Yohanis
pung Surat Kadua
Tabea
1:1-3
1
1 Par mama yang Allah su pili par jadi Antua pung orang deng par mama pung anana.aTabea! Surat ni dari beta Yohanis, penatua jamaat yang batul-batul sayang mama dongb samua. Mar bukang cuma beta sa, samua orang yang parcaya Allah pung ajarang yang batul jua sayang mama dong lai. 2 Katong sayang mama dong tagal katong samuac parcaya Allah pung ajarang yang batul, deng tagal ajarang tu tasimpang dalang katong pung hati tarus-tarus.
3 Beta minta biar Allah Bapa deng Antua pung Ana Yesus Kristus kasi berkat basar, hati bae, deng dame par katong samua yang hidop iko Allah pung ajarang yang batul deng yang baku sayang satu deng laeng.
Pegang Kristus pung ajarang kuat-kuat
1:4-11
4 Mama e, beta pung hati paleng sanang waktu beta tau kalo babarapa dari mama pung anana dong hidop iko Allah pung ajarang yang batul. Apa yang dong biking tu sama deng Allah Bapa pung parenta par katong. 5 Tagal itu mama jantong hati e, beta minta mama biking parenta satu ni. Parenta ni bukang parenta baru mar parenta yang katong su tau dari waktu katong partama kali parcaya Kristus lai. Parenta tu bilang kalo katong samua musti baku sayang satu deng laeng.* 6 Kalo katong batul-batul sayang Allah, itu pung arti katong hidop iko Antua pung parenta. Antua pung parenta tu: Katong musti hidop baku sayang satu deng laeng. Parenta tu mama dong su parna dengar akang waktu partama kali parcaya Kristus.
7 Mama e, beta bilang bagitu tagal su banya orang parlente orang-orang deng ajarang yang seng batul di sagala tampa. Dong ajar kalo Yesus Kristus seng parna datang ka dunya jadi manusia. Orang-orang macang bagitu tu, dong mulu parlente putar bale deng musu Kristus. 8 Jadi mama dong musti jaga diri bae-bae biar orang seng parlente mama dong, la katong pung karja par bawa Kabar Bae par mama dong dolo tu parcuma. Kalo mama dong jaga diri macang bagitu, Allah nanti kasi samua yang Antua su janji par mama dong. 9 Sapa yang seng iko Kristus pung ajarang la iko ajarang yang laeng, dia tu seng hidop satu hati deng Allah. Mar sapa yang iko Kristus pung ajarang tarus, dia tu satu hati tarus deng Allah Bapa deng Antua pung Ana. 10 Kalo ada orang yang datang par mama dong la kasi balajar ajarang yang laeng dari Kristus pung ajarang, jang tarima dia manumpang di mama dong pung ruma deng jang kasi suara dia lai. 11 Barang, kalo ada orang yang kasi suara dia, orang itu su tolong dia par kasi balajar ajarang yang jahat.
Yohanis tutu dia pung surat
1:12-13
12 Mama e, masi banya lai yang beta mau bilang par mama dong, mar beta seng mau tulis akang dalang surat ni. Beta harap beta bisa baku dapa langsung deng mama dong la bicara muka deng muka, biar katong samua pung hati batul-batul sanang.
13 Hormat par mama dong dari mama pung sudara parampuang yang Allah su pili pung ananad yang ada di sini.
Hormat, Yohanis