Yohanis
Dapa Tanda dari Tuhan
Kata-Kata Partama
Sapa yang tulis kitab ni: Orang yang tulis kitab Yohanis Dapa Tanda dari Tuhan ni Yohanis (1:1, 4, 22:8. Lia jua Kata-kata Partama kitab Yohanis). Waktu tulis, dia su tua deng tinggal di pulo Patmos, di daera Yunani sakarang. Pemerinta Roma pake pulo ni par jadi bui. Yohanis dapa bui di sana tagal kasi tau Allah pung pasáng deng apa yang Yesus bilang par dia (1:9).
Dalang kitab Yohanis Dapa Tanda, Yohanis pake gaya bahasa yang beda dari kitab laeng di Alkitab Janji Baru. Dia pake banya simbol ka ande-ande yang susa par katong yang hidop jamang sakarang ni par mangarti akang. Dalang kitab ni, angka tuju jadi simbol yang paleng panting. Yohanis pake akang paleng banya, ada 52 kali. Angka tuju tu pung arti apapa yang genap deng seng kurang apapa.
Kitab ni par sapa: Kitab ni dapa tulis par tuju jamaat di tuju kota di propinsi Asia: Efesus, Smirna, Pergamus, Tiatira, Sardis, Filadelfia, deng Laodikia (1:4, 11).
Waktu Yohanis tulis surat ni, orang-orang parcaya mulai dapa siksa dari orang-orang yang seng parcaya deng dari pemerinta Roma. Waktu itu, raja-raja basar Roma angka dong pung diri jadi dewa, la paksa samua orang par somba dong. Tagal orang-orang parcaya seng mau somba raja-raja tu, jadi dong dapa siksa, mala ada jua yang dapa bunu (2:13, 6:9). Mar, banya jua yang bale balakang dari dong pung parcaya par Yesus tagal taku (2:14-15, 20).
Mangapa Yohanis tulis kitab ni: Kitab ni kasi tau hal-hal yang Allah kasi unju par Yesus Kristus, la Yesus kasi unju par malekat, la malekat kasi unju akang par Yohanis (1:1). Yesus Kristus suru Yohanis par tulis samua (1:11, 19).
Kitab ni kasi kuat orang Kristen pung hati biar jang dong mundur dari dong pung parcaya par Yesus biar kata dong dapa susa deng sangsara. Yohanis bilang kalo Yesus Kristus su kasi kala Setang pung Raja (20:10) deng Antua pung musu samua (11:15). Tarus, Antua nanti hukum Setang pung Raja (20:1-4, 9b-10) deng samua yang biking susa Antua pung orang-orang. Jadi orang-orang yang parcaya Yesus Kristus, yang su manang tu, dong pasti nanti hidop tarus-tarus deng Allah di sorga.
Surat ni tabage par babarapa bagiang:
| 1:1-3 | Kata-kata partama |
| 1:4-8 | Tabea |
| 1:9—3:22 | Surat-surat par tuju jamaat |
| 4:1—5:14 | Allah di kadera raja di sorga |
| 6:1—8:1 | Tuju segel |
| 8:2—11:19 | Tuju trompet |
| 12:1—14:20 | Tanda satu yang luar biasa di langit |
| 15:1—16:21 | Tuju cawan |
| 17:1—19:10 | Kota Babel rubu |
| 19:11-21 | Raja dari sagala raja manang prang di sorga |
| 20:1-15 | Setang pung Raja dapa kasi binasa, deng Allah putus orang mati pung parkara |
| 21:1—22:5 | Langit baru, dunya baru, deng Yerusalem baru |
| 22:6-21 | Yohanis tutu dia pung kitab |