Yudas 1

Yudas

pung Surat

Tabea

1:1-2

1 Par basudara samua yang Allah Bapa su panggel par jadi Antua pung orang-orang, yang Antua sayang, deng yang Antua jaga tarus sampe nanti Yesus Kristus bale kombali.

Tabea! Beta ni Yudas, Yesus Kristus pung jongos. Beta ni jua Yakobis pung sudara gandong.

2 Beta minta biar Allah kasi unju Antua pung hati bae, dame, deng sayang batambong-tambong par kamong samua.

Allah nanti hukum orang-orang yang putar bale Antua pung ajarang

1:3-16

3 Basudara samua yang beta sayang! Waktu beta tulis surat ni par kamong, beta sunggu-sunggu mau tulis soal Allah kasi salamat katong samua. Mar beta seng jadi tulis soal itu, tagal beta pung hati kacil mau beta tulis nasehat par kamong. Beta biking bagitu biar kamong usaha sunggu-sunggu par pegang ajarang yang batul yang Antua su kasi tau akang par katong, Antua pung orang-orang. Ajarang yang batul tu seng baroba-baroba. 4 Barang, ada babarapa orang yang maso tado-tado di tenga-tenga kamong la putar bale Allah yang katong somba pung ajarang. Dong tu orang-orang yang seng hidop iko Allah pung mau. Dong bilang kata Allah su kasi unju Antua pung hati bae par katong, jadi katong bisa biking apa sa iko katong pung napsu jahat. Dong jua manyangkal Yesus Kristus yang jadi katong pung Raja deng Tuhan satu areng-areng. Dong tu orang-orang yang nanti dapa hukum dari Allah, sama deng apa yang Antua pung tulisang su bilang dari dolo lai.

5 Mar biar kata kamong su tau soal samua ni, beta tetap mau kasi inga kamong kombali. Dolo Tuhan memang kasi kaluar orang Israel dari tana Mesir, mar abis itu Antua kasi binasa orang-orang yang seng parcaya Antua. 6 Bagitu lai deng malekat-malekat yang seng puas deng kuasa yang Allah su kasi la pi kasi tinggal dong pung tampa di sorga. Antua su rante dong tarus-tarus dalang tampa satu yang galap paskali par hukum dong pas hari waktu dunya kiamat. 7 Bagitu lai deng orang-orang yang tinggal di kota Sodom deng Gomora, deng kota-kota yang baku dekat deng akang. Dong di kota-kota tu paleng samerlap, sama deng malekat-malekat tadi tu. Dong tidor deng orang yang bukang dong pung laki ka bini deng biking yang kurang-kurang ajar yang seng pantas par orang biking. Tagal itu, dong dapa hukum dalang api basar yang manyala tarus-tarus. Samua tu jadi tanda par kasi inga samua orang kalo orang jahat nanti dapa hukum macang bagitu.

8 Bagitu lai deng dong yang su maso tado-tado di tenga-tenga kamong, yang su kasi balajar ajarang-ajarang yang seng batul. Dong bilang kalo dong pung mimpi-mimpi tu asal dari Allah, jadi dong pake akang par jadi alasang par biking yang kurang-kurang ajar. La deng bagitu, dong biking kotor dong pung diri sandiri. Dong anggap enteng Allah pung kuasa deng hojat samua yang pung kuasa yang ada di sorga. 9 Sapa tau bagini, malekat-malekat pung pamimping yang nama Mikael sa seng barani kasi kaluar kata-kata hojat par tudu Setang pung Raja waktu baku malawang soal sapa yang nanti dapa Musa pung mayat. Dia cuma bilang kata, “Biar Tuhan sa yang nanti tagor se!” 10 Mar dong tu, dong barani par hojat apa sa yang dong sandiri seng mangarti. Dong tu sama deng binatang yang seng ada pung akal, yang biking apa sa iko suka. Itu tu yang nanti biking dong binasa. 11 Dong nanti cilaka! Barang, dong pung cara hidop jahat sama deng Kain. Dong hidop iko jalang yang seng batul macang deng Bileam, tagal mau dapa kepeng dari biking apa yang jahat. Dong malawang Allah sama deng Korah, jadi dong tu nanti binasa lai sama deng Korah. 12 Dong tu yang kasi rusak kamong pung acara makang par inga Tuhan Allah pung sayang. Barang, dong seng rasa malu sadiki lai par galojo makanang-makanang di acara tu deng cuma pikir diri sandiri. Dong tu sama deng awang yang dapa tiop dari anging, la seng ada ujang. Dong tu jua sama deng pohong-pohong yang seng kasi kaluar bua waktu musing babua, pohong yang tacabu lapis deng akar-akar la mati karing. 13 Sama deng galombang basar yang pukul kotor-kotor ka pinggir pante, dong jua seng tau malu par kasi unju dong pung kalakuang yang kurang-kurang ajar. Dong jua sama deng bintang-bintang di langit yang bagara kasana-kamari. Allah su kasi siap tampa yang paleng galap par hukum dong tarus-tarus.

14 Soal dong tu, Adam pung turunang katuju yang nama Henok jua su bilang Tuhan pung pasáng kata, “Tuhan nanti datang sama-sama deng Antua pung malekat ribu-ribu yang kudus, 15 par kasi sidang samua orang deng kasi hukumang par orang-orang yang seng dengar-dengarang Antua. Barang, orang-orang bardosa yang hidop jau dari Antua tu jaga biking kajahatang deng kasi kaluar kata par hojat Tuhan.” 16 Dong tu salalu barsungut deng kasi sala orang laeng. Dong hidop iko dong pung napsu jahat. Dong bicara mangarti par angka-angka dong pung diri sandiri deng kasi makang puji orang laeng par cari untung.

Katong pung parcaya par Yesus musti tetap kuat tarus

1:17-23

17 Mar kamong basudara yang beta sayang, kamong musti inga apa yang Tuhan Yesus Kristus yang katong somba pung utusang-utusang su parna bilang. 18 Dong parna bilang par kamong kata, “Waktu dunya su mau kiamat ni, nanti ada orang-orang yang suka hina Allah deng Antua pung orang-orang. Dong hidop iko dong pung napsu jahat.” 19 Dong tu orang-orang yang biking kamong tapica-pica deng yang hidop iko dunya pung napsu. Tuhan pung Roh seng ada deng dong.

20 Mar kamong basudara yang beta sayang, kamong musti usaha sunggu-sunggu biar kamong labe hari labe tamba parcaya par Allah pung ajarang yang kudus, yang jadi dasar par kamong pung hidop. Kasi biar Antua pung Roh pimping deng hentar kamong waktu sombayang. 21 La waktu kamong ada tunggu-tunggu Tuhan Yesus Kristus yang katong somba tu kasi unju Antua pung hati bae par biking katong samua hidop tarus-tarus deng Allah, kamong musti salalu inga kalo Allah sayang kamong. 22 Kamong musti kasi unju kamong pung hati bae par orang-orang yang balong kuat dalang dong pung parcaya. 23 Kamong musti tolong orang-orang yang su hidop iko ajarang yang seng batul, biar dong salamat. Kalo kamong biking bagitu, itu sama sa deng kamong su cigi dong kaluar dari api. Kamong jua musti kasi unju kamong pung hati bae par orang laeng lai, mar kamong musti ati-ati biar kamong seng anyo iko dong pung cara hidop yang jahat. Kamong musti kasi unju kamong pung hati bae par dong, mar binci dong pung dosa-dosa yang malakat di dong pung diri, macang deng pakiang kotor yang malakat di badang.

Yudas tutu dia pung surat

1:24-25

24 Basudara e! Cuma Allah sa yang pung kuasa par jaga kamong biar kamong seng tasonto la jatu dalang dosa. Antua tu yang kasi barsi kamong dari dosa deng bawa kamong par badiri deng hati paleng sanang di muka Antua yang hebat tu. 25 Antua tu Allah satu areng-areng yang Kasi Salamat Katong Manusia lewat Tuhan Yesus Kristus yang katong somba. Mari katong puji-puji Allah tagal Antua pantas par dapa puji! Antua tu yang pung kuasa basar, yang hebat, deng yang pegang parenta par samua-samua yang ada, mulai dari waktu dunya ni balong ada, sakarang, sampe tarus-tarus. Amin.

Hormat, Yudas