12
Kagorangnan ka Alduw ka Pagpapaingalo
(Mk. 2:23-28; Lk. 6:1-5)
1 Usad na alduw, si Jesus sagkud so manga disipolo niya innagi sadto trigowan ko Alduw ka Pagpapaingalo. Malana ka alup ko manga disipolo niya kaya pinnoknit sira sa manga topasi ko trigo sagkud kinaun. 2 Ko mabayad adto ko manga Pariseo, sinabiyan iya nira, “Silngi a manga disipolo mo naggigibo ka manga ipinagbabawal na gibowon sa Alduw ka Pagpapaingalo.”
3 Sinnimbag iya, “Diri ninyo nabasa kin ono so ginibo ni David sagkud ko manga kaiba niya ko mag-alup sira? 4 Linnuug iya sadto baluy ka Diyos, iya sagkud so manga kaiba niya kinaun so tinapay na iinatang sa Diyos dawa ngani a Layi diri tinotogotan a siisay man na magkaun kadi, kindi a manga padi sana. 5 O diri pa ninyo nabasa sa Layi na kin Alduw ka Pagpapaingalo, a manga padi agko ginigibo sadto luug ka templo? Alagad diri sira nagkakasala! 6 Sinasabi ko kaninyo, na agko usad na isadi na mas dakulu kisa Templo. 7 Kin naiintindiyan sana ninyo kin ono a buut sabiyun ka kasabiyan na adi, ‘Pagkaerak a gosto ko, bukung sakripisyo,’ diri kintana ninyo kokondinarun a manga uda kasalan. 8 Ta a Igin sa Tawo amo a Kagorangnan sa Alduw ka Pagpapaingalo.”
Pinaraay so Lalaking Paralisado so Kamut
(Mk. 3:1-6; Lk. 6:6-11)
9 Pagkagalin ni Jesus sa logar na adto inniyan iya sadto sinagoga, 10 na kin sari agko usad na lalaking paralisado so usad na kamut. Sadto man so nagkapirang tawo na gostong akosaran si Jesus sa paggibo sa sala, kaya inonga nira iya, “Oyon raw sa Layi na magparaay sa Alduw ka Pagpapaingalo?”
11 Sinnimbag si Jesus, “Kin usad kaninyo agko karnero sagkud adi naolog sa bobon sa Alduw ka Pagpapaingalo, diri raw ninyo adi aawasun? 12 Mas orog na importante a tawo kisa ka usad na karnero! Kaya mas oyon sa Layi na gomibo sa maraay sa Alduw ka Pagpapaingalo.”
13 Pangala sinabiyan niya so lalaki, “Iunat mo a kamut mo.” Kaya iinunat man niya so kamut niya, sagkud adi nararaay arug ko sadto loyong kamut. 14 Alagad so manga Pariseo ginnalin sagkud plinano kin paono nira maipaguguraan si Jesus.
So Mamandaan na Pinili ka Diyos
15 Ko marungug adto ni Jesus, ginnalin iya sa logar na adto. Dakul na manga tawo so sinnonod kanya, sagkud kadakul na manga nag-iilang so pinaraay niya, 16 alagad pinataniran niya sira na diri ipagparapanabi kin siisay iya. 17 Tanganing maotob kin ono so ipinag-osip ni Propeta Isaias,
18 “Taadi a kanakung serbidor na kanakung pinili,
a usad na kanakung nabubutan, sagkud kinamumuy'an;
itatao ko kanya a kanakung Espirito,
sagkud ipapaayag niya a ostisya sa ngamin na nasyon.
19 Diri iya makipigdiskoter o makipigsilyakan;
ni migtaas sa boses sa manga tinampo.
20 Diri niya popotolon a sigkid na topok,
diri niya paparungun a maromarum na sosoloan
anggan sa a ostisya diri innaabot sa kapangganaan.
21 Kaya sa kanyang ngaran ibubutang ka manga tawo a kandang paglaom.”
Si Jesus sagkud si Beelzebul
(Mk. 3:20-30; Lk. 11:14-23)
22 Pangala dinara kanya so usad na lalaki na bota sagkud ngola na sinasaniban sa maraut na espirito, pinaraay iya ni Jesus, kaya iya nakabayad sagkud nakangabil. 23 Nangalas so ngamin na tawo sagkud sinnabi, “Amo na kaya adi so Igin ni David?”
24 Alagad ko marungug adto ko manga Pariseo, sinnabi sira, “Si Belzebol sana a prinsipe ka manga demonyo, kaya iya a nagtatao kanya sa kapangyariyan na magpalayas sa manga demonyo.”
25 Isi ni Jesus kin ono so manga iniisip nira kaya sinabiyan niya sira, “A kada kahadian na nababanga narurugma, sagkud a kada syodad sagkud baluy na nababanga, narurugma. 26 Kin si Satanas a nagpapalayas ki Satanas, kinokontra man sana niya a sadiri niya. Paono niya mapapatindug a kahadian niya? 27 Sagkud kin ako nagpapalayas sa manga demonyo sa kapangyariyan ni Belzebol, kiisay na kapangyariyan nagpapalayas sa demonyo a manga parasonod mo? A manga tagasonod mo a migpatonay na mala ninyo ka sala. 28 Alagad kin ako a nagpapalayas sa manga demonyo sa kapangyariyan ka na Espirito ka Diyos, buut sabiyun a Kahadian ka Diyos innabot na kaninyo.
29 Uda makaluluug sa baluy ka usad na makusug na lalaki kin diri ngona niya gaposon adi. Pangala kin magapos na adi, saka pa sana niya tatabanan so baluy.
30 A bukung sorog kanaku, tomang kanaku. Sagkud a siisay man na diri tomabang kanakung magtipon, nagwawarak. 31 Kaya sinasabiyan ko kamo: patatawarun a manga tawo ka ono man na kasalan sagkud pagtotomang, alagad diri patatawarun a onoman na pagtomang sa Espirito Santo. 32 A siisay man na mag-osip sa maraut kontra ka Igin sa Tawo, patatawarun, alagad a siisay man na mag-osip sa maraut kontra ka Espirito Santo diri patatawarun, ngowan anggan sa panawon na omaaboton.”
33 “A kawoy nabibisto sa bonga. Kin maraay a kawoy, maraay man a bonga. Kin maraut a kawoy, maraut man a bonga. 34 Manga gikan sa rimoranun, paono kamong makapag-osip sa maraay na bagay na kamo mararaut? Ta kin ono a nakakapono sa poso, amo man a linnolowas sa nganga. 35 A maraay na tawo maraay man na bagay a ginigibo, ta a poso niya pono sa karayan. Alagad a maraut na tawo, maraut man a ginigibo ta pono sa karatan a poso niya. 36 Alagad sinasabiyan ko kamo na ka Alduw sa Pag-oosgar a kada tawo minimbagan ko manga oosipun na uda kamutangan na pigparangabil niya. 37 Ta sa kaninyong manga oosipun, kamo patatawarun sagkud sa kaninyong manga oosipun kamo kokondinarun.”
So Tanda ki Jonas
38 Agko nagkapirang Pariseo sagkud manga paratottoro sa Layi so sinnabi ki Jesus, “Maestro, gosto namung makabayad sa tanda galin kanimo.”
39 Sinnimbag iya, “A mararaut sagkud manga traydor na henerasyon, innaayat sa manga makangangalas na tanda! Alagad uda ibang tanda na itatao kaninyo kindi so tanda ni Propeta Jonas. 40 Ta si Jonas nagtolong alduw sagkud tolong gab'i sadto luug ko boros ko dakulung isura, pareyo man ka Igin sa Tawo tolong alduw sagkud tolong gab'i man sa irarum ka raga. 41 Sa Alduw ka Pag-osgar tomitindug a manga tagaNineve sagkud tomitestigo kontra sa henerasyon na adi. Ta nagsulsul sira matapos na tottoroan ni Jonas. Alagad mas orog pa ki Jonas a isadi. 42 Sa Alduw ka Pag-osgar, tomitestigo man a Reyna ka Seba kontra sa henerasyong adi. Nagbaklay iya galin pa sa poro ko kinaban tanganing mabayad so kadonongan ni Solomon, alagad mas orog pa ki Solomon a isadi.”
43 “Kin a maraut na espirito lomowas sa awak ka usad na tawo, omiiyan an sa marang logar tanganing omanap sa mapapaingaloan. Kin uda adi matorakan, 44 sasabiyun niya, ‘Bomabalik ako sadto ginalinan ko.’ Pagbalik niya sagkud mabayad ading uda luug, malinig sagkud osay, 45 lomolowas iya otro sagkud omiiba pa sa pitong espirito na mas mararaut kisa kanya, sagkud sadto sira ngamin omiistar. Holi kadi, a magigin kamutangan niya mas maraut pa kisa ko dati. Arug kadi a mingyari sa mararaut na henerasyon na adi.”
So Kag-igin na Babayi sagkud Ngod ni Jesus
46 Mantang si Jesus nag-oosip pa sadto manga tawo, so kag-igin niyang babayi sagkud manga ngod niya innabot sagkud gosto iyang makaosip. 47 Agko usad na sinnabi kanya, “So kag-igin mong babayi sagkud manga ngod mo san lowas, nag-uulat kanimo ta gosto ikang makaosip.” 48 Sinnimbag si Jesus kanda, “Siisay a kanakung kag-igin sagkud manga ngod?” 49 Itinotottoro niya so manga disipolo niya sagkud sinnabi, “Sira a kanakung ina sagkud manga ngod! 50 Ta a siisay man na kinnokoyog ka kabutan ka kanakung Amang nasa langit, amo a kanakung ina, sagkud kanakung manga ngod.”