoban, pagkatapos kadi aaniyun nira a trigo sagkud dadarawun sadto balayan ko.’ ”
A Parabola manungud ka Tolang sa Mostasa
(Mk. 4:30-32; Lk. 13:18-19)
31 Pangala innistorya pa kanda si Jesus sa usad na parabola, “A paghahadi ka Diyos arug sa usad na tolang sa mostasa na itinanum ko usad na lalaki sadto tatamnan niya. 32 Dawa a tolang sa mostasa pinakasadit sa ngamin na binni, alagad pagtobo kadi, nagigin mas dakulu adi sa onoman na klase sa golay sagkud nagigin arug adi kadakulu sa kawoy. Kaya nakapaggigibo sa salagan a manga bayong sa manga sanga kadi.”
Parabola manungud sa Pampaalsa
(Lk. 13:20-21)
33 Innistorya pa iya sa usad na parabola, “A paghahadi ka Diyos arug sa pampaalsang isinalak ka usad na babayi sa tolong takad na arina anggan sa omalsa adi.”
A Paggamit ni Jesus sa Parabola
(Mk. 4:33-34)
34 Ngamin adi iinistorya ni Jesus sadto manga tawo sa paagi sa parabola, uda iya sinabi kandang diri ginnamit sa parabola. 35 Sa paaging adi naotob so sinabi ka Diyos sa paagi ko propeta,
“Migngabil ako kanda sa paagi sa manga parabola,
iaayag ko kanda a manga bagay na ilum poon pa ko lalangun a kinaban.”
Iinisplikar ni Jesus so Parabola ka Doot
36 Pagkatapos na bayaan ni Jesus so manga tawo, linnuug iya sadto baluy. Rinnapo kanya so manga disipolo sagkud sinnabi, “Pakiisplikaran man tabi kanamu so parabola ko manga doot na isinabwag sadto tanuman.”
37 Sinnimbag si Jesus, “A nagtanum ka maraay na binni uda iba kindi akong Igin sa Tawo. 38 A patanuman amo a kinaban, sagkud a maraay na binni amo a manga tawong kaiba sa paghahadi ka Diyos. Sagkud a doot amo a manga nasasakpan ni Satanasb. 39 A diyablo amo a kasogot na nagtanum kanda. A aniyan amo a kataposan ka kinaban, sagkud a manga paraani amo a manga anghel.
40 Kin paonong ginagabot a manga doot pangala sosobsoban, amo man an mingyari ka manga mararaut na tawo sa kataposan ka kinaban. 41 Akong Igin sa Tawo a migpadara sa manga anghel, sagkud aalinun nira sa kahadian ko a nagigin rason ka pagkakasala ka iba sagkud a ngamin na naggigibo sa kasalan. 42 Sagkud iaapon ka manga anghel a manga adi sadto nagbabagang kalayo, na kin sari mig-adrangay sira sagkud migragut a kandang manga ngipun. 43 Pangala a manga matatanos migliwanag na bagana alduw sa kahadian ka kandang Ama. Kamong manga nag-iirungug, kaipowan ninyong pag-isipan adi!c”
A Parabola ka Nakatagong Kayamanan sagkud Perlas
44 “A paghahadi ka Diyos arug sa kayamanan na nakatalbung sadto patanuman. Nakotkot adi ko usad na tawo alagad dalidali ading tinawban. Mala niyang muyang innoli sagkud ipinabakal so ngamin niyang pagsorosadiri tanganing baklun so patanuman na adto.”
45 “Amo man, a paghahadi ka Diyos arug sa usad na negosyanteng nag-aanap sa maraay na klasing perlas. 46 Ko makabayad iya sa malakamamalun na perlas, ipinabakal niya so ngamin na pagsorosadiri niya sagkud binakal so perlas na adto.”
A Parabola ka Laya
47 “A paghahadi ka Diyos pareyo man sa usad na dakulung laya na inaapon sa ranuw sagkud nakarakup sa manlainlain na isura. 48 Ko mapono na so laya, binutung na adi ko manga paraisura saka dinara sadto pangpang. Innula sira tanganing lainun so isura. So maraay na isura ibinubutang nira sa bubutangan, sagkud so manga diri na pakikinabangan inaapon nira. 49 Arug man kadi a mingyari sa kataposan ka kinaban. Omaabot a manga anghel sagkud lalainun nira a manga mararaut sa manga matanos, 50 pangala iaapon sira sadto nagbabagang kalayo, na kin sari mig-adrangay sagkud migragut a kandang manga ngipun.”
51 Pagkatapos inonga sira ni Jesus, “Naiintindiyan ninyo a ngamin na manga sinasabi ko?”
“Amo tabi,” simbag nira.
52 Sinabi niya kanda, “Kaya ngani a paratottoro sa Layi na natottoroan manungud ka paghahadi ka Diyos, maiaarug sa usad na kagsadiri sa baluy na linnowas sa bago sagkud lomang bagay galin sadto sarayan niya.”
Diri Inako si Jesus sadto Nazaret
(Mk. 6:1-6; Lk. 4:16-30)
53 Ko matapos nang itottoro ni Jesus so manga parabola, ginnalin na iya sadto. 54 Inniyan iya sa sadiri niyang banwaan, sagkud nagtottoro iya sadto kandang sinagoga. Nangalas so manga tawo kaya sinabi nirang, “Sari nakoko ka tawong adi a kadonongan sagkud a kapangyariyan na gomibo sa milagro? 55 Bukung amo adi so igin ko karpentero? Bukung si Maria a kag-igin niya, sagkud a manga ngod niya amo sira Santiago, Jose, Simon saka Judas? 56 Bukung a ngamin niyang ngod na babayi sadi man nakaistar kanatu? Sari raw niya adi nakoko ngamin?” 57 Kaya diri sira nagtobod kanya.
Alagad sinabi ni Jesus kanda, “A usad na propeta iginagalang dawa saring logar pwera sa sadiri niyang logar sagkud pamilya.”
58 Kaya gatikot sana so naginibo niyang ngangalasan sadto ta diri sira nagtobod.