14
So Pagkagraan ni Juan na Parabunyag
(Mk. 6:14-29; Lk. 9:7-9)
1 Ko panawon na adto, nabaretaan ni Herodes na namomoon sa Galilea, so manungud ki Jesus, 2 kaya sinabiyan niya so manga opisyal niya, “Iya amo si Juan na Parabunyag, naboway iya otro! Kaya nakagigibo iya sa manga milagro.”
3 Sinabi adi ni Herodes ta ipinarakup niya kadto si Juan sagkud ipinapriso holi ki Herodias na agom ko ngod niyang si Felipe. 4 Pirmi kayang sinasabiyan ni Juan si Herodes, “Bukung tama na agomon mo si Herodias.” 5 Kaya gosto kintanang ipaguraan ni Herodes si Juan, alagad nakatakot iya ko manga Judio, ta ibinibilang nirang propeta si Juan.
6 Ko omabot so komplianyo ni Herodes, binnayli so igin na raraga ni Herodias sadto bitnga nira na ikinaogma niya saigo.
7 Kaya sinnompa iyang itatao sadto raraga a ono man na ayatun niya kanya. 8 Sa solsol ko kanyang ina, sinnabi so raraga, “Gosto ko tabing itao mo kanaku a payo ni Juan na Parabunyag na nakabutang sa bandiyado.” 9 Kaya dawa ikinamundu ko hadi, holi ko isinompa niya sadto atobangan ko manga bisita, iminanda niya na gibowon adi. 10 Kaya pinapogotan niya si Juan sadto luug ko prisowan. 11 So payo ibinutang sadto bandiyado saka itinao sadto raraga, pangala dinara man ko raraga sadto kanyang ina. 12 Innabot so manga disipolo ni Juan, kinoko so bangkay sagkud ilinubung. Pangala naggalin sira sagkud ibinareta adi ki Jesus.
Pinakaun ni Jesus so Singko Mil na Lalaki
(Mk. 6:30-44; Lk. 9:10-17; Jn. 6:1-14)
13 Ko mabaretaan ni Jesus kin ono so nangyari ki Juan, linnonad iya sa usad na bangka sagkud napaiyan iya sadto kalangtaran. Ko maisiyan adi ko manga tawo na galin sa manlainlain na banwaan, nag-agi sira paiyan sadto iiyanan ni Jesus. 14 Kaya ko bomaba iya sadto bangka, nabayad niya so malakadakul na tawo, naerak iya kanda sagkud pinaraay niya so manga nag-iilang kanda.
15 Ko miggagab-i na, rinnapo kanya so manga disipolo niya sagkud sinnabi, “Arayo a logar na adi sagkud miggagab-i na. Isobol mo na tabi a manga tawo tanganing makabakal sa pagkaun.”
16 Alagad sinabi ni Jesus kanda, “Diri na nira kaipowan pang gomalin. Kamo a migpakaun kanda.”
17 Sinnimbag sira, “Agko sana tabi sadi limang tinapay sagkud darwang isura.” 18 “Darawun ninyo kanaku,” simbag ni Jesus. 19 Minandaan niya so manga tawo na omula sadto doot. Kinoko so limang tinapay sagkud so darwang isura, tinnangad iya sadto langit sagkud nagpasalamat. Pinagbangabanga niya so manga tinapay sagkud itinao sadto manga disipolo, pangala itinao man ko manga disipolo sadto manga tawo. 20 Ngamin sira nakakaun sagkud nagkabobosog. Pangala, tinipon ko manga disipolo niya so manga natuda pang pagkaun sagkud napono nira so doseng bakol. 21 So bilang ko manga lalaking nagkaun, innabot sa singko mil katawo, pwera pa ko manga babayi sagkud manga igin.
Innagi si Jesus sadto Ibabuw ko Tobig
(Mk. 6:45-52; Jn. 6:15-21)
22 Pagkatapos pinalonad tolos ni Jesus sadto bangka so manga disipolo niya sagkud pinaona na sadto loyong parte ko ranuw, mantang pinapaoli niya so manga tawo. 23 Ko makagalin na so manga tawo, tinnokad iyang solo sadto kolod tanganing mangadyi. Ko gomab-i na, sadto iya na nagsosolo. 24 Sa oras na adto, arayo na so bangkang nalolonadan ko manga disipolo ni Jesus. Sinasalpok sa daddakulung alun so kandang bangka holi ta makusug so angin.
25 Ko mararamragun na, sinnonod kanda si Jesus na nag-aagi sadto ibabuw ko tobig. 26 Ko mabayad iya ko manga disipolo niya na nag-aagi sadto ibabuw ko tobig, nanggirabo sira sagkud rinnait holi sa katakotan, “Agko kalag!”
27 Alagad sinabiyan tolos sira ni Jesus, “Pakusugun ninyo a kaninyong buut! Ako adi. Diri kamo makatakot.”
28 Sinnimbag si Pedro, “Kagorangnan, kin ika tabi iton paiyanun mo ako siton imo na nag-aagi man sa ibabuw ka tobig.”
29 “Mayna,” sabi ni Jesus.
Kaya binnaba si Pedro sadto bangka sagkud innagi sadto tobig paiyan ki Jesus. 30 Alagad ko mamatian niya so makusug na angin, nakatakot iya saka pinnoon nang malunud, kaya rinnait iya, “Kagorangnan, iligtas mo ako!”
31 Pinugul man tolos ni Jesus so kamut niya, sagkud sinnabi, “Malakasadit ka pagtobod mo. Ngata ika ta nakatakot?”
32 Paglonad nirang darwa sadto bangka, pinnondo so angin. 33 Sagkud sinamba si Jesus ko manga nakalonad sadto bangka sagkud sinnabi, “Tonay man nanggayud, na ika a Igin sa Diyos!”
Pinaraay ni Jesus so Dakul na Nag-iilang
(Mk. 6:53-56)
34 Ko makabalyo na sira sadto ranuw, rinnoong sira sadto banwaan ka Genesaret. 35 Nabisto si Jesus ko manga taga sadto, kaya ipinamareta nira adi sadto manga kaabay na logar. Pangala dinara ko manga tawo ki Jesus so ngamin na agko ilang. 36 Nakimaerak sira ki Jesus na kin pwede paapolasun niya so manga nag-iilang dawa sadto gayad ko bado niya. Sagkud so ngamin na nakaapolas naraay.