Yohanis
pung Surat Katiga
Tabea
1:1-4
1
1 Par Gayus,* beta pung tamang bae.Tabea! Beta ni Yohanis, penatua jamaat yang batul-batul sayang ale.
2 Tamang e, beta sombayang biar samua yang ale biking jadi deng bae, deng biar ale seng saki mar biar ale kuat, sama deng ale pung parcaya yang kuat. 3 Beta pung hati sanang paskali waktu babarapa sudara yang iko Yesus datang la carita kalo ale hidop iko Allah pung ajarang yang batul tarus. Beta tau, ale memang hidop macang bagitu. 4 Beta pung hati paleng sanang paskali waktu beta dengar kalo beta pung ananaa su hidop iko Allah pung ajarang yang batul.
Yohanis puji apa yang Gayus biking
1:5-8
5 Tamang e, ale su paleng banya kasi apapa par tolong katong pung basudara yang iko Yesus,b biar kata ale seng kanal dong. Samua tu kasi unju kalo ale tu orang yang batul-batul iko Yesus. 6 Dong su carita par jamaat di sini kalo ale paleng sayang dong. Beta mau minta ale tolong dong bae-bae tarus deng cara kasi apa yang dong parlu waktu dong mau pi ka tampa laeng. Kalo ale biking bagitu, Allah pung hati pasti sanang. 7 Barang, waktu dong pi kasi tau soal Yesus Kristus par orang-orang yang seng parcaya Antua, dong seng minta apapa dari orang-orang tu. 8 Jadi, katong yang su parcaya Kristus musti tolong dong yang pi kasi tau Yesus par orang-orang tu deng cara kasi apa yang dong parlu, biar katong jadi dong pung tamang karja yang sama-sama kasi tau Allah pung ajarang yang batul.
Soal Diotrefes deng Demetrius
1:9-12
9 Tamang e, dolo beta su tulis surat par jamaat di situ, mar Diotrefes yang inging paskali par jadi pamimping di situ seng mau dengar deng tarima apa yang beta tulis. 10 Jadi kalo nanti beta datang ka situ, beta mau bongkar samua-samua par jamaat di situ soal apa yang dia biking. Dia suka carita yang tar batul-batul soal katong. Mar yang labe busu lai, dia bukang cuma seng mau tarima basudara yang iko Yesus yang ada kasi tau Kabar Bae par orang-orang sa, mar dia jua larang basudara jamaat di situ par jang tarima dong deng user basudara jamaat yang tarima dong tu par kaluar dari jamaat.
11 Sio tamang e, jang iko apa yang jahat, mar iko apa yang bae. Orang yang biking apa yang bae, dia tu Allah pung ana. Mar orang yang biking apa yang jahat, dia tu batul-batul seng kanal Allah.
12 Kalo soal Demetrius, samua orang dalang jamaat bilang kalo dia tu bae. Dia hidop iko Allah pung ajarang yang batul. Ini ni bukti kalo dia tu bae. Katong jua bilang kalo dia tu bae. La ale tau kalo apa yang katong bilang ni batul to?
Yohanis tutu dia pung surat
1:13-15
13 Tamang e, masi banya lai yang beta mau bilang par ale, mar beta seng mau tulis akang dalang surat ni. 14 Beta harap seng lama lai beta bisa baku dapa langsung deng ale la bicara muka deng muka.
15 Beta minta biar Allah kasi dame par ale.
Ale pung tamang-tamang yang ada di sini kiring hormat par ale. Tolong kiring beta pung hormat jua par tamang-tamang di situ satu-satu.
Hormat, Yohanis