Setang pung Raja dapa ika saribu taong
20:1-3
20
1 Abis itu, beta lia malekat satu turung dari sorga. Dia pegang konci pintu par pi ka setang-setang pung tampa deng ada rante basar satu di dia pung tangang. 2 Dia tangkap naga, ular tua tu, yang pung nama Setang pung Raja deng Tukang Tudu. Malekat tangkap dia la ika dia deng rante basar saribu taong.* 3 Tarus, malekat lempar dia ka setang-setang pung tampa, la konci tampa tu deng segel akang biar dia seng bisa parlente bangsa-bangsa sampe saribu taong tu abis. Abis saribu taong tu, dia musti dapa kasi lapas mar seng talalu lama.Yesus deng Antua pung orang-orang pegang parenta saribu taong
20:4-6
4 Tarus beta lia kadera-kadera raja deng orang-orang yang dudu di akang. Dong dapa kasi kuasa par putus parkara. La beta lia roh-roh dari orang-orang yang su dapa potong kapala tagal dong kasi tau soal Yesus deng tagal parcaya Allah pung ajarang. Dong tu orang-orang yang seng somba binatang tu deng akang pung patong, deng seng tarima tanda dari binatang tu di dong pung testa deng tangang. Dong hidop kombali deng pegang parenta sama-sama deng Kristus saribu taong.* 5 Dong tu yang partama hidop kombali. Mar, orang-orang mati yang laeng seng hidop kombali sampe saribu taong tu abis. 6 Dong yang partama hidop kombali tu Allah pung orang-orang deng dong paleng baruntung. Dong nanti seng mati kali kadua. Mar, dong nanti jadi imam-imam yang karja par Allah deng Kristus, deng pegang parenta sama-sama deng Antua saribu taong.
Setang pung Raja dapa siksa dalang lautang api walirang
20:7-10
7 Waktu saribu taong su abis, Setang pung Raja nanti dapa kasi lapas dari bui, setang-setang pung tampa tu. 8 La dia pi parlente sagala bangsa di dunya. Bangsa-bangsa tu dapa panggel par Gog deng Magog. Dia kumpul dong par pi prang. Dong banya paskali sama deng paser di pante.* 9 Jadi, dong datang dari sagala tampa di dunya la kurung kota yang Allah sayang, tampa Antua pung orang-orang tinggal. Mar api turung dari langit la kasi binasa dong samua. 10 Tarus, Setang pung Raja yang parlente dong tu dapa lempar ka dalang lautang api walirang. Itu tu tampa yang dolo binatang partama deng juru bicara parlente tu* dapa lempar. Dong samua dapa siksa siang-malang sampe tarus-tarus.
Allah putus orang mati pung parkara
20:11-15
11 Abis itu, beta lia kadera raja puti basar satu deng Antua yang dudu di akang. Di muka Antua, langit deng dunya langsung ilang deng seng ada lai.* 12 La beta lia orang-orang mati, orang kacil ka basar, badiri di muka kadera raja tu. La buku-buku yang isi samua yang orang su biking dapa buka. La buku satu laeng lai dapa buka. Buku tu isi nama-nama orang yang nanti hidop tarus-tarus deng Allah. La Allah putus samua orang mati pung parkara iko apa yang dong su biking, sama deng apa yang su tatulis dalang buku-buku tu. 13 Orang-orang mati yang ada di lautang deng yang ada di orang mati pung tampa, dong hidop kombali la Allah putus dong satu-satu pung parkara iko apa yang dong su biking. 14 Abis itu, kamatiang deng orang mati pung tampa dapa lempar ka dalang lautang api. Lautang api tu kamatiang kali kadua. 15 Orang-orang yang pung nama seng tatulis dalang buku yang isi nama-nama orang yang nanti hidop tarus-tarus deng Allah tu, dong samua dapa lempar ka dalang lautang api tu.