Yohanis
pung Surat Partama
Kata-Kata Partama
Sapa yang tulis surat ni: Orang yang tulis surat 1 Yohanis ni penatua jamaat satu yang nama Yohanis. Dia tu Yakobis pung sudara, deng satu dari Yesus pung sapulu dua murid. Yohanis ni jua tulis surat 2 Yohanis, surat 3 Yohanis, kitab Yohanis, deng kitab Yohanis Dapa Tanda. Lia jua Kata-kata Partama kitab Yohanis.
Surat ni par sapa: Yohanis tulis surat ni par orang-orang parcaya (2:12-14, 5:13), mar seng bilang dong tinggal di mana. Surat ni mangkali par jamaat-jamaat di daera Asia Kacil, di negara Turki sakarang.
Waktu Yohanis tulis surat ni, ada banya guru parlente yang datang dalang jamaat la kasi balajar ajarang yang seng batul. Dong ajar kalo Yesus Kristus seng batul-batul datang ka dunya jadi manusia (4:2-3), ka Antua tu bukang Orang yang Allah su Angka par Kasi Salamat Manusia (2:22-23).
Mangapa Yohanis tulis surat ni: Yohanis tulis surat ni par kasi kuat jamaat biar dong satu hati deng Allah Bapa deng Antua pung Ana Yesus Kristus tarus. Yohanis kasi balajar jamaat kalo dong bisa tau batul-batul sapa yang satu hati deng Allah, deng sapa yang tukang parlente. Orang yang seng biking dosa tarus (3:6), yang hidop iko Yesus pung kata-kata (2:3), deng yang sayang dia pung basudara yang iko Yesus (2:9-11), dong tu yang satu hati deng Allah deng Antua pung Ana Yesus Kristus.
Lewat surat ni, Yohanis jua malawang ajarang-ajarang yang seng batul soal Yesus. Dia bilang Yesus su ada sama-sama deng Allah Bapa dari waktu dunya ni balong ada lai (1:1). Allah su utus Antua par kasi salamat manusia (4:14). Tarus, Yohanis bilang kalo dia deng utusang-utusang yang laeng su lia Yesus deng dong pung mata kapala sandiri, su dengar Antua pung suara, mala su pegang Antua deng dong pung tangang sandiri (1:1-3). Jadi, Yesus tu batul-batul Allah yang datang ka dunya jadi manusia par kasi salamat manusia.
Surat ni tabage par babarapa bagiang:
| 1:1-4 | Kata-kata partama |
| 1:5—2:29 | Jang biking dosa tagal Tuhan seng parna biking dosa |
| 3:1—4:21 | Baku sayang tagal Allah salalu sayang katong |
| 5:1-21 | Yesus biking katong hidop tarus-tarus deng Allah |