Yohanis
pung Surat Katiga
Kata-Kata Partama
Sapa yang tulis surat ni: Orang yang tulis surat 3 Yohanis ni penatua jamaat satu yang nama Yohanis. Lia jua Kata-kata Partama kitab Yohanis pung Kabar Bae soal Yesus deng surat 1 Yohanis.
Surat ni par sapa: Yohanis tulis surat ni par dia pung tamang bae yang nama Gayus. Dia tu tuang ruma yang bae, yang suka tolong basudara yang iko Yesus dari jamaat laeng par manumpang di dia pung ruma, biar kata dia seng kanal dong (5-6).
Waktu itu, dalang Gayus pung jamaat tu ada satu orang yang nama Diotrefes yang inging paskali jadi pamimping jamaat. Dia carita yang tar batul-batul soal Yohanis dong, seng mau tarima basudara yang iko Yesus dari jamaat laeng, mar jua larang basudara jamaat di situ par jang tarima dong (9-10).
Mangapa Yohanis tulis surat ni: Yohanis tulis surat ni par puji Gayus, soal apa yang dia biking par basudara yang parcaya Yesus dari jamaat laeng tu (5-6). Lewat surat ni jua, Yohanis mau kasi inga Gayus par jang iko apa yang jahat, macang apa yang Diotrefes biking (9-10), mar iko apa yang bae, macang apa yang Demetrius biking (12). Yohanis bilang, orang yang biking apa yang bae, dia tu Allah pung ana. Mar, orang yang biking apa yang jahat, dia tu batul-batul seng kanal Allah (11).