Yudas
pung Surat
Kata-Kata Partama
Sapa yang tulis surat ni: Surat Yudas ni Yudas yang tulis. Dia tu Yesus deng Yakobis pung sudara (Matius 13:55; Markus 6:3). Katong seng tau banya soal Yudas dari Alkitab Janji Baru, mar dari surat ni, katong tau kalo dia tu penatua jamaat yang dapa hormat dari orang Kristen.
Surat ni par sapa: Yudas tulis surat ni par jamaat Kristen (1), mar seng jelas jamaat tu ada di mana. Dari isi surat, katong tau kalo surat ni par orang Yahudi yang parcaya Yesus.
Waktu Yudas tulis surat ni, ada guru-guru parlente yang su maso dalang jamaat tu la putar bale Allah pung ajarang yang batul. Dong bilang kata tagal Allah su kasi unju Antua pung hati bae par dong la dong su salamat, jadi dong bisa biking apa sa iko dong pung napsu jahat. Dong tu jua manyangkal Yesus Kristus (4, 8).
Mangapa Yudas tulis surat ni: Yudas su lia kalo orang parcaya dapa bahaya dari ajarang-ajarang yang seng batul dari guru-guru parlente yang datang dalang jamaat. Jadi, Yudas tulis surat ni par kasi nasehat jamaat biar dong jang dapa tipu dari guru-guru parlente tu (3). Mar, dong musti pegang kuat-kuat par Allah pung ajarang yang kudus, yang jadi dasar dari dong pung hidop (20). Dia bilang kalo cuma Allah sa yang pung kuasa par jaga dong biar seng jatu dalang dosa (24). Dia jua kasi inga dong deng karas kalo guru-guru parlente tu pasti dapa hukum deng dapa kasi binasa dari Allah tagal apa yang dong biking (7, 10).